COVID-19
អន្តរជាតិ
ភរិយានាយករដ្ឋមន្ត្រីកាណាដា ឆ្លង COVID-19 អ្នកស្រី Sophie Gregoire Trudeau និងលោក Justin Trudeau នាកិច្ចប្រជុំ G7 នៅកេប៊ិច កាលពីឆ្នាំ២០១៨។ រូបថត AFP
× ស្ត្រីទីមួយរបស់កាណាដា អ្នកស្រី Sophie Gregoire Trudeau បានធ្វើតេស្តវិជ្ជមានសម្រាប់ COVID-19 ។ ការិយាល័យនាយករដ្ឋមន្ត្រីកាណាដា បញ្ជាក់បែបនេះ នៅថ្ងៃសុក្រ ១៣ មីនា ដែលដកស្រង់ចុះផ្សាយដោយទីភ្នាក់ងារ AFP ។
«តាមអនុសាសន៍វេជ្ជសាស្ត្រ អ្នកស្រី Sophie Grégoire Trudeau បានធ្វើតេស្តរក COVID-19 នៅថ្ងៃនេះ។ លទ្ធផលតេស្ត បានបង្ហាញថា វិជ្ជមាន»។ ការិយាល័យនាយករដ្ឋមន្ត្រីកាណាដា បញ្ជាក់ក្នុងសេចក្តីថ្លែងការណ៍បែបនេះ ដោយបន្ថែមថា អ្នកស្រី នឹងត្រូវនៅដាច់ដោយឡែកមួយរយៈ ហើយបច្ចុប្បន្នសុខភាពមានភាពល្អប្រសើរ។
គួរបញ្ជាក់ផងដែរថា លោកនាយយករដ្ឋមន្ត្រី Justin Trudeau កំពុងដាក់ខ្លួនឯងនៅដាច់ដោយឡែក ក្រោយពីភរិយាលោក ផ្ដើមមានរោគសញ្ញាស្រដៀងផ្ដាសាយ ពោលគឺបន្ទាប់ពីត្រលប់មកពីកម្មវិធីមួយក្នុងចក្រភពអង់គ្លេស។
បើតាមទូរទស្សន៍ក្នុងស្រុកកាណាដា CTV News កូនៗរបស់ប្តីប្រពន្ធមួយគូនេះ ពុំមានបង្ហាញរោគសញ្ញាជំងឺអ្វីគួរឲ្យកត់សម្គាល់ឡើយ ហើយពួកគេពុំត្រូវបានដាក់ឲ្យនៅដាច់ដោយឡែកផងដែរ។ ទន្ទឹមនេះ ឧបនាយករដ្ឋមន្ត្រីកាណាដា អ្នកស្រី Chrystia Freeland អះអាងថា លោកនាយករដ្ឋមន្ត្រី Trudeau មានសុខភាពល្អប្រសើរ ហើយលោកបាននិយាយទូរសព្ទជាមួយមេដឹកនាំនៃក្រុមប្រទេស G7 យ៉ាងតិច៣នាក់ ពាក់ព័ន្ធនឹងស្ថានភាព COVID-19 ។
ទោះពុំមានចេញរោគសញ្ញាអ្វី លោក Trudeau នឹងដាក់ខ្លួនឯងឲ្យដាច់ដោយឡែក ១៤ ថ្ងៃ។ យ៉ាងណាមិញ លោកពុំទាន់ធ្វើតេស្តរក COVID-19 នៅឡើយទេ ហើយលោកនឹងបន្តអនុវត្តកាតព្វកិច្ចលោកតាមធម្មតា៕
© រក្សាសិទ្ធិដោយ thmeythmey.com