ជាតិ
នយោបាយជាតិ
អ្នកសេរីនិយមអន្តរជាតិ ប្រកាសដាក់សំណុំរឿងពីការគំរាមជីវិតលោក សម រង្ស៊ី ទៅ ICC លោក សម រង្ស៊ី និងភរិយា ថតជាមួយអ្នកសេរីនិយមអន្តរជាតិនាពេលកន្លងមក (រូបពី Liberal International)
× បណ្តុំអ្នកនយោបាយមកពីប្រទេស១១ ដែលតាំងខ្លួនជាអ្នកសេរីនិយម បានប្រកាសថា ពួកគេ នឹងរួមដៃជាមួយមេធាវីអន្តរជាតិ សរសេរសំណុំរឿងស្តីពីការគំរាមកំហែងដល់អាយុជីវិតរបស់លោក សម រង្ស៊ី ពីសំណាក់រដ្ឋាភិបាលកម្ពុជា បញ្ជូនទៅតុលាការព្រហ្មទណ្ឌអន្តរជាតិ (ICC)។ ការប្រកាសរបស់ពួកគេ គឺធ្វើឡើងតាមរយៈលិខិតចំហមួយ ដែលចេញផ្សាយលើគេទំព័រអ្នកសេរីនិយមអន្តរជាតិ (Liberal International) នៅថ្ងៃទី១៦ ខែតុលា ឆ្នាំ២០១៩។
អ្នកនយោបាយសេរីនិយមទាំងនោះ បានសរសេរក្នុងលិខិតចំហ ដូច្នេះថា៖«ការគំរាមកំហែងចាប់ខ្លួននិងការគំរាមកំហែងលើអាយុជីវិតរបស់លោក សម រង្ស៊ី រួមទាំងអ្នកគាំទ្ររបស់លោក គឺពិតជាមិនអាចទទួលយកបានឡើយ ហើយវា គ្រាន់តែជាសញ្ញា បង្ហាញទៅពិភពលោកទាំងមូលថា រដ្ឋាភិបាលកម្ពុជា ខ្លាចប្រជាជនរបស់ខ្លួនប៉ុណ្ណោះ។ ការបំភិតបំភ័យនេះ គឺប្រៀបដូចជាឈើច្រត់របស់របបផ្តាច់ការ ដែលទទួលបានដោយគ្មានការគាំទ្រ ហើយយើង មិនទទួលស្គាល់ការប្រើប្រាស់ការបំភិតបំភ័យនេះទេ ទោះក្នុងកាលៈទេសៈណាក៏ដោយ»។
លោក សុខ ឥសាន សមាជិកព្រឹទ្ធសភានិងជាអ្នកនាំពាក្យគណបក្សប្រជាជនកម្ពុជា មិនចម្លែកចិត្តឡើយចំពោះមិត្តភក្តិបរទេសរបស់លោក សម រង្ស៊ី ដែលចង់ប្តឹងសម្តេចនាយករដ្ឋមន្ត្រី ហ៊ុន សែន ឬរដ្ឋាភិបាលកម្ពុជា ទៅតុលាការព្រហ្មទណ្ឌអន្តរជាតិ។ លោក ប្រាប់សារព័ត៌មានថ្មីៗ នៅថ្ងៃទី១៨ ខែតុលា ថា ការប្តឹងរដ្ឋាភិបាលកម្ពុជា ទៅតុលាការអន្តរជាតិនេះ គឺធ្លាប់មានកន្លងមករួចមកហើយ។
អ្នកនាំពាក្យគណបក្សកាន់អំណាច ចំអកដូច្នេះថា៖«វា អត់មានស្អីទេ ឲ្យធ្វើអីធ្វើទៅ ក៏ប៉ុន្តែ មិនអាចបំពានមកលើឯករាជ្យភាពនិងអធិបតេយ្យភាពកម្ពុជាបានជាដាច់ខាត។....គេសរសេរ [សំណុំរឿង] មានអីពិបាក គេ នៅអង្គុយសរសេរនៅអឺរុបឯណោះ ឲ្យគេសរសេរទៅ សរសេរដល់១ពាន់ដង ១ពាន់យប់១ពាន់ថ្ងៃ សរសេរបាន ក៏ប៉ុន្តធ្វើអីរដ្ឋាភិបាលកម្ពុជា អត់បានទេ»។
ចំពោះការលើកឡើងថារដ្ឋាភិបាលកម្ពុជា គំរាមចាប់ខ្លួន ឬរហូតគំរាមដល់អាយុជីវិតរបស់លោក សម រង្ស៊ីនោះ លោក សុខ ឥសាន មិនបដិសេធឡើយ ដោយលោក លើកហេតុផលថា ការវិលត្រឡប់របស់លោក សម រង្ស៊ី មិនមែនជាការវិលត្រឡប់ដោយសន្តិភាពនោះទេ ពោលគឺដើម្បីផ្តួលរំលំរដ្ឋាភិបាល បង្កឲ្យមានចលាចលក្នុងប្រទេស។ លោក ថ្លែងថា៖«ខ្ញុំ ឯកភាព ពីព្រោះសម រង្ស៊ី បើមកកាត់ព្រំដែនថៃ ជាន់មីនស្លាប់ខ្លួនឯងតើ មានអ្នកណាគំរាមកំហែងសម្លាប់គាត់ ហើយកុំបន្ទោសគេ»។
ក្នុងលិខិតចំហដដែល ក្រុមអ្នកសេរីនិយម ក៏បានប្រកាសគាំទ្រផងដែរ ចំពោះការវិលត្រឡប់របស់លោក សម រង្ស៊ី មកកាន់កម្ពុជាដោយសុវត្ថិភាព នៅថ្ងៃទី៩ ខែវិច្ឆិកា ឆ្នាំ២០១៩។ លើសពីនេះ ពួកគេ អះអាងថា នឹងព្យាយាមជំរុញស្ថាប័ននីតិបញ្ញតិ្តនិងរដ្ឋាភិបាលនៃប្រទេសសេរីនិយម ឲ្យដាក់សម្ពាធនយោបាយបន្ថែមទៀត មកលើរដ្ឋាភិបាលកម្ពុជា។
លោក សុខ ឥសាន ចាត់ទុក ការប្រកាសគាំទ្រដំណើរមាតុភូមិនិវត្តរបស់លោក សម រង្ស៊ី ថាជារឿងរបស់ពួកគេ។ លោក មានប្រសាសន៍ថា៖«ពួកគាត់ គ្រាន់តែប្រកាសគាំទ្រជាសម្តី ជាខ្យល់ ជាផ្សែង មិនមែនគាំទ្រដោយរូបកាយមកជាមួយទេ អ៊ីចឹងគាំទ្រនៅក្រៅប្រទេសឯណោះ ទោះគាំទ្រ១ម៉ឺនដង១លានដង ក៏វាអត់ប្រយោជន៍ដែរ»។
អ្ននយោបាយបរទេស ដែលចេញលិខិតចំហខាងលើ គឺមកពី អង់ដូរ៉ា អង់គ្លេស ហូឡង់ អៀរឡង់ ថៃ អាហ្វ្រិកខាងត្បូង អាល្លឺម៉ង់ ម៉ាសេដ្វានខាងជើង កេនយ៉ា ស្លូវេនី និង ស្វីស។ ពួកគេ សុទ្ធតែជាសមាជិកនៃអ្នកសេរីនិយមអន្តរជាតិ (Liberal International)៕
Tag:
សម រង្ស៊ី
មាតុភូមិនិវត្ត
ICC
© រក្សាសិទ្ធិដោយ thmeythmey.com