ប៉ូលិសប៉េរូ ១៧នាក់ ទទួលមរណភាពដោយសារ COVID-19

COVID-19

អន្តរជាតិ

ប៉ូលិសប៉េរូ ១៧នាក់ ទទួលមរណភាពដោយសារ COVID-19

26, Apr 2020 , 4:30 pm

រូបភាព

រូបភាព៖ Reuters

ដោយ: ធៀន ភារិន្ទ

គិតមកត្រឹមពេលនេះ ប៉ូលិសប៉េរូ ចំនួន ១៧នាក់ បានទទួលមរណភាពដោយសារជំងឺរលាកសួត ដែលបង្កដោយកូរ៉ូណាវីរុស (COVID-19) ក្នុងអំឡុងពេលបំពេញការងារ ក្នុងកាលៈទេសៈបិទប្រទេស។ នេះបើតាមការអះអាងរបស់រដ្ឋមន្ត្រីក្រសួងមហាផ្ទៃប៉េរូ នាថ្ងៃទី២៥ ខែមេសា។

ប៉េរូ បានចាប់ផ្តើមបិទប្រទេសតាំងពីថ្ងៃទី១៦ ខែមេសា មកម្លេះ ដើម្បីទប់ស្កាត់ និងបង្ការករណីឆ្លងនៃ COVID-19 នៅក្នុងប្រទេស។ ពាក់ព័ន្ធនឹងបញ្ហានេះ មន្ត្រីប៉ូលិសជាច្រើននាក់ ត្រូវបានរដ្ឋាភិបាលប៉េរូដាក់ពង្រាយនៅក្នុងប្រទេស ដើម្បីរឹតបន្តឹង និងអនុវត្តបទបញ្ជាបិទប្រទេសនេះ។

បើតាមការអះអាងរបស់រដ្ឋមន្ត្រីក្រសួងមហាផ្ទៃប៉េរូ ដែលទើបតែចូលកាន់តំណែង លោក Gaston Rodriguez គិតមកត្រឹមពេលនេះ មន្ត្រីប៉េរូចំនួន ១៣០០នាក់ បានឆ្លងជំងឺរលាកសួតថ្មីនេះ។ ក្នុងនោះមន្ត្រីប៉ូលិស ចំនួន ១៧នាក់បានស្លាប់ដោយសារ COVID-19។ ក្នុងចំណោមនេះ មន្ត្រីប៉ូលិសចំនួន ១១នាក់ គឺមកទីក្រុងលីម៉ា។

មូលហេតុ ដែលធ្វើឲ្យមន្ត្រីប៉ូលិសឆ្លងបែបនេះ គឺបណ្តាលមកអ្នកទាំងនោះចូលទៅអន្តរាគមន៍ លើបុគ្គល ដែលមិនបានគោរពវិធានបិទប្រទេសរដ្ឋាភិបាល ដែលបណ្តាលឲ្យឆ្លងបែបនេះ។ នាពេលកន្លងមក ប៉េរូបានចំណាយថវិការចំនួន ១៥លានដុល្លារ ដើម្បីទិញម៉ាស់ ស្រោមដៃជាដើម សម្រាប់មន្ត្រីប៉ូលិស។

គិតមកត្រឹមពេលនេះ ប៉េរូមានករណី COVID-19 សរុបចំនួន ២៥៣៣១ករណី អ្នកស្លាប់ចំនួន ៧០០ករណី និងអ្នកជាសះស្បើយចំនួន ៧៧៩៧ករណី៕