COVID-19
ជាតិ
COVID-19៖ ក្រសួងបន្តស្រាវជ្រាវអ្នកប៉ះពាល់ផ្ទាល់ និងប្រយោលជាមួយបុរសកាណាដា និងបែលហ្ស៊ិក លោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល។ រូបថត thmeythmey
× លោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល បានអះអាងថា អាជ្ញាធរជំនាញកំពុងបន្តស្រាវជ្រាវបុគ្គលដែលបានប៉ះពាល់ផ្ទាល់ និងដោយប្រយោលជាមួយបុរសជនជាតិកាណាដា និងបែលហ្ស៊ិក ដែលត្រូវបានតេស្តឃើញវិជ្ជមាន COVID-19 នៅភ្នំពេញកាលពីថ្ងៃទី១៣ ខែមីនា ឆ្នាំ២០២០។
អ្នកនាំពាក្យសុខាភិបាល បានអះអាងប្រាប់អ្នកសារព័ត៌មានតាមបណ្តាញសង្គម Telegram ថា បុរសកាណាដា អាយុ៤៩ឆ្នាំ ជាគ្រូបង្រៀននៅសាលាឯកជន Canadian International School of Phnom Penh (CIS) សាខាកោះពេជ្យ រីឯបុរសបែលហ្ស៊ិក អាយុ៣៣ឆ្នាំ ជាបុគ្គលិកអង្គការអន្តរជាតិមួយ។
បើតាមការបញ្ជាក់របស់លោកស្រី ឱ វណ្ណឌីន និងការអះអាងរបស់សាលា CIS ផ្ទាល់ អ្នកជំងឺកាណាដា មានប្រវត្តិធ្វើដំណើរពីប្រទេសថៃ ហើយមិនបានធ្វើដំណើរទៅកាន់ទីតាំងណាមួយរបស់សាលា ចាប់តាំងពីថ្ងៃទី៦ ខែមីនា មក។ ក្រៅពីការប្រកាសផ្អាកដំណើរការតាមតម្រូវការក្រសួងអប់រំ យុវជន និងកីឡា CIS បានតម្រូវឲ្យបុគ្គលិករបស់ខ្លួន ជាពិសេសអ្នកដែលទើបធ្វើដំណើរពីបរទេស ស្នាក់នៅផ្ទះរយៈពេល១៤ថ្ងៃ ក្រោយវិលមកភ្នំពេញវិញ ហើយបន្តតាមដានសុខភាព។
លោកស្រី ឱ វណ្ណឌីន បានបញ្ជាក់ថា បុរសជនជាតិកាណាដា នោះ បានស្នើសុំព្យាបាលដាច់ដោយឡែកនៅផ្ទះរបស់ខ្លួន។ ក្រោយការពិនិត្យល្អិនល្អន់ និងទីតាំងដែលនៅឆ្ងាយពីគេ ក្រសួងបានស្នើធ្វើតាមការស្នើសុំ រីឯកូនពីរនាក់ដែលស្ថិតក្រោមបន្ទុករបស់គាត់ ក៏ត្រូវបានយកសំណាកទៅពិនិត្យនៅវិទ្យាស្ថានប៉ាស្ទ័រ កម្ពុជាផងដែរ។ លទ្ធផលនាវេាលម៉ោង១២ និង៣០នាទីថ្ងៃទី១៤ ខែមីនានេះ បង្ហាញថា កូនទាំងពីរនាក់នោះ មានលទ្ធផលតេស្តអវិជ្ជមាន។
ចំណែកឯ បុរសជនជាតិបែលហ្ស៊ិក អាយុ៣៣ឆ្នាំ ជាបុគ្គលិកអង្គការអន្តរជាតិមួយ ដែលមានប្រវត្តិទើបត្រឡប់មកពីតំបន់អឺរ៉ុប។ អ្នកនាំពាក្យមិនបានបញ្ជាក់លម្អិតពីព័ត៌មានអ្នកជំងឺនោះឡើយ ដោយផ្អែកលើគោលការណ៍គោរពឯកជនភាព។ បច្ចុប្បន្ន បុរសនោះ សម្រាកព្យាបាលដាច់ដោយឡែកនៅមន្ទីរពេទ្យមិត្តភាពខ្មែរសូវៀត។
ក្រសួង និងស្ថាប័នពាក់ព័ន្ធ បន្តស្វែងរកអ្នកប៉ះពាល់ផ្ទាល់ និងដោយប្រយោលជាមួយករណីពីរចុងក្រោយនៅកម្ពុជា។
គួរបញ្ជាក់ថា កម្ពុជាមានករណីឆ្លង COVID-19 ចំនួន៧ហើយ ដោយករណីដំបូងជាជនជាតិចិនអាយុ៦០ឆ្នាំនៅក្រុងព្រះសីហនុ ដែលបានជាសះស្បើយ។ ករណីទីពីរជាបុរសខ្មែរអាយុ៣៨ឆ្នាំនៅខេត្តសៀមរាប បានឆ្លងពីជនជាតិជប៉ុនម្នាក់។ បីករណីកើតលើជនជាតិអង់គ្លេស ក្នុងនោះស្ត្រី១នាក់ និងប្តីប្រពន្ធ១គូ ដែលរកឃើញលើនាវាទេសចរណ៍ Viking Cruise Journey ដែលមកពីក្រុងហូជីមិញ ហើយសំចតនៅខេត្តកំពង់ចាម។ បច្ចុប្បន្នអ្នកជំងឺទាំងបីសម្រាកព្យាបាលនៅភ្នំពេញ។ ពីរករណីចុងក្រោយ បានរកឃើញលើបុរសកាណាដា និងបែលហ្ស៊ិក ម្នាក់ នៅរាជធានីភ្នំពេញ៕
© រក្សាសិទ្ធិដោយ thmeythmey.com