អន្តរជាតិ
×![]()
ដោយ: ធៀន ភារិន្ទ
ក្នុងឱកាសឆ្នាំថ្មី ឆ្នាំ ២០២០ មេដឹកនាំសំខាន់ៗ បានចេញមុខផ្ងើសារសំខាន់ជាបន្តបន្ទាប់។ ក្នុងនេះមេដឹកនាំខ្លះ បានផ្ញើសារពីការការការបរិស្ថាន ខ្លះនិយាយពីបញ្ហាក្នុងស្រុក និងខ្លះទៀតនិយាយពីបញ្ហាគោលនយោបាយការបរទេស។ 
ចាប់ពីនាយករដ្ឋមន្ត្រីវ័យក្មេងហ្វាំងឡង់ លោកស្រី Sanna Marin ដល់ ប្រធានាធិបតីរុស្ស៊ី វ្លាឌីមៀ ពូទីន រហូតដល់ ប្រធានាធិបតីចិន ស៊ី ជិនភីង និងមេដឹកនាំមួយចំនួនទៀត។ ខាងក្រោមនេះ គឺជាសាររបស់ថ្នាក់ដឹកនាំប្រទេសសំខាន់ៗ ក្នុងឆ្នាំ ២០២០៖
នាយករដ្ឋមន្ត្រីហ្វាំងឡង់ Sanna Marin
លោកស្រី Sanna Marin គឺជាប្រមុខរដ្ឋាភិបាល ដែលមានវ័យ ៣៤ឆ្នាំ និងក្មេងជាងគេបំផុតនៅលើពិភពលោក។ សម្រាប់សារឆ្នាំថ្មីនេះ លោកស្រីMarin បានថ្លែងសារយ៉ាងដូច្នេះថា គោលដៅសំខាន់ក្នុងឆ្នាំថ្មីនេះ គឺធ្វើយ៉ាងណាឲ្យហ្វាំងឡង់ ជាសង្គម ដែលមានបរិស្ថានល្អ។ បើតាមនាយករដ្ឋមន្ត្រីវ័យ ៣៤ឆ្នាំរូបនេះ ហ្វាំងឡង់ ត្រូវតែស្វែងរកដំណោះស្រាយ ដើម្បីប្រយុទ្ធប្រឆាំងការបម្រែបម្រួលអាកាសធាតុ និងកាត់បន្ថយការបញ្ចេញឧស្ម័នកាបូនិកឲ្យកាន់តែតិចបំផុត។ `
អធិការបតីអាល្លឺម៉ង់ អែនជែឡា មឺហ្គែល
ចំណែកលោកស្រីអធិការបតីអាល្លឺម៉ង់ អែនជែឡា មឺហ្គែលក៏បាននិយាយពីបញ្ហាបរិស្ថាន និងបម្រែបម្រួលអាកាសធាតុផងដែរ។ បើតាមលោកស្រីអធិការបតី បញ្ហាបម្រែបម្រួលអាកាសធាតុ គឺជាការគំរាមកំហែងពិតប្រាកដមួយ ហើយអាល្លឺម៉ង់នឹងធ្វើគ្រប់បែបយ៉ាង ដើម្បីធានាថាបញ្ហាមួយនេះ នឹងស្ថិតនៅក្រោមការគ្រប់គ្រងរបស់អាល្លឺម៉ង់។
ប្រធានាធិបតីរុស្ស៊ី វ្ល៉ាឌីមៀ ពូទីន
បើមើលទៅខាងរុស្ស៊ីឯណោះវិញ ប្រធានាធិបតី វ្ល៉ាឌីមៀ ពូទីនបានទទូចឲ្យប្រជាជនរុស្ស៊ី ទាំងអស់រួមសាមគ្គីគ្នា ដើម្បីដោះស្រាយបញ្ហាប្រឈម និងជម្នះគោលដៅដ៏ធំបំផុតសម្រាប់ប្រទេស។ បើតាមប្រធានាធិបតីវ័យ ៦៧ឆ្នាំរូបនេះ សាមគ្គីភាពរបស់រុស្ស៊ី គឺសំខាន់ណាស់ សម្រាប់រុស្ស៊ី ក្នុងការប្រឈមទៅនឹងបញ្ហារបស់ពិភពលោកក្នុងពេលបច្ចប្បន្ន។
ប្រធានាធិបតីចិន ស៊ី ជិនភីង
លោកប្រធានាធិបតីចិន ស៊ី ជិនភីង ក៏បានថ្លែងសារក្នុងឱកាសឆ្នាំថ្មីផងដែរ។ ក្នុងនោះ លោកស៊ី បានសន្យាថា នឹងជម្នះគោលដៅដ៏ធំមួយ ដើម្បីក៏កសាងសង្គមចិនឲ្យមានភាពរុងរឿង។ ជាមួយគ្នានេះ លោកក៏បានអំពាវនាវឲ្យប្រជាជនទាំងអស់រីករាយ ក្នុងឱកាសចូលឆ្នាំថ្មីផងដែរ។
ប្រធានាធិបតីបារាំង អេម៉ានុយអែល ម៉ាក្រុង
បន្ថែមពីនេះ ប្រមុខរដ្ឋបារាំង អេម៉ានុយអែល ម៉ាក្រុង ក៏បានថ្លែងសារផងដែរ ក្នុងឱកាសបុណ្យចូលឆ្នាំថ្មី។ ក្នុងនោះ លោកប្រធានាធិបតីបារាំង សង្ឃឹមថា នឹងមានការសម្របសម្រួលមួយ ជុំវិញបញ្ហាកំណែទម្រង់ការចូលនិវត្តន៍ររបស់ប្រជាជនបារាំងពីអាយុ៦២ឆ្នាំ ដល់ ៦៤ឆ្នាំ។ ការថ្លែងបែបនេះ គឺដើម្បីយកចិត្តក្រុមបាតុករបារាំង ដែលបានធ្វើបាតុកម្មជុំវិញបញ្ហានេះយ៉ាងខ្លាំង។
នាយករដ្ឋមន្ត្រីអង់គ្លេស បូរីស ចនសុន
ក្នុងសារឆ្នាំថ្មីនេះ នាយករដ្ឋមន្ត្រីអង់គ្លេស បូរីស ចនសុន បានលើកឡើងពីបញ្ហា Brexit។ បើតាមលោកនាយករដ្ឋមន្ត្រី ឆ្នាំ ២០២០ គឺជាពេល ដែលអង់គ្លេសត្រូវដើរចេញពីអឺរ៉ុប ហើយបញ្ហាBrexit ត្រូវតែបញ្ចប់នៅចុងខែមករានេះ។ បើតាមលោកនាយករដ្ឋមន្ត្រី កិច្ចការបន្ទាប់របស់លោក គឺការចរចាពាណិជ្ជកម្មជាមួយសហភាពអឺរ៉ុបឲ្យបានមុខដំណាច់ឆ្នាំ ២០២០៕
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 4 ថ្ងៃ
