អន្តរជាតិ
លោក Eliot Engel តំណាងរាស្ត្រ និងជាប្រធានគណៈកម្មាធិការកិច្ចការបរទេសនៃសភាតំណាង។ រូបភាព AFP
×![]()
សមាជិកសភា និងព្រឹទ្ធសភាគណបក្សប្រជាធិបតេយ្យនៅថ្ងៃទី១៨ ខែមិថុនា បានដាក់ស្នើសេចក្តីព្រាងច្បាប់ដើម្បីរាំងខ្ទប់បំណងរបស់លោកប្រធានាធិបតី ដូណាល់ត្រាំ ក្នុងការកាត់បន្ថយចំនួនកងទ័ពអាមេរិក ៩ពាន់៥រយនាក់ ក្នុងប្រទេសអាល្លឺម៉ង់។ ក្នុងសេចក្ដីស្នើនេះ ការដកទ័ពនេះនឹងមិនទទួលបានថវិកាចំណាយឡើយ បើសិនជាគ្មានការយល់ព្រមពីសភាអាមេរិក។
លោក Eliot Engel តំណាងរាស្ត្រ និងជាប្រធានគណៈកម្មាធិការកិច្ចការបរទេសនៃសភាតំណាង រួមជាមួយលោក Bob Menendez សមាជិកព្រឹទ្ធសភាក្នុងគណកម្មការទំនាក់ទំនងការបរទេសនៃព្រឹទ្ធសភា បានស្នើសេចក្តីព្រាងច្បាប់ក្នុងគោលបំណងរាំងខ្ទប់ផែនការកាត់បន្ថយកងទ័ពអាមេរិកនៅបរទេសរបស់លោកប្រធានាធិបតីត្រាំ។ សេចក្តីព្រាងច្បាប់នេះ បានបង្ហាញពីសេចក្តីបារម្ភលើផែនការកាត់បន្ថយកងទ័ពនៅក្រៅប្រទេសពីសមាជិកសភាទាំង២បក្ស។
សេចក្តីព្រាងច្បាប់ខាងលើនេះ នឹងហាមមិនឲ្យប្រើប្រាស់ថវិកាដើម្បីដកទ័ព ឬកាត់បន្ថយកងទ័ពរបស់អាមេរិកនៅក្នុងបណ្តាប្រទេសអឺរ៉ុប លុះត្រាមានការស្នើពីរដ្ឋាភិបាលប្រទេសនោះផ្ទាល់តែម្តង។ បន្ថែមពីនេះក្នុងករណីចង់កាត់បន្ថយកងទ័ព ឬដកទ័ព ប្រធានាធិបតី ត្រូវប្រកាសពីបំណង១៨០ថ្ងៃជាមុន ដោយមានហេតុផលត្រឹមត្រូវ មានការយល់ព្រមពីសភា។ រដ្ឋមន្ត្រីការពារជាតិ និងការបរទេសក៏ត្រូវបង្ហាញមុខក្នុងការសួរដេញដោលចំពោះមុខសភា។ ក្រោមរដ្ឋធម្មនុញ្ញអាមេរិក សភាតំណាង និងព្រឹទ្ធសភាជាអ្នកអនុម័តថវិកាចំណាយរបស់រដ្ឋាភិបាល។
បើតាមទីភ្នាក់ងារព័ត៌មាន Reuters លោកតំណាងរាស្ត្រ Engel បានអះអាងក្នុងសេចក្តីថ្លែងការណ៍របស់ខ្លួន ថា សេចក្តីសម្រេចចិត្តរបស់ប្រធានាធិបតីក្នុងការដក និងកាត់បន្ថយកងទ័ពនៅអាល្លឺម៉ង់គំរាមសន្តិសុខជាតិ។ លោកបន្ថែមទៀតថា៖ «ច្បាប់របស់យើងនិងបញ្ឈប់រដ្ឋបាលរបស់លោកប្រធានាធិបតី ត្រាំ ក្នុងការអនុវត្តគោលនយោបាយក៏មហន្តរាយមួយនេះ។»
ការស្នើសេចក្តីព្រាងច្បាប់នេះធ្វើឡើង បន្ទាប់ពីលោកត្រាំ នៅថ្ងៃទី១៥ ខែមិថុនា បានសម្រេចចិត្តកាត់បន្ថយកងទ័ពអាមេរិកដែលប្រចាំការនៅអាល្លឺម៉ង់ចំនួន៩ពាន់៥រយ។ ការកាត់បន្ថយចំនួនកងទ័ពនេះត្រូវបានលោក ត្រាំ លើកឡើងថា មកពីអាល្លឺម៉ង់មិនបានបំពេញកាតព្វកិច្ចក្នុងក្របខណ្ឌណាតូឲ្យបានពេញលេញ និងគេងចំណេញក្នុងការធ្វើពាណិជ្ជកម្មជាមួយអាមេរិក៕
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 4 ថ្ងៃ
