អន្តរជាតិ
COVID-19៖ ចិនសង្ឃឹមថា អាមេរិកនឹងបញ្ចេញលុយ១០០លានដុល្លារឲ្យបានឆាប់ តាមសន្យា វេជ្ជបណ្ឌិតចិនកំពុងត្រួតពិនិត្យសួតអ្នកជំងឺនៅឯមន្ទីរពេទ្យក្នុងទីក្រុងវូហាន។ រូបភាព Xinhua
× ក្រសួងការបរទេសចិន នៅថ្ងៃទី១៩ ខែកុម្ភៈ បានបង្ហាញក្ដីសង្ឃឹមថា សហរដ្ឋអាមេរិក នឹងឆាប់បញ្ចេញលុយចំនួន១០០លានដុល្លារដែលខ្លួនបានសន្យាដើម្បីចូលរួមក្នុងការប្រយុទ្ធប្រឆាំងជំងឺផ្លូវដង្ហើមបង្កដោយកូរ៉ូណាវីរុស (COVID-19) ។ ទឹកប្រាក់ជំនួយនេះ ត្រូវបានប្រមុខការទូតអាមេរិកបញ្ជាក់ថា អាចផ្ដល់តាមរយៈយន្តការទ្វេភាគី ឬក៏តាមរយៈអង្គការអន្តរជាតិដែលធ្វើការលើការប្រឆាំងវីរុសប្រភេទថ្មីៗដែលផ្ទុះចេញពីទីក្រុងវូហាន ខេត្តហ៊ូប៉ី។
នាសន្និសីទសារព័ត៌មានថ្ងៃទី១៩ ខែកុម្ភៈ លោក Geng Shuang អ្នកនាំពាក្យក្រសួងការបរទេសចិន បានស្នើឲ្យអាមេរិកពន្លឿនការផ្ដល់ជំនួយជាទឹកប្រាក់ចំនួន១០០លានដុល្លារសម្រាប់ចិន និងប្រទេសឯទៀតក្នុងការប្រយុទ្ធប្រឆាំងកូរ៉ូណាវីរុស។ លោក Geng លើកឡើងថា វីរុសគ្មានព្រំដែនឡើយ ហើយចិនស្វាគមន៍រាល់ជំនួយរបស់សហគមន៍អន្តរជាតិ រាប់ទាំងអាមេរិកផងដែរ។
រដ្ឋមន្ត្រីការបរទេសអាមេរិក លោក ម៉ៃ ប៉ុមប៉េអូ បានប្រកាសពីការផ្ដល់ជំនួយទឹកប្រាក់រហូតដល់១០០លានដុល្លារនេះកាលពីថ្ងៃទី៧ ខែកុម្ភៈ ដើម្បីបង្ហាញពីការប្ដេជ្ញាចិត្តរបស់រដ្ឋាភិបាលអាមេរិកក្នុងការឆ្លើយតបនឹងកូរ៉ូណាវីរុស។ បើតាមលោក ប៉ុមប៉េអូ វិស័យឯកជនអាមេរិកវិញ ក៏បានផ្ដល់ជំនួយរាប់រយលានដុល្លាររួចហើយដែរសម្រាប់ការប្រយុទ្ធប្រឆាំងនឹងកូរ៉ូណាវីរុសប្រភេទថ្មីដែលបង្កទៅជាជំងឺរលាកសួតធ្ងន់ធ្ងរមួយនេះ។
លើសពីនោះ អាមេរិកក៏បានបញ្ជូនសម្ភារៈវេជ្ជសាស្ត្រដូចជាម៉ាស់ សម្លៀកបំពាក់សុវត្ថិភាពជាដើមទៅចិនដែលមានទំហំជិត២០តោនរួចហើយដែរ។ មន្ត្រីក្រសួងការបរទេសចិនដដែលបញ្ជាក់ថា អាមេរិកពិតជាបានផ្ដល់ជំនួយសម្ភារចាំបាច់ទៅឲ្យខេត្តហ៊ូប៉ី នៅតែឡើយតែលុយជំនួយប៉ុណ្ណោះ។
«យើងសង្ឃឹមថា ទឹកប្រាក់ជំនួយដល់ទៅ១០០លានដុល្លារដែលក្រសួងការបរទេសអាមេរិកប្រកាសផ្ដល់ឲ្យចិន និងប្រទេសផ្សេងទៀត នឹងលេចជារូបរាងនៅពេលឆាប់ៗដើម្បីជួយប្រយុទ្ធប្រឆាំងនឹងជំងឺផ្លូវដង្ហើម។» នេះជាសម្ដីលោក Geng តបនឹងនឹងសំណួររបស់អ្នកសារព័ត៌មានពាក់ព័ន្ធជំនួយរបស់អាមេរិក។
សូមបញ្ជាក់ថា អ្នកស្លាប់ដោយសារជំងឺរលាកសួតបង្កដោយមេរោគកូរ៉ូណាប្រភេទថ្មី (COVID-19) ឡើងដល់២១២៩នាក់ ហើយចំនួនតួលេខអ្នកជំងឺកើនឡើងដល់ជិត៧៦ ០០០នាក់ នៅប្រទេសចំនួន២៧។ ករណីស្លាប់ចុងក្រោយ គឺនៅកូរ៉េខាងត្បូង ជប៉ុន និងអ៊ីរ៉ង់ បន្ថែមពីលើករណីស្លាប់នៅហ្វីលីពីន និងបារាំង៕
Tag:
ចិន
COVID-19
អាមេរិក
© រក្សាសិទ្ធិដោយ thmeythmey.com