COVID-19
អន្តរជាតិ
WHO សង្ឃឹមនឹងធ្វើការជាមួយអាមេរិកក្នុងការទប់ស្កាត់ជំងឺអេបូឡា ទោះមិនត្រូវគ្នារឿង COVID-19
លោកTedros Adhanom Ghebreyesus អគ្គនាយកWHO-AFP
×![]()
លោក Tedros Adhanom Ghebreyesus អគ្គនាយកអង្គការសុខភាពពិភពលោក(WHO)សង្ឃឹមថាអង្គការរបស់លោកអាចនឹងធ្វើការជាមួយអាមេរិក ដើម្បីទប់ស្កាត់ការផ្ទុះជំងឺអេបូឡានៅប្រទេសកុងហ្គោ។ ការអះអាងរបស់លោក Tedros នេះធ្វើឡើងបើទោះបីជាលោកប្រធានាធិបតីអាមេរិក ដូណាល់ត្រាំបានប្រកាសផ្តាច់ទំនាក់ទំនងជាមួយនឹងអង្គការនេះជុំវិញការគ្រប់គ្រងការផ្ទុះជំងឺ COVID-19។
«យើងមានកិច្ចពិភាក្សាមួយយ៉ាងល្អ ជាមួយលោករដ្ឋមន្ត្រី(សុខាភិបាល)កាលពីសប្តាហ៍មុន ហើយលោកធានាថា អាមេរិកនឹងបន្តការប្តេជ្ញាចិត្តក្នុងការគាំទ្រការប្រយុទ្ធទៅនឹងជំងឺអេបូឡា»។ នេះជាការលើកឡើងរបស់លោក Tedros Adhanom Ghebreyesus ប្រមុខ WHO ក្នុងសន្និសីទសារព័ត៌មានតាមប្រព័ន្ធអនឡាញនៅថ្ងៃទី១០ ខែមិថុនា ដោយសំដៅលើជំនួបរវាងរូបលោក និងលោក Alex Azar រដ្ឋមន្ត្រីក្រសួងសុខាភិបាល និងសេវាប្រជាជនអាមេរិក។
លោក Tedros ក៏បានគូសបញ្ជាក់ផងដែរថា ជំនួបនេះមិនមែនបានន័យថា WHO នឹងទទួលថវិការដោយផ្ទាល់ពីអាមេរិកឡើយ។ លោកបានសង្កត់ធ្ងន់ថា៖ « វាមិនមែនជារឿងថវិកាឡើយ។ ទំនាក់ទំនង(ជាមួយអាមេរិក) មានសារៈសំខាន់ជាង។»
ជំនួបខាងលើនេះ ត្រូវបានគេកត់សម្គាល់ថាជាសញ្ញានៃកិច្ចសហប្រតិបត្តិការកម្រិតខ្ពស់មួយរវាងប្រមុខWHO លោកTedros និងរដ្ឋបាលរបស់លោកប្រធានាធិបតី ដូណាល់ ត្រាំ បន្ទាប់ពីលោក ត្រាំ បានប្រកាសផ្អាកការផ្តល់ថវិកាទៅអង្គការនេះនៅថ្ងៃទី១៥ ខែមេសា និងផ្តាច់ទំនាក់ទំនងជាមួយWHO នៅថ្ងៃទី២៩ ខែឧសភាកន្លងទៅ។
កាលពីថ្ងៃទី៨ ខែឧសភា WHO បានប្រកាសថា មានមនុស្សច្រើនជាង១២នាក់ ត្រូវបានគេរកឃើញថាមានជំងឺអេបូឡា និងត្រូវបានចាត់ទុកជាការផ្ទុះជំងឺនេះជាថ្មីម្តងទៀត នៅសាធារណរដ្ឋប្រជាធិបតេយ្យកុងហ្គោ។ ជំងឺអេបូឡាផ្ទុះឡើងនៅចន្លោះឆ្នាំ ២០១៤ ទៅ២០១៦ ហើយដែលប៉ះពាល់ខ្លាំងបំផុតដល់បណ្តាប្រទេសអាហ្វ្រិកភាគខាងលិច ដោយបានចម្លងមនុស្សចំនួន២៨, ៦៣៧ នាក់ និងសម្លាប់មនុស្សអស់១១, ៣១៥នាក់ ៕
© រក្សាសិទ្ធិដោយ thmeythmey.com
