របាយការណ៍ WHO៖ អ្នកប្រើប្រាស់ថ្នាំជក់ ធ្លាក់ចុះរហូតដល់ ៦០លាននាក់ក្នុងពីរទសវត្សរ៍នេះ

អន្តរជាតិ

របាយការណ៍ WHO៖ អ្នកប្រើប្រាស់ថ្នាំជក់ ធ្លាក់ចុះរហូតដល់ ៦០លាននាក់ក្នុងពីរទសវត្សរ៍នេះ

20, Dec 2019 , 8:59 am

រូបភាព

រូបភាព៖ AFP

ដោយ: ធៀន ភារិន្ទ

របាយការណ៍ចេញផ្សាយដោយអង្គការសុខភាពពិភពលោក នៅថ្ងៃទី១៩ ខែធ្នូ បានបង្ហាញថា ចំនួនអ្នកប្រើប្រាស់ថ្នាំជក់ក្នុងពិភពលោក គឺមានការធ្លាក់ចុះគួរឲ្យកាត់សម្គាល់ ប៉ុន្តែធ្លាក់ចុះតែចំនួនស្ត្រី និងកូនក្មេងតែប៉ុណ្ណោះ ខណៈពេលបុរសមានការកើនឡើង។ របាយការណ៍រំពឹងថា ចំនួនអ្នកប្រើប្រាស់ថ្នាំជក់ជាបុរស នឹងមានការធ្លាក់ចុះបន្តិចវិញ ក្នុងឆ្នាំ ២០២០។ បើទោះបីជាអត្រា នៃអ្នកប្រើប្រាស់ថ្នាំជក់ធ្លាក់ចុះក៏ពិតមែន ប៉ុន្តែចំនួននេះ មិនបានគិតលើអ្នកប្រើប្រាស់បារីអេឡិចត្រូនិចឡើយ។

របាយការណ៍ រាប់បញ្ចូលតែចំនួន នៃអ្នកជក់បារីធម្មតា បារីស៊ីហ្គា ខ្សៀ និងខ្សៀទឹក និងផលិតផលគ្មានផ្សែងតែប៉ុណ្ណោះ ប៉ុន្តែមិនបានគិតបញ្ចូលបារីអេឡិចត្រូវនិចឡើយ។

បើគិតត្រឹមពីរទសវត្សរ៍កន្លងមកនេះ ចំនួននៃអ្នកប្រើប្រាស់ថ្នាំជក់ គឺបានធ្លាក់ចុះពីចំនួន ១,៣៩៧លាននាក់ក្នុងឆ្នាំ ២០០០ មកត្រឹម១,៣៣៧លាននាក់ ក្នុងឆ្នាំ ២០១៨ ពោលគឺ វាបានធ្លាក់ចុះប្រមាណជា ៦០លាននាក់។ ក្នុងនោះ ចំនួនស្ត្រី ដែលបានប្រើប្រាស់ថ្នាំជក់ គឺបានធ្លាក់ចុះពីចំនួន ៣៤៦ លាននាក់ ក្នុងឆ្នាំ ២០០០ មកត្រឹមតែ ២៤៤លាននាក់។ ចំណែកបុរស បើធៀបនឹងរយៈពេលដូចគ្នា ចំនួនអ្នកជក់ជាបុរស មានការកើនឡើងពី៤០លាននាក់ ដល់ជាង១ពាន់លាននាក់។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។

ដោយស្មើនឹងអត្រា ៨០ភាគរយនៃអ្នកប្រើប្រាស់ថ្នាំជក់ បុរស ក៏បានចាប់ផ្តើមទាត់ចោលទម្លាប់អាក្រក់មួយនេះ ជាបណ្តើរៗហើយដែរ។ តាមរយៈរបាយការណ៍អង្គការសុខភាពពិភពលោកដដែលនេះ បានបង្ហាញថា ក្នុងឆ្នាំ ២០២០ខាងមុខ ចំនួនបុរសប្រើប្រាស់ផលិតផលថ្នាំជក់ នឹងធ្លាក់ចុះចំនួន ២លាននាក់ បើធៀបទៅនឹងឆ្នាំ ២០១៨ ។ហើយរបាយការណ៍នេះ បានរំពឹងថា ចំនួនបុរសប្រើប្រាស់ផលិតផលថ្នាំជក់ នឹងមានការធ្លាក់ចុះ ក្នុងអត្រា ៦លាននាក់ នៅក្នុងឆ្នាំ ២០២៥។

ពាក់ព័ន្ធនឹងរបាយការណ៍ថ្មីនេះ ទីភ្នាក់ងារសុខភាពពិភពលោក បានចង្អុលបង្ហាញថា ការធ្លាក់ចុះនៃអត្រាអ្នកប្រើប្រាស់ថ្នាំជក់ គឺដោយសារយុទ្ធនាការប្រឆាំងនឹងប្រើប្រាស់ថ្នាំជក់កន្លងមក។ ប៉ុន្តែទីភ្នាក់ងារសុខភាពមួយនេះ ក៏បានព្រមានផងដែរថា បើទោះបីជាមានការកាត់បន្ថយចំនួនអ្នកប្រើប្រាស់ថ្នាំជក់ ក៏ពិតមែន ប៉ុន្តែអង្គការសុខភាពពិភពលោក ត្រូវចាត់វិធានការបន្ថែមទៀត ដើម្បីកាត់បន្ថយចំនួនដ៏ច្រើនលើសលុប ដែលកំពុងតែញៀន ក្នុងការប្រើប្រាស់ថ្នាំជក់។

ជាមួយគ្នានេះ លោក Tedros Adhanom Ghebreyesus ប្រធានអង្គការសុខភាពពិភពលោក បានគូសបញ្ជាក់យ៉ាងដូច្នេះថា ការធ្លាក់ចុះនៃការប្រើប្រាស់ផលិតផលថ្នាំជក់ជាបុរស គឺជាការផ្លាស់ប្តូរដ៏សំខាន់មួយ ក្នុងការប្រយុទ្ធប្រឆាំងនឹងការប្រើប្រាស់ថ្នាំជក់។ យ៉ាងណាក៏ដោយ ចំនួននៃការធ្លាក់ចុះនេះ គឺមិនអាចផ្តាច់ចេញពីយុទ្ធនាការ និងគោលនយោបាយរបស់រដ្ឋាភិបាល ក្នុងការរឹតបន្តឹងឧស្សាហកម្មថ្នាំជក់នោះឡើយ។

សូមបញ្ជាក់ថា មនុស្សចំនួន ៨ លាននាក់បានបាត់បង់ជីវិតដោយសារថ្នាំជក់ ជារៀងរាល់ឆ្នាំ។ ក្នុងចំណោម ៨លាននាក់ មនុស្សជាង ៧លាននាក់ បានស្លាប់ ដោយសារការប្រើប្រាស់ថ្នាំជក់ផ្ទាល់ ខណៈពេល១,២លាននាក់ គឺស្លាប់ដោយសារការស្រូបផ្សែងពីអ្នកប្រើប្រាស់ផលិតផលថ្នាំជក់។ ជាពិសេស ចំនួននៃអ្នកជក់ ៨០ភាគរយ គឺមកពីប្រទេសមានប្រាក់ចំណូលទាប និងមធ្យម ៕