ជាតិ
សង្គមជាតិ
រដូវវស្សាឆ្នាំនេះចាប់ផ្តើមលឿនជាងឆ្នាំមុន ហើយផ្គរ រន្ទះ ខ្យល់កន្ត្រាក់អាចមានច្រើន ក្នុងខែឧសភា និងមិថុនា
×![]()
ក្រសួងធនធានទឹក និងឧតុនិយម បានជូនដំណឹងថា រដូវវស្សានៅក្នុងឆ្នាំ២០២០ អាចនឹងចូលមកដល់លឿនជាងឆ្នាំ២០១៩ ជាមួយនឹងបរិមាណទឹកភ្លៀងពីមធ្យមទៅបង្គួរ។ ជាប្រក្រតីរដូវវស្សា តែងចាប់ផ្តើមនៅពាក់កណ្តាលខែឧសភា។ ទន្ទឹមនឹងនេះ នៅក្នុងខែឧសភា និងមិថុនា អាចកើតមានបាតុភូតផ្គរ រន្ទះ និងខ្យល់កន្ត្រាក់ច្រើន។ ដោយឡែកនៅក្នុងខែសីហា និងខែកញ្ញា ភ្លៀងនឹងអាចធ្លាក់រាយប៉ាយបានល្អលើផ្ទៃប្រទេស ជាមួយនឹងបរិមាណទឹកភ្លៀងពីមធ្យម ទៅច្រើន។ តែខេត្តមួយចំនួននៅទីទំនាបជាប់ ឬក្បែរតំបន់ជួរភ្នំ តំបន់ខ្ពង់រាប និងតំបន់ជាប់នឹងផ្លូវទឺក អាចប្រឈមខ្ពស់នឹងជំនន់ទឹកភ្លៀងផងដែរ។
ក្រសួងធនធានទឹក និងឧតុនិយម បានបញ្ជាក់ថា ចាប់ពីខែមេសា រហូតដល់ខែតុលាឆ្នាំ២០២០ បាតុភូតធម្មជាតិដែលមានឥទ្ធិពលមកលើអាកាសធាតុកម្ពុជា មានបាតុភូត Neural ចំនួន៦០ភាគរយ បាតុភូត El Nino ១០ភាគរយ និងបាតុភូត La Nina ៣០ភាគរយ នៅក្នុងខែឧសភា។ នេះបើតាមសេចក្តីជូនដំណឹង ស្តីពីការព្យាករអាកាសធាតុលើកទី២ សម្រាប់ឆ្នាំ២០២០ របស់ក្រសួងធនធានទឹក និងឧតុនិយម ចេញផ្សាយនៅថ្ងៃទី១៤ ខែមេសានេះ។
ក្រសួងធនធានទឹក បញ្ជាក់ទៀតថា រដូវវស្សាឆ្នាំ២០២០នេះ នឹងចូលមកដល់លឿនជាងឆ្នាំមុន ដែលជាទូទៅតែងចាប់ផ្តើមនៅពាក់កណ្តាលខែឧសភា ជាមួយនឹងបរិមាណទឹកភ្លៀងពីមធ្យម ទៅបង្គួរដែលស្មើ ឬលើមធ្យមភាគច្រើនឆ្នាំ។ ចំណែកបាតុភូត ផ្គរ រន្ទះ និងខ្យល់កន្ត្រាក់ នឹងអាចបន្តកើតមានច្រើននៅក្នុងខែឧសភា និងខែមិថុនា។ នេះបើតាមធនធានទឹក។
នៅក្នុងខែសីហា និងខែកញ្ញា ភ្លៀងនឹងអាចធ្លាក់រាយប៉ាយបានល្អ លើផ្ទៃប្រទេស ជាមួយនឹងបរិមាណទឹកភ្លៀងពីមធ្យម ទៅច្រើន។ ក្នុងនោះខេត្តមួយចំនួននៅទីទំនាបជាប់ ឬក្បែរតំបន់ជួរភ្នំ តំបន់ខ្ពង់រាប និងតំបន់ជាប់នឹងផ្លូវទឹក អាចប្រឈមខ្ពស់នឹងជំនន់ទឹកភ្លៀងផងដែរ។ នេះបើតាមក្រសួងធនធានទឹកដដែល ដោយបន្តបញ្ជាក់ថា រដូវវស្សា អាចបញ្ចប់នៅក្នុងសប្តាហ៍ទី ២នៃខែវិច្ឆិកា ជាមួយនឹងបរិមាណទឹកភ្លៀងពីតិច ទៅបង្គួរ។
ក្រសួងធនធានទឹក បញ្ជាក់ទៀតថា កូនរដូវប្រាំង អាចនឹងកើតមាននៅក្នុងសប្តាហ៍ទី២ នៃខែកក្កដា រហូតដល់ដំណាច់ខែកក្កដា ឆ្នាំ២០២០។ ខណៈក្នុងឆ្នាំ២០២០នេះ កម្ពុជាអាចនឹងមានព្យុះកើតឡើងពី២៤-២៦ ក្នុងនោះ នៅក្នុងមហាសមុទ្ឬប៉ាស៊ីហ្វិក និងពី៤-5 ព្យុះ ដែលកើតផ្ទាល់នៅក្នុងសមុទ្រចិនខាងត្បូង៕
Tag:
អាកាសធាតុ
រដូវប្រាំង
បាតុភូត
© រក្សាសិទ្ធិដោយ thmeythmey.com
