COVID-19
អន្តរជាតិ
ម៉ុងហ្គោលី បិទរដ្ឋធានីនិងខេត្តមួយចំនួន បន្ទាប់ពីរកឃើញករណី COVID-19 ដំបូង ឧបនាយករដ្ឋមន្រ្តីម៉ុងហ្គោលី លោក Enkhtuvshin Ulziisaikhan។ រូបភាព៖ montsame
× បន្ទាប់ពីរកឃើញCOVID-19 ដំបូងនៅក្នុងប្រទេស រដ្ឋាភិបាលម៉ុងហ្គោលី នាថ្ងៃទី១០ ខែមីនា បានចេញចំណាត់ការបិទរដ្ឋធានីភ្លាមៗ ដើម្បីទប់ស្កាត់ករណីឆ្លងនៅក្នុងប្រទេស។ ចំណាត់ការនេះធ្វើឡើង បើទោះបីជាស្ថានភាពនៅម៉ុងហ្គោលី មិនយ៉ាប់យ៉ឺនដូចនៅចិន អ៊ីតាលី និងប្រទេសដទៃទៀត។
ចាប់តាំងពីផ្ទុះCOVID-19 ម៉ុងហ្គោលី បានបិទព្រំដែនរបស់ខ្លួនជាមួយចិន បិទជើងហោះហើរជាមួយកូរ៉េខាងត្បូង ដើម្បីទប់ស្កាត់ការរីកសាយភាយមកក្នុងប្រទេស។ ប៉ុន្តែនៅថ្ងៃទី១០ ខែមីនា ក្រសួងសុខាភិបាលម៉ុងហ្គោលី បានរកឃើញអ្នកជំងឺផ្ទុក COVID-19 លើកដំបូងបំផុតនៅក្នុងប្រទេស។ ករណីដំបូងនេះ គឺជាជនជាតិបារាំង ដែលមកពីទីក្រុងមូស្គូ នាថ្ងៃទី២ ខែមីនា។
ពាក់ព័ន្ធនឹងបញ្ហានេះ ឧបនាយករដ្ឋមន្ត្រីម៉ុងហ្គោលី លោក Enkhtuvshin Ulziisaikhan បានលើកឡើងនៅក្នុងសន្និសីទសារព័ត៌មានយ៉ាងដូច្នេះថា៖ «រដ្ឋធានីអ៊ូឡង់បាទ័រ និងខេត្តទាំងអស់ នៅភាគកណ្តាល ត្រូវបិទរហូតដល់ថ្ងៃទី១៦ ខែមីនា ដើម្បីទប់ស្កាត់ករណីផ្ទុះCOVID-19»។ ក្នុងន័យនេះ ការចាកចេញ ឬចូលរដ្ឋធានី ក្រុងក្នុងខេត្តមួយចំនួន ត្រូវបានហាមឃាត់។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។
ម៉ុងហ្គោលី គឺជាប្រទេសចុងក្រោយមួយ បន្ទាប់ពីចិនបានបិទទីក្រុង និងអ៊ីតាលីរឹតត្បិតការធ្វើដំណើរនៅក្នុងប្រទេសទាំងមូល។
សូមបញ្ជាក់ថា គិតត្រឹមព្រឹកថ្ងៃទី១០ ខែមីនា COVID-19 បានកើនរហូតដល់ជាង ១១ម៉ឺនករណីនៅទូទាំងពិភពលោក។ ក្នុងចំនួនដ៏ច្រើនបែបនេះ ករណីស្លាប់មានជាង ៤ពាន់ករណី និងជាសះស្បើយមានជាង ៦៣០០០ករណី។ បើតាមសារព័ត៌មាន BNO Tracking Coronavirus ករណីឆ្លងថ្មីភាគច្រើនកើតមាននៅតំបន់អឺរ៉ុបដូចជា អ៊ីតាលី បារាំង អេស្ប៉ាញ អាល្លឺម៉ង់ជាដើម ខណៈពេលចិន បានធ្លាក់ចុះករណីឆ្លងនៅក្នុងស្រុកគួរឲ្យកត់សម្គាល់៕
Tag:
ម៉ុងហ្គោលី
COVID-19
© រក្សាសិទ្ធិដោយ thmeythmey.com