អន្តរជាតិ
×![]()
ដោយ៖ ឈួន ឈីវអ៊ីង
បើគិតត្រឹមចុងឆ្នាំ២០១៧ ប្រជាជនចំនួន៦៨,៥លាននាក់ ត្រូវបានបង្ខំចិត្តចាកចេញពីខ្លួនប្រទេស ហើយក្លាយជាជនភៀសខ្លួន។ 
តាមរបាយរណ៍របស់អង្គការសហប្រជាជាតិទទួលបន្ទុកសិទ្ធិមនុស្ស (UNHCR) ជនភៀសខ្លួន២៥,៤លាននាក់ជាក្មេងអាយុក្រោម១៨ឆ្នាំ ៣,១លាននាក់ជាជនស្វែងរកជម្រកថ្មី និងប្រជាជន ៤០លាននាក់ជាប្រជាជនដែលផ្លាស់ទីលំនៅដោយសារសង្គ្រាម និងគ្រោះធម្មជាតិជាដើម។
ប្រទេសជាច្រើនបានបើកទ្វារទទួលឲ្យជនភៀសខ្លួនយ៉ាងច្រើនចូលមករស់នៅក្នុងប្រទេសរបស់ខ្លួន។ ក្នុងចំណោមនោះ តួកគីបានក្លាយជាប្រទេសដែលមានជនភៀសខ្លួនរស់នៅច្រើនជាងគេលើពិភពលោក ដោយប្រទេសនេះទទួលជនភៀសខ្លួន ៣,៥លាននាក់ បើគិតត្រឹមចុងឆ្នាំ ២០១៧។
ប៉ាគីស្ថាន និងអ៊ូហ្កង់ដាស្ថិតនៅលេខរៀងបន្ទាប់ដោយប្រទេសទាំងពីរទទួលយកជនភៀសខ្លួនសរុបចំនួន ១,៤ លាននាក់ឯណោះ។
ដោយឡែក ដោយគិតតាមដង់ស៊ីតេជនភៀសខ្លួនវិញ លីបង់ជាប្រទេសដែលមានដង់ស៊ីតេជនភៀសខ្លួនច្រើនជាងគេ បើគិតត្រឹមចុងឆ្នាំ២០១៧។ លេខរៀងបន្ទាប់គឺ ប្រទេសហ្ស៊កដានី ហើយតួកគីឈរនៅលេខរៀងទី៣។
ក្នុងចំណោមប្រជាជន ១០០០នាក់ លីបង់មានជនភៀសខ្លួនរហូតដល់ទៅ១៦៤នាក់។ ចំនួននេះស្មើនឹងមួយភាគប្រាំមួយនៃប្រជាជន។ ប៉ុន្តែបើបូករួមទាំងប្រជាជនប៉ាឡេស្ទីនដែលបានភៀសខ្លួនមករស់នៅលីបង់តាំងពីឆ្នាំ១៩៥០មក ចំនួនជនភៀសកើនឡើងរហូតដល់ទៅមួយភាគបួននៃប្រជាជនសរុប។
ជនភៀសខ្លួនទាំងនោះភាគច្រើនមកពីប្រទេសស៊ីរីដែលរងគ្រោះដោយសង្គ្រាមស៊ីវិល។ នៅចុងឆ្នាំ២០១៧ ពីរភាគបី ឬ៦៨%នៃជនភៀសខ្លួនទាំងអស់ មកពីប្រទេសចំនួនប្រាំគឺស៊ីរី អាហ្វហ្គានីស្ថាន ស៊ូដង់ខាងត្បូង មីយ៉ាន់ម៉ា និងសូម៉ាលី៕
Tag:
ជនភៀសខ្លួន
អង្គការសហប្រជាជាតិ
© រក្សាសិទ្ធិដោយ thmeythmey.com
