ប៉េកាំងដាក់ចេញបទបញ្ជាថ្មី ដើម្បីគ្រប់គ្រងអត្តចរិតប្រជាជន និងទប់ស្កាត់ COVID-19

COVID-19

អន្តរជាតិ

ប៉េកាំងដាក់ចេញបទបញ្ជាថ្មី ដើម្បីគ្រប់គ្រងអត្តចរិតប្រជាជន និងទប់ស្កាត់ COVID-19

26, Apr 2020 , 5:30 pm

រូបភាព

រូបភាព៖ AFP

ដោយ: ធៀន ភារិន្ទ

ទីក្រុងប៉េកាំង បានដាក់ចេញបម្រាមមួយចំនួន ដើម្បីគ្រប់គ្រងអត្តចរិតមិនល្អរបស់ប្រជាជនខ្លួន និងដើម្បីប្រយុទ្ធប្រឆាំងជាមួយជំងឺរលាកសួត ដែលបង្កដោយកូរ៉ូណាវីរុស (COVID-19)។ រាល់បុគ្គលទាំងឡាយណា ដែលលើ្មសនឹងបម្រាមថ្មីនេះ នឹងទទួលទណ្ឌកម្មដោយពិន័យជាប្រាក់។

បន្ទាប់ពីមើលឃើញអត្តចរិតមិនល្អរបស់ប្រជាជនចិន ដែលរស់នៅក្នុងទីក្រុងប៉េកាំងនាពេលកន្លងមក សាលាក្រុង បានចេញបម្រាមមួយចំនួន ដើម្បីឲ្យប្រជាជនគោរព រក្សាអនាម័យ ទប់ស្កាត់ COVID-19 និងឲ្យក្លាយជាមនុស្សមានចរិតត្រឹមត្រូវ (Civilized Behavior) ។ តាមបម្រាមថ្មីនេះ តម្រូវឲ្យប្រជាជនរស់នៅក្នុងទីក្រុងទាំងអស់ ត្រូវស្លៀកពាក់ឲ្យបានសមរម្យ ហាមស្តោះទឹកមាត់ក្នុងទីសាធារណៈ ហាមចោលសម្រាមផ្តេសផ្តាស ហាមព្រលែងឆ្កែតាមទីសាធារណៈ ហាមបោះវត្ថុផ្សេងៗពីលើទីខ្ពស់ ហាមបន្ទោបង់តាមទីសាធារណជាដើម។

មិនត្រឹមតែប៉ុណ្ណោះ បម្រាមនេះ ទាមទារឲ្យប្រជាជននៅចម្ងាយពីគ្នា ១ម៉ែត្រ ការប្រើប្រាស់ស្លាបព្រា ឬចង្កឹះពេលញាំអាហាររួមគ្នា ពាក់ម៉ាស់ជាដើម។ បើសិនបើបុគ្គលណាល្មើសនឹងច្បាប់សម្រាប់អនុវត្តនៅក្នុងទីក្រុងប៉េកាំងនេះ អ្នកទាំងនោះ នឹងត្រូវរងពិន័យចាប់ពី ២៨ដុល្លារ ទៅជិត ៨០ដុល្លារ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។

គិតមកត្រឹមពេលនេះ ស្ថានភាពCOVID-19 នៅក្នុងប្រទេសចិន គឺមានភាពធូរស្បើយយ៉ាងខ្លាំង។ ក្នុងរយៈពេលជាង ៤ខែកន្លងមកនេះ ចិនមានករណីកូរ៉ូណាវីរុសសរុបចំនួន ៨២៨២៧ករណី អ្នកស្លាប់ ៤៦៣២ករណី អ្នកជាសះស្បើយចំនួន ៧៧៣៩៤ករណី។ បើតាមវែបសាយ Worldometer អ្នកជំងឺចិន ដែលកំពុងព្យាបាលនៅក្នុងមន្ទីរពេទ្យ គឺមានត្រឹមតែ ៨០១ករណីតែប៉ុណ្ណោះ៕