COVID-19
អន្តរជាតិ
អ្នកស្លាប់ដោយសារ COVID-19 នៅថៃមានបីនាក់ទៀត, ករណីស្លាប់សរុបឡើងដល់៤នាក់
× ប្រទេស ថៃ បានរាយការណ៍ករណីស្លាប់ដោយសារជំងឺផ្លូវដង្ហើម COVID-19 ៣នាក់បន្ថែមទៀត នៅថ្ងៃអង្គារ ២៤ ខែមីនា។ ទីភ្នាក់ងារព័ត៌មាន Reuters ចុះផ្សាយបែបនេះដោយស្រង់ប្រភពពីអាជ្ញាធរសុខាភិបាលថៃ។ បូកនឹងតួលេខថ្មីនេះ អ្នកស្លាប់ដោយសារ COVID-19 នៅប្រទេសនេះ បានឡើងដល់ ៤នាក់ហើយ។
អ្នកស្លាប់ទាំងបីនាក់ គឺសុទ្ធតែជាអ្នកជំងឺដែលមានជំងឺប្រចាំកាយស្រាប់។ បុរសអាយុ ៧០ឆ្នាំ មានជំងឺរបេង, បុរសអាយុ៤៥ឆ្នាំ មានជំងឺទឹកនោមផ្អែម និងបុរសអាយុ ៧៩ឆ្នាំម្នាក់ទៀត មានបញ្ហាសុខភាពរ៉ាំរ៉ៃ។ អ្នកនាំពាក្យក្រសួងសុខភាពសាធារណៈថៃ Taweesin Wisanuyothin លើកឡើងបែបនេះ ។
ទន្ទឹមនឹងរាយការណ៍ពីករណីស្លាប់៣នាក់ថ្មី អាជ្ញាធរសុខាភិបាលថៃ ក៏បានប្រកាសករណីឆ្លង COVID-19 ថ្មីចំនួន ១០៦នាក់ ដែលធ្វើឲ្យតួលេខឆ្លងសរុបឡើងដល់ ៨២៧ករណីហើយ។ ចំណែកករណីជាសះស្បើយសរុប មាន៥២នាក់។
តាមប្រភពព័ត៌មានដដែល គណៈរដ្ឋមន្ត្រីថៃ នឹងជួបជជែកពិភាក្សាចំណាត់ការបន្ថែមទៀតដើម្បីទប់ទល់នឹងវិបត្តិCOVID-19នេះ នារសៀលថ្ងៃអង្គារនេះ៕
© រក្សាសិទ្ធិដោយ thmeythmey.com