ប៉ូលិស៖ មនុស្សជាង៣ម៉ឺននាក់ នឹងចូលរួមពិធីរម្លឹកខួបលើក៤១ នៃទិវាជ័យជម្នះ៧មករា

ជាតិ

នយោបាយជាតិ

ប៉ូលិស៖ មនុស្សជាង៣ម៉ឺននាក់ នឹងចូលរួមពិធីរម្លឹកខួបលើក៤១ នៃទិវាជ័យជម្នះ៧មករា

04, Jan 2020 , 8:30 am

រូបភាព

ដោយ: ថ្មីៗ

នាយឧត្តមសេនីយ៍ ទូច ណារ៉ុថ អគ្គស្នងការរងនគរបាលជាតិ និងជាប្រធាននាយកដ្ឋានអង្គរក្ស អះអាងថា មនុស្សជាង៣ម៉ឺននាក់ នឹងចូលរួមពិធីរម្លឹកខួបលើកទី៤១ នៃទិវាជ័យជម្នះ៧មករា ដែលនឹងប្រារព្ធឡើងនៅមុខសាលមហោស្រពកោះពេជ្រ នៅថ្ងៃទី៧ ខែមករា ឆ្នាំ២០២០។ នេះបើតាមការចុះផ្សាយរបស់អគ្គស្នងការនគរបាលជាតិ។

លោក ទូច ណារ៉ុថ បានបើកកិច្ចប្រជុំជាមួយនឹងសាលារាជធានីភ្នំពេញ ស្តីពីសុវត្ថិភាព សន្តិសុខ និងសណ្តាប់ធ្នាប់ ក្នុងការរៀបចំពិធីរម្លឹកខួបលើទី៤១នៃទិវាជ័យជម្នះ៧មករា។ លោក លើកឡើងថា កម្លាំងសមត្ថិកិច្ចចម្រុះ នឹងត្រូវដាក់ពង្រាយនៅតាមទីតាំងជុំវិញកន្លែងប្រារព្ធពិធី ដើម្បីសម្រួលឲ្យពិធីរម្លឹកខួបនេះ ប្រព្រឹត្តទៅដោយរលូន។

ក្នុងកិច្ចប្រជុំនោះ លោក ឃួង ស្រេង អភិបាលរាជធានីភ្នំពេញ បានណែនាំឲ្យអភិបាលខណ្ឌនានា រៀបចំអនាម័យ បរិស្ថាន និងសណ្តាប់ធ្នាប់ជុំវិញទីតាំងប្រារព្ធពិធីរម្លឹកខួបនេះ។ លើសពីនេះ លោក បានណែនាំឲ្យអាជ្ញាធរ និងសមត្ថកិច្ចពាក់ព័ន្ធ យកចិត្តទុកដាក់ខ្ពស់ ដើម្បីការពារសុខសុវត្ថិភាពដល់មហាជនឲ្យបាន១០០ភាគរយ។

សម្តេចនាយករដ្ឋមន្ត្រី ហ៊ុន សែន ប្រធានគណបក្សប្រជាជនកម្ពុជា នឹងធ្វើជាអធិបតីក្នុងពិធីរម្លឹកខួបលើកទី៤១នៃទិវាជ័យជម្នះ៧មករា៕