COVID-19
អន្តរជាតិ
តើកុមារតូចៗអាចជាប្រភពចម្លង COVID-19 ដែរឬទេ? កុមារីម្នាក់ យកទឹកអាកុលលាងដៃ។ រូបភាព៖ Reuters
× បន្ទាប់ពីស្ថានភាពជំងឺរលាកសួត ដែលបង្កដោយកូរ៉ូណាវីរុស(COVID-19) បានថមថយបន្តិច ប្រទេសមួយចំនួន បានចាប់ផ្តើមបើកសាលារៀនវិញហើយ។ ទាក់ទងនឹងបញ្ហានេះ មានអ្នកវិទ្យាសាស្ត្រជាច្រើន បានសិក្សាពីបញ្ហាខ្លះៗ ថាតើកុមារតូចៗ អាចជាប្រភពចម្លង COVID-19 ទៅមនុស្សផ្សេងទៀត បានដែរឬទេ ក្នុងអំឡុងពេលបើកសាលារៀននេះ?
គិតមកត្រឹមពេលនេះ វាមានករណីតិចតួចប៉ុណ្ណោះ ដែលត្រូវបានគេរាយការណ៍ថា ក្មេងៗមានផ្ទុក COVID-19 បើធៀបនឹងយុវជន ឬមនុស្សធំ។ បើតាមការសិក្សារបស់មជ្ឈមណ្ឌលគ្រប់គ្រង និងបង្ការជំងឺឆ្លងអាមេរិក ក្មេងៗអាមេរិក ដែលមានអាយុតិចជាង១៨ឆ្នាំ គឺមានចំនួនតែ២ភាគរយប៉ុណ្ណោះ មានផ្ទុកកូរ៉ូណាវីរុស។ ចំណែកនៅចិនមានចំនួន ២,២ភាគរយ, អ៊ីតាលីមាន ១,២ភាគរយ, និងអេស្ប៉ាញមានចំនួន ០,៨ភាគរយ។ នេះបើតាមការចុះផ្សាយរបស់ទីភ្នាក់ងារព័ត៌មាន Reuter នាថ្ងៃទី២០ ខែឧសភា។
យ៉ាងណាក៏ដោយ អ្នកជំនាញជំងឺឆ្លង បានអះអាងថា ចំនួនខាងលើនេះ គឺមិនរាប់បញ្ចូលកុមារ ដែលមិនចេញរោគសញ្ញាCOVID-19 នោះឡើយ។ បើតាមអ្នកជំនាញ កុមារតូចៗ អាចចេញរោគសញ្ញារលាក អុជ ឬកន្ទួល ដែលស្រដៀងនឹងជំងឺKawasaki ហើយរោគសញ្ញាទាំងនេះ ក៏អាចទាក់ទងនឹងCOVID-19ដែរ។
ដោយឡែកពាក់ព័ន្ធនឹងករណីឆ្លងវិញ អ្នកវិទ្យាសាស្ត្រ មិនទាន់ប្រាកដនៅឡើយទេ ថាតើកុមារតូចៗ មានអត្រាឆ្លង COVID-19 ដូចមនុស្សធំឡើយ។ បើតាមរបាយការណ៍មួយរបស់សកលវិទ្យាល័យQueensland ដែលមិនទាន់បានពិនិត្យដោយអ្នកជំនាញ ប៉ុន្តែមានភាពស្រដៀងគ្នាទៅនឹងការស្រាវជ្រាវរបស់អ៊ីរ៉ង់ បារាំង និងវិទ្យាស្ថានជាតិហូឡង់ ក្នុងចំណោមករណីឆ្លងCOVID-19 ជាចង្កោមក្នុងគ្រួសារ ត្រូវបានគេរកឃើញថា ក្មេងតូចៗគឺមានចំនួនតិចជាង១០ភាគរយ ដែលជាប្រភពចម្លងCOVID-19 ដំបូងទៅកាន់គ្រួសារ។
ក្រៅពីចំនួនក្មេងៗផ្ទុកCOVID-19 និងអត្រាឆ្លងពីក្មេងៗទៅមនុស្សផ្សេងទៀត អ្នកវិទ្យាសាស្ត្រ ក៏បានសិក្សាពីបរិមាណនៃកូរ៉ូណាវីរុស ដែលមាននៅក្នុងខ្លួនកុមារតូចៗ ដែលផ្ទុកCOVID-19 ធៀបនឹងមនុស្សធំផងដែរ។ ការសិក្សារបស់វិទ្យាស្ថាន Charité Universitatsmedizin Berlin ប្រទេសអាល្លឺម៉ង់ លើអ្នកជំងឺCOVID-19ជិត៤ពាន់នាក់ បានបង្ហាញថា បរិមាណកូរ៉ូណាវីរុសក្នុងខ្លួនក្មេងៗ គឺមិនខុសគ្នាប៉ុន្មានឡើយពីមនុស្សធំ។ ការណ៍នេះ អ្នកវិទ្យាស្ថានបានព្រមានរដ្ឋាភិបាលប្រទេសនីមួយៗ ឲ្យមានការប្រុងប្រយ័ត្នក្នុងការបើកសាលារៀនឡើងវិញ ព្រោះក្មេងៗអាចចម្លង COVID-19 ទៅក្មេងៗដទៃទៀត៕
© រក្សាសិទ្ធិដោយ thmeythmey.com