ពេទ្យអ៊ីតាលី១៣នាក់ស្លាប់ និងជាង២៦០០នាក់ឆ្លង ក្នុងបេសកកម្មសង្គ្រោះជីវិតពី COVID-19

COVID-19

អន្តរជាតិ

ពេទ្យអ៊ីតាលី១៣នាក់ស្លាប់ និងជាង២៦០០នាក់ឆ្លង ក្នុងបេសកកម្មសង្គ្រោះជីវិតពី COVID-19

20, Mar 2020 , 5:01 pm

រូបភាព

ដោយ:

គិតត្រឹមថ្ងៃ២០ ខែមីនា គ្រូពេទ្យអ៊ីតាលីសរុបចំនួន ១៣នាក់ បានបាត់បង់ជីវិតដោយសារជំងឺផ្លូវដង្ហើម COVID-19 ។ យ៉ាងតិចណាស់បុគ្គលិកសុខាភិបាលចំនួន ២៦២៩នាក់ បានឆ្លងវីរុស ដែលផ្ទុះឡើងដំបូងក្នុងប្រទេសចិននេះ។

ក្នុងចំណោមគ្រូពេទ្យទាំង១៣នាក់ គ្រូពេទ្យអ៊ីតាលីម្នាក់ដែលបានស្លាប់ ឈ្មោះថា Marcello Natali ធ្លាប់បានប្រាប់សារព័ត៌មាន Euronews ថា លោកបានធ្វើការប្រចាំថ្ងៃដោយគ្មានស្រោមដៃការពារ ដ្បិតថាមន្ទីរពេទ្យលោកខ្វះខាតសម្ភារសុខភាព។

យោងតាមសេចក្តីប្រកាសព័ត៌មានរបស់មូលនិធិសុខភាពមួយឈ្មោះ Gimbe Health Foundation បុគ្គលិកសុខាភិបាលទាំងអស់ដែលបានឆ្លង COVID-19 គឺស្មើនឹង ៨,៣ភាគរយនៃករណីឆ្លងសរុបរបស់ប្រទេសអ៊ីតាលី។

ម្យ៉ាងវិញទៀត វាមានការលើកឡើងពីកង្វល់កាន់តែច្រើនពាក់ព័ន្ធសុវត្ថិភាពរបស់បុគ្គលិកសុខាភិបាលជួរមុខដែលតម្រូវឲ្យប៉ះពាល់ផ្ទាល់ជាមួយអ្នកជំងឺ COVID-19។ តាមការចុះផ្សាយរបស់ទីភ្នាក់ងារព័ត៌មាន AP មូលនិធិសុខភាពដដែល សង្កត់ធ្ងន់ថា តួលេខឆ្លងដ៏ច្រើនសន្ធឹកបែបនេះលើបុគ្គលិកសុខាភិបាល ឆ្លុះបង្ហាញថា សម្ភារការពារ និងនីតិវិធីសម្រាប់គ្រូពេទ្យ គឺនៅមិនទាន់គ្រប់គ្រាន់។

ប្រាប់ប្រព័ន្ធផ្សព្វផ្សាយអ៊ីតាលីមួយ ប្រធានមូលនិធិសុខភាព Gimbe លោក Nino Cartabellotta អះអាងថា បញ្ហានេះ គឺអាក្រក់ខ្លាំងជាងក្នុងប្រទេសចិនទៅទៀត ខណៈភាគរយនៃបុគ្គលិកសុខាភិបាលអ៊ីតាលីមានចំនួន២ដង បើធៀបនឹងប្រទេសចិន។

អត្ថបទទាក់ទង

អ្នកស្លាប់ដោយសារ COVID-19 នៅអ៊ីតាលី កើនលើសប្រទេសចិនហើយ

យោងតាមតួលេខផ្លូវការរបស់រដ្ឋាភិបាលអ៊ីតាលី ចំនួនបុគ្គលិកសុខាភិបាលដែលឆ្លង COVID-19 បានកើនឡើងជាង១៥០០នាក់ ក្នុងពេលត្រឹម៨ថ្ងៃចុងក្រោយនេះ។ របាយការណ៍នេះដែរ បានចេញផ្សាយក្រោយអ្នកស្លាប់នៅប្រទេសអ៊ីតាលីដោយសារ COVID-19 បានកើនលើសប្រទេសចិន ជាមួយតួលេខសរុប ៣៤០៥នាក់ ខណៈចិន មាន៣២៤៥នាក់៕