COVID-19
អន្តរជាតិ
ប្រជាជនកូរ៉េខាងត្បូង នាំគ្នាទៅបោះឆ្នោតសភាមុនកំណត់ ប្រធានាធិបតីមូន ចេអ៊ីន មកបោះឆ្នោតជ្រើសរើសសមាជិកសភា។ រូបភាព៖ Yonhap
× កូរ៉េខាងត្បូង នាថ្ងៃទី១០ ខែមេសា បានបើកមណ្ឌលបោះឆ្នោត ដើម្បីឲ្យប្រជាពលរដ្ឋរបស់ខ្លួនមកបោះឆ្នោតជ្រើសរើសសមាជិកសភាថ្មី។ ការបើកមណ្ឌលបោះឆ្នោត មុនថ្ងៃកំណត់ក្នុងពេលនេះ គឺដើម្បីកាត់បន្ថយចំនួនអ្នកបោះឆ្នោតកុំឲ្យមានអត្រាច្រើនពេក និងកាត់បន្ថយ ក៏ដូចជាបង្ការករណីឆ្លងនៃជំងឺរលាកសួត ដែលបង្កដោយកូរ៉ូណាវីរុស (COVID-19) នៅថ្ងៃបោះឆ្នោតផ្លូវការ។ បន្ថែមពីលើនេះ គណៈកម្មាធិការរៀបចំការបោះឆ្នោតកូរ៉េខាងត្បូង ក៏បានបង្កើតមណ្ឌលបោះឆ្នោតសម្រាប់អ្នកជំងឺ COVID-19 ផងដែរ ។
ថ្ងៃទី១៥ ខែមេសា គឺជាថ្ងៃកំណត់ផ្លូវការសម្រាប់ការបោះឆ្នោតសភារបស់កូរ៉េខាងត្បូង។ ប៉ុន្តែដើម្បីកាត់បន្ថយចំនួនអ្នកបោះឆ្នោត កុំឲ្យមានសភាពណែនណាន់ខ្នាន់ខ្នាប់ គណៈកម្មាធិ
ការរៀបចំការបោះឆ្នោត បានសម្រេចបើកមណ្ឌលបោះឆ្នោតឲ្យប្រជាពលរដ្ឋមកបោះឆ្នោតរយៈពេលពីរថ្ងៃ ពោលគឺចាប់ពីថ្ងៃទី១០ ដល់ថ្ងៃទី១១ ខែមេសា មុនថ្ងៃកំណត់ផ្លូវការមកដល់។
ទន្ទឹមគ្នានេះ គណៈកម្មាធិការនេះ ក៏បានបើកមណ្ឌលបោះឆ្នោតចំនួន ៨ សម្រាប់អ្នកជំងឺជាង ៣០០០នាក់ ដោយមានបុគ្គលិកវេជ្ជសាស្ត្រ ៩០០នាក់ចាំពិនិត្យ។ មណ្ឌលបោះឆ្នោតសម្រាប់អ្នកជំងឺនេះ ក៏មាននៅទីក្រុង Daegu និងទីក្រុង Seoul ផងដែរ។
បន្ថែមពីលើនេះ មណ្ឌលប្រមាណជា៣៥០០កន្លែង នឹងដាក់ឲ្យប្រជាជនមកបោះឆ្នោត ដោយឈរឃ្លាតពីគ្នា ១ម៉ែត្រ។ អ្នកមកបោះឆ្នោត ត្រូវពាក់ម៉ាស់ ពាក់ស្រោមដៃ លាងដៃជាមួយទឹកអាគុល និងវាស់កម្តៅជាដើម។ ការធ្វើបែបនេះ គឺដើម្បីបង្ការ COVID-19 នៅក្នុងអំឡុងពេលនេះ។ បន្ថែមពីលើនេះ គ្រប់មណ្ឌលបោះឆ្នោតទាំងអស់ ក៏ត្រូវបានអាជ្ញាធរបានបាញ់ថ្នាំសម្លាប់មេរោគ និងវីរុសផងដែរ។
ប្រធានាធិបតីកូរ៉េខាងត្បូង មូន ចេអ៊ីន បានបោះឆ្នោតរួចហើយនាមណ្ឌលមួយកន្លែង ក្បែរវិមានប្រធានាធិបតី។ សម្រាប់បុគ្គល ដែលកំពុងតែដាក់ចត្តាឡីស័ក គណៈកម្មាធិការរៀបចំការបោះឆ្នោត កំពុងសិក្សាបន្ថែមទៀត ដើម្បីអាចឲ្យអ្នកទាំងនោះមានសិទ្ធិបោះឆ្នោតដូចប្រជាជនធម្មតាផងដែរ។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។
ការបោះឆ្នោតសភាជាតិលើកនេះ គឺដើម្បីជ្រើសរើសអ្នកតំណាងរាស្ត្រចំនួន ៣០០កៅអី។ បើតាមអ្នកសង្កេតការបោះឆ្នោត គិតត្រឹមម៉ោង១រសៀលថ្ងៃទី១០ ខែមេសា ប្រជាពលរដ្ឋប្រមាណជា ៥,៩៨ភាគរយ បានមកបោះឆ្នោត។
សូមបញ្ជាក់ថា គិតមកទល់ពេលនេះ កូរ៉េខាងត្បូងមានករណី COVID-19 សរុបចំនួន ១០៤៥០ករណី អ្នកស្លាប់ ២០៨ករណី និងអ្នកជាសះស្បើយមានចំនួន ៧១១៧ករណី។ មួយរយៈចុងក្រោយនេះ តួលេខឆ្លងនៅកូរ៉េខាងត្បូង គឺមានការថមថយយ៉ាងខ្លាំង។ គ្រាន់តែថ្ងៃទី១០ ខែមេសានេះ ទីក្រុង Daegu ដែលជាកន្លែងផ្ទុះ COVID-19 របស់កូរ៉េខាងត្បូង ក៏មិនមានករណីឆ្លងផងដែរ ៕
Tag:
កូរ៉េខាងត្បូង
COVID-19
© រក្សាសិទ្ធិដោយ thmeythmey.com