អន្តរជាតិ
អូស្រា្តលីរងការវាយប្រហារតាមអ៊ីនធឺណិត ខណៈនាយករដ្ឋមន្ត្រីថា គ្មានប្រទេសច្រើនទេដែលអាចធ្វើបែបនេះ រូបភាព៖ EPA-EFE និង Rigzone
× នាយករដ្ឋមន្ត្រីអូស្ត្រាលី លោក ស្កុត ម៉ូរីសុន (Scott Morrison) នាថ្ងៃទី១៩ ខែមិថុនា បានលើកឡើងថា អូស្ត្រាលី រងការវាយប្រហារតាមប្រព័ន្ធអ៊ីនធឺណិតក្នុងទ្រង់ទ្រាយធំ។ ការប៉ុនប៉ងវាយប្រហារតាមអ៊ីនធឺណិតនេះ ធ្វើឡើងសំដៅលើគោលដៅរដ្ឋាភិបាល អង្គការនយោបាយ អ្នកផ្តល់សេវាសំខាន់ៗជាដើម។ លោកនាយករដ្ឋមន្ត្រីលើកឡើងទៀតថា គ្មានប្រទេសច្រើនទេ ដែលអាចផ្តើមវាយប្រហារអ៊ីនធឺណិតលើអូស្ត្រាលីបាន។
ក្នុងសន្និសីទកាសែតនាទីក្រុង កង់ប៉េរ៉ា នាយករដ្ឋមន្ត្រីអូស្ត្រាលី លោកScott Morrison បានលើកឡើងថា ប្រទេសមួយ បានដាក់ទិសដៅវាយប្រហារលើអូស្ត្រាលីគ្រប់កម្រិតទាំងអស់ ដោយគិតចាប់តាំងពីរដ្ឋាភិបាល អង្គការនយោបាយ អ្នកផ្តល់សេវាសំខាន់ៗ និងប្រតិបត្តិករនៃហេដ្ឋារចនាសម្ព័ន្ធដ៏សំខាន់។ បន្ថែមពីលើនេះ ការវាយប្រហារតាមអ៊ីនធឺណិត គឺបានកើតឡើងយ៉ាងច្រើនក្នុងរយៈពេលចុងក្រោយនេះ។
អូស្ត្រាលីដឹងច្បាស់ថា នេះគឺជាវាយតាមអ៊ីនធឺណិតរបស់ប្រទេសមួយ ដោយសម្អាងលើលក្ខខណ្ឌមួយចំនួន។ បើតាមការអះអាងរបស់ប្រមុខរដ្ឋាភិបាលអូស្ត្រាលីរូបនេះ អូស្ត្រាលីដឹងថា អ្នកដែលប៉ុនប៉ងលួចទិន្នន័យ ឬវាយប្រហារអ៊ីនធឺណែតក្នុងប្រទេសអូស្ត្រាលី គឺជាក្រុមអ្នកជំនាញកម្រិតខ្ពស់ ដែលមានរដ្ឋនៅពីក្រោយ ព្រោះដោយសារទំហំ និងទិសដៅនៃការវាយប្រហារ។ ទិសដៅនោះ គឺការប៉ុនប៉ងលួចចូលទិន្នន័យរបស់រដ្ឋាភិបាល ឬអង្គការសំខាន់ៗជាដើម។
យ៉ាងណាក៏ដោយ លោកនាយករដ្ឋមន្ត្រីមិនបានបញ្ជាក់ទេ ថា តើវាគឺជាការវាយប្រហារតាមអ៊ីនធឺណិតបែបណាឡើយ ឬក៏ប្រទេសណានៅពីក្រោយដែរ។ តាមការចុះផ្សាយរបស់សារព័ត៌មាន ABC ដែលបានដកស្រង់សម្តីរបស់លោកនាយករដ្ឋមន្ត្រីនាពេលកន្លងមក គ្មានទិន្នន័យឯកជនច្រើនឡើយ ត្រូវបានគេលួច ហើយការវាយវាយប្រហារតាមអ៊ីនធឺណិតជាច្រើន រងបរាជ័យ។
ទាក់ទងការវាយប្រហារអ៊ីនធឺណិតនេះ នាយករដ្ឋមន្ត្រីអូស្ត្រាលីបានអះអាងថា គ្មានប្រទេសច្រើនឡើយ ដែលអាចផ្តើមវាយប្រហារអ៊ីនធឺណិតបែបនេះមកលើអូស្ត្រាលី ហើយអូស្ត្រាលី ក៏មិនកំណត់ពីប្រទេស ដែលត្រូវទទួលខុសត្រូវពីបញ្ហានេះដែរ។
សូមបញ្ជាក់ថា ការបញ្ចេញព័ត៌មានវាយប្រហារបែបនេះ ធ្វើឡើងបន្ទាប់ពីទីភ្នាក់ងារព័ត៌មាន Reuters បានចុះផ្សាយថា ចិនគឺជាអ្នកទទួលខុសត្រូវលើការវាយប្រហារនៅក្នុងសភាអូស្ត្រាលី។ ទាក់ទិននឹងបញ្ហានេះ អូស្ត្រាលី មិនដែលបញ្ចេញពីប្រភពនៃការវាយប្រហារតាមអ៊ីនធឺណិតនេះឡើយ ហើយចិន ក៏បានបដិសេធពីបញ្ហានេះដែរ៕
© រក្សាសិទ្ធិដោយ thmeythmey.com