អន្តរជាតិ
ជប៉ុន ត្រៀមបញ្ជូនអង្គភាពប៉ូលិសទៅតំបន់កោះមានជម្លោះជាមួយចិន សេនកាគុ (Senkakus) ក្នុងភាសាជប៉ុន ឬទាវយូ (Diaoyu) ក្នុងភាសាចិន, ប្រភពAFP
× ជប៉ុន គ្រោងនឹងបញ្ជូនអង្គភាពប៉ូលិសពិសេសបំពាក់ដោយកាំភ្លើងប្រភេទ SMG និងឧទ្ធម្ភចក្រ ដើម្បីទៅល្បាតកូនកោះ ដែលកំពុងមានជម្លោះជាមួយចិន នៅក្នុងសមុទ្រចិនខាងកើត។
ការបញ្ជូនអង្គភាពប៉ូលិសពិសេសទៅក្បែរកូនកោះ ដែលត្រូវបានគេស្គាល់ថា សេនកាគុ (Senkakus) ក្នុងភាសាជប៉ុន ឬទាវយូ (Diaoyu) ក្នុងភាសាចិន អាចនឹងកើតឡើងនៅឆ្នាំក្រោយ។ នេះបើតាមការចុះផ្សាយរបស់ប្រពន្ធផ្សព្វផ្សាយសារធារណៈជប៉ុន NHK នៅពីថ្ងៃទី២ ខែកញ្ញា។
ជាការពិត នេះគឺជាលើកទី១របស់ជប៉ុន ក្នុងការប្រើប្រាស់កម្លាំងប៉ូលិសទៅយាមល្បាតលើកោះជម្លោះជាមួយចិន។ ទីភ្នាក់ងារប៉ូលិសជាតិរបស់ជប៉ុន បានលើកឡើងថា ខ្លួនបានដាក់សំណើហិរញ្ញវត្ថុរួចហើយ សម្រាប់មន្ត្រីប៉ូលិស១៥៩នាក់ ដើម្បីបណ្តេញសកម្មភាពខុសច្បាប់ណាមួយ ដែលកើតមាននៅលើកោះ ដោយក្រុមទាហានប្រទេសណាមួយ។
ជាញយៗ រដ្ឋាភិបាលតូក្យូ តែងតែរិះគន់លើសកម្មភាពរបស់រដ្ឋាភិបាលទីក្រុងប៉េកាំងលើការបញ្ជូននាវាយាមល្បាត ទៅដែនទឹកជុំវិញកោះជម្លោះ។ ពិតណាស់ថា កោះសេនកាគុ (Senkaku) ក្នុងភាសាជប៉ុន ឬទាវយូ (Diaoyu) ក្នុងភាសាចិន ត្រូវបានគេស្គាល់ថា ជាកោះ ដែលមិនមានមនុស្សរស់នៅឡើយ ហើយវានៅតែជាជម្លោះដែនទឹករបស់ប្រទេសទាំងពីរ។
សូមបញ្ជាក់ថា ជប៉ុនបានបញ្ជូនយន្តហោះចម្បាំងឲ្យទៅយាមល្បាតកោះ តាំងពីឆ្នាំ២០១៨មកម្លេះ ខណៈពេលចិនបានបញ្ជូននាវាមុជទឹក ដែលដើរដោយថាមពលនុយក្លេអ៊ែរទៅក្បែរកោះ ដែលកំពុងកើតមានជម្លោះមួយនេះ។ យ៉ាងណាមិញ ភាពតានតឹងរវាងប្រទេសទាំងពីរគឺ ចិន និងជប៉ុនកាន់តែខ្លាំងឡើងនៅពេលទីក្រុងតូក្យូ បានទាមទារយកកោះទាំងនោះនៅក្នុងឆ្នាំ២០១២៕
© រក្សាសិទ្ធិដោយ thmeythmey.com