អន្តរជាតិ
ប្រមុខIMF៖ ជំងឺ COVID-19 មិនប៉ះពាល់ធ្ងន់ធ្ងរដល់សេដ្ឋកិច្ចសកលលោក អ្នកស្រីអគ្គនាយិកាមូលនិធិរូបិយវត្ថុអន្តរជាតិ (រូបភាព៖ Reuters)
× អគ្គនាយិកាមូលនិធិរូបិយវត្ថុអន្តរជាតិ (IMF) អ្នកស្រី Kristalina Georgieva នាថ្ងៃទី១២ ខែកុម្ភៈ បានលើកឡើងថា ជំងឺ COVID-19 ដែលបង្កដោយកូរ៉ូណាវីរុសប្រភេទថ្មី អាចបង្កឲ្យមានផលប៉ះពាល់ដល់សេដ្ឋកិច្ចសកលតែបន្តិចបន្តួចប៉ុណ្ណោះ។ យ៉ាងណាក៏ដោយ លោកស្រីប្រធានអង្គការអន្តរជាតិមួយនេះ ក៏បានទទួលស្គាល់ផងដែរថា ការអះអាងបែបនេះ គឺលឿនពេក ក្នុងការវាយតម្លៃលើផលប៉ះពាល់សេដ្ឋកិច្ចសកលបែបនេះ។
ក្នុងរយៈពេលនេះ ពីជំងឺ COVID-19 បានអុកឡុកនៅចិនយ៉ាងខ្លាំង ដោយបានបង្កឲ្យប្រជាជននៅក្នុងប្រទេសនេះ និងតំបន់ផ្សេងទៀត បានផ្ទុកជំងឺរាប់ម៉ឺននាក់ ខណៈពេលអ្នកស្លាប់បានកើនដល់ជាង ១៣០០នាក់។ ពាក់ព័ន្ធនឹងបញ្ហានេះ មានអ្នកជំនាញសេដ្ឋកិច្ច និងមនុស្សមួយចំនួន បានព្រួយបារម្ភថា ជំងឺ COVID-19 អាចនឹងជះឥទ្ធិពលដល់សេដ្ឋកិច្ចសកល។
ប្រាប់សារព័ត៌មាន CNBC ជុំវិញបញ្ហាប៉ះពាល់សេដ្ឋកិច្ចសកល អគ្គនាយិកាអង្គការមូលនិធិរូបិយវត្ថុអន្តរជាតិ Kristalina Georgieva បានពន្យល់ថា បើទោះបីជាសកម្មភាពសេដ្ឋកិច្ចរបស់ចិន បានធ្លាក់ចុះយ៉ាងគំហុកក៏ដោយ ប៉ុន្តែពេលនេះផលវិបាកទាំងនោះក៏ត្រូវ បានស្តារមកវិញខ្លះៗដែរ ហើយនេះគឺសឲ្យឃើញថា ជំងឺ COVID-19 មិនអាចជះផលវិបាកធ្ងន់ធ្ងរដល់សេដ្ឋកិច្ចសកលនោះទេ។
យ៉ាងណាក៏ដោយ លោកស្រី Kristalina ក៏បានបញ្ជាក់ផងដែរថា ការវាយតម្លៃរបស់ខ្លួននៅពេលនេះ គឺវាលឿនពេក ខណៈពេលសេដ្ឋកិច្ចសកលលោក មិនទាន់រឹងមាំខ្លាំងនៅឡើយ។ បើតាមអ្នកស្រីប្រធានមូលនិធិអន្តរជាតិ ចិននៅពេលនេះ គឺខុសពីមុន ចំណែកពិភពលោកក៏ខុសពីមុនដូចគ្នា ព្រោះនាឆ្នាំ ២០០៣ ក្នុងអំឡុងពេលជំងឺ SARS ផ្ទុះឡើង សេដ្ឋកិច្ចចិនមានកំណើនរហូតដល់ ១៣ភាគរយឯណោះ តែពេលនេះ កំណើនសេដ្ឋកិច្ចមានតែ ៦ភាគរយទេ ចំណែកសេដ្ឋកិច្ចសកលលោកពីមុន ក៏រឹងមាំជាងពេលនេះដែរ។
ក្នុងន័យនេះ អ្នកស្រី ទំនងជាចង់មានន័យថា សេដ្ឋកិច្ចពិភពលោក ក៏អាចរងផលប៉ះខ្លាំងដោយសារជំងឺ COVID-19 នៅពេលខាងមុខដែរ ហើយវានឹងមិនដូចអ្វី ដែលអ្នកស្រីបានរំពឹងទុកនៅពេលនេះទេប្រសិនបើមិនមានវិធានការទប់ស្កាត់ និងការពារវីរុសប្រភេទថ្មីនេះ ឲ្យបានត្រឹមត្រូវ។
សូមបញ្ជាក់ថា ជំងឺ COVID-19 ដែលបានផ្ទុះឡើងនៅចិននាចុងឆ្នាំ ២០១៩ បានបង្កឲ្យរោងចក្រមួយចំនួននៅក្នុងប្រទេស ត្រូវផ្អាកដំណើរការ ហើយពេលនេះរោងចក្រខ្លះ បានបើកឲ្យដំណើរមួយផ្នែកវិញហើយ៕
© រក្សាសិទ្ធិដោយ thmeythmey.com