អន្តរជាតិ
ករណីឆ្លង COVID-19 នៅកូរ៉េខាងត្បូង កើនលើស១០០០នាក់ ក្នុងនោះស្លាប់១២នាក់
× កូរ៉េខាងត្បូង នៅថ្ងៃទី២៦ ខែកុម្ភៈ បានរាយការណ៍ពីករណីឆ្លងមេរោគកូរ៉ូណាប្រភេទថ្មីចំនួន១៦៩នាក់ ដែលនាំឲ្យចំនួនករណីឆ្លងសរុបនៅប្រទេសនេះឡើងដល់១១៤៦នាក់។ ចំនួនអ្នកស្លាប់ឡើងដល់១២នាក់ ដោយករណីចុងក្រោយជាបុរសវ័យ៧៣ឆ្នាំម្នាក់នៅ Daegu។
៨០ភាគរយនៃករណីឆ្លងទាំងអស់នៅកូរ៉េខាងត្បូង កើតនៅទីក្រុង Daegu និង Cheongdo ដែលនៅក្បែរខាង។ វិហារសាសនាគ្រិស្តនៅ Daegu និងមន្ទីរពេទ្យនៅ Cheongdo ជាទីចម្លងវីរុសប្រភេទថ្មីខ្លាំងជាងគេនៅកូរ៉េខាងត្បូង។
ក្នុងចំណោមករណីឆ្លង១៦៩ដែលរាយការណ៍ថ្មីៗ មានករណីឆ្លង១៥៣នាក់ កើតនៅទីក្រុងទាំងពីរនេះទៀត។ នេះបើតាមការផ្សាយរបស់ទីភ្នាក់ងារព័ត៌មាន Yonhap ។ បើតាមមជ្ឈមណ្ឌលទប់ស្កាត់ និងគ្រប់គ្រងជំងឺឆ្លងកូរ៉េ ខេត្ត និងទីក្រុងធំៗរបស់កូរ៉េខាងត្បូងស្ទើរទាំងអស់ សុទ្ធតែបានរាយការណ៍ពីករណីឆ្លង ខណៈរដ្ឋធានីសេអ៊ូលមានបួនករណីថែមទៀត។ ប៊ូសាន ដែលជាទីក្រុងធំទីរបស់កូរ៉េខាងត្បូង មានករណីឆ្លង៨ ឯខេត្ត Gyeonggi មានមួយករណីដែរ។
កូរ៉េខាងត្បូង បានរាយការណ៍ពីករណីឆ្លងជំងឺផ្លូវដង្ហើមដែលបង្កដោយកូរ៉ូណាវីរុសប្រភេទថ្មី (COVID-19) កាលពីចុងខែមករាកន្លងទៅ។ នៅថ្ងៃទី២៣ ខែកុម្ភៈ រដ្ឋាភិបាលកូរ៉េខាងត្បូង បានប្រកាសកម្រិតអាសន្នខ្ពស់បំផុតដើម្បីឆ្លើយតបនឹងការរាលដាលយ៉ាងរហ័សរបស់មេរោគ។ ទីក្រុង Daegu គឺជាគោលដៅរបស់កូរ៉េខាងត្បូងក្នុងការបិទផ្លូវរាលដាលថែមទៀត។
ចំនួនករណណីឆ្លង រំពឹងថា នឹងបន្តកើនឡើងថែមទៀត ខណៈអាជ្ញាធរត្រៀមធ្វើតេស្តលើសមាជិកវិហារ Shincheonji ចំនួនជាង២១ម៉ឺននាក់ដើម្បីរកកូរ៉ូណាវីរុស។ វិហារនេះ ជាទីកន្លែងចម្លងដ៏ធំមួយទៅកាន់តំបន់ផ្សេងៗ៕
Tag:
កូរ៉េខាងត្បូង
COVID19
© រក្សាសិទ្ធិដោយ thmeythmey.com