អន្តរជាតិ
×![]()
ដោយ: ធីតា
កំណត់ត្រាថ្មីមួយ បានកើតឡើងនៅក្នុងប្រទេសអូស្ត្រាលី ដោយសុនខញីមួយក្បាល បង្កើតកូនបានដល់ទៅ២១ក្បាល ក្នុងនោះ១៨នៅរស់រានមានជីវិត។ នេះបើយោងតាមការផ្សាយរបស់ទូរទស្សន៍ 7News។
ក្រុមគ្រូពេទ្យចំនួន១០នាក់នៅគ្លីនិកពេទ្យសត្វមួយក្នុងក្រុង Brisbane រដ្ឋ Queensland ប្រទេសអូស្ត្រាលី បានប្រតិបត្តិការជួយសម្រាលកូនដល់សុនខញីមួយក្បាល តាមរយៈការវះកាត់។ សុខនញីនោះ បង្កើតកូនបានដល់ទៅ២១ក្បាល ប៉ុន្តែ៣ក្បាលបានបាត់បង់ជីវិត។
សុនខអំបូរ Neapolitan Mastiff ដែលមានអាយុ៤ឆ្នាំនោះ ត្រូវបានគេជឿថា ជាម្ចាស់កំណត់ត្រាថ្មីនៅអូស្ត្រាលី ក្នុងនាមជាសុនខដែលបង្កើតកូនបានច្រើនជាងគេបំផុត។
7News បានបញ្ជាក់ឲ្យដឹងថា ម្ចាស់ឆ្កែ បានជួយបង្កើតបាន៣ក្បាល មុនពេលដែលគាត់សម្រេចដឹកវាទៅគ្លីនិក ដោយសាររង់ចាំអស់រយៈពេលជាច្រើនម៉ោងហើយ តែគាត់មិនមានលទ្ធភាពជួយសត្វរបស់ខ្លួនបន្តទៀត។
អ្នកស្រី Patrycja Zimmermann គ្រូពេទ្យសត្វម្នាក់ បានអះអាងថា ក្រោយការថតឆ្លុះ ក្រុមការងាររបស់គាត់ពិនិត្យឃើញថា កូនជាច្រើនទៀតនៅរស់រានមានជីវិត។ «យើងពិនិត្យចង្វាក់បេះដូងរបស់កូនសុនខ ហើយក៏រកឃើញមធ្យោបាយភ្លាមៗ»។
បច្ចុប្បន្ន សុនខញី និងកូនៗ ស្ថិតក្រោមការថែរក្សាយ៉ាងដិតដល់ពីសំណាក់ម្ចាស់របស់វា ហើយមនុស្សជាច្រើននាក់ បានស្នើសុំចែករំលែកកូនសុនខតូចៗទៅចិញ្ចឹម ដើម្បីជួយសម្រាលទុក្ខលំបាក។
កាលពីឆ្នាំ២០១៩កន្លងទៅ ក៏មានឆ្កែអំបូរ American Bulldog បង្កើតកូនបាន១៩ក្បាលនៅអូស្ត្រាលី ហើយ។ កំណត់ត្រាពិភពលោក គឺឆ្កែ Neapolitan Mastiff មួយក្បាលបង្កើតកូនបាន២៤ កាលពីឆ្នាំ២០០៤៕
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 2 ថ្ងៃ
