អន្តរជាតិ
អ្នកជំនាញសុខាភិបាល បារម្ភនិងមិនទាន់ទុកចិត្តលើវ៉ាក់សាំង COVID-19 របស់រុស្ស៊ី
វ៉ាក់សាំង COVID-19 របស់រុស្ស៊ី។ រូបភាព៖ AFP
×![]()
លោកប្រធានាធិបតីរុស្ស៊ី វ្ល៉ាឌីមៀ ពូទីន នៅថ្ងៃទី១១ សីហា បានប្រកាសថានឹងអនុញ្ញាតឲ្យផលិត និងប្រើប្រាស់វ៉ាក់សាំងជំងឺCOVID-19 បន្ទាប់ពីបានធ្វើតេស្តក្នុងតំណាក់កាលទី៣ ក្នុងរយៈពេលតិចជាង២ខែ។ ការប្រញាប់ប្រញាល់ អនុញ្ញាតឲ្យផលិត និងប្រើប្រាស់វ៉ាក់សាំងCOVID-19 នេះ បណ្តាលឲ្យអ្នកជំនាញបារម្ភ ដោយសារតែមិនមានទិន្ន័យ ពីការធ្វើតេស្តគ្រប់គ្រាន់។
វ៉ាក់សាំងដែលរុស្ស៊ី នឹងអនុញ្ញាតឲ្យប្រើប្រាស់នោះ មានឈ្មោះ Sputnik V ហើយផលិតដោយវិទ្យាស្ថាន Gamaleya ។ វ៉ាក់សាំងនេះ ត្រូវបានលោកប្រធានាធិបតី វ្ល៉ាឌីមៀ ពូទីន ប្រកាសនៅថ្ងៃទី១១ ខែសីហា ជាមួយការអះអាងថាមានប្រសិទ្ធភាព បង្កើតអង់ទីគ័រ និងឆ្លងកាត់នូវរាល់ការត្រួតពិនិត្យទាំងអស់។ កូនស្រីរបស់លោកម្នាក់ ស្ថិតក្នុងចំណោមមនុស្ស ដែលទទួលវ៉ាក់សាំងនេះផងដែរ។
ទោះជាមានការអះអាងបែបនេះក្តី អ្នកជំនាញផ្នែកជំងឺឆ្លង និងភាពស៊ាំមួយចំនួនបានបង្ហាញពីសេចក្តីបារម្ភ និងការសង្ស័យ ទៅលើគុណភាពវ៉ាក់សាំងថ្មីនេះ។ នេះយោងតាមការចុះផ្សាយ របស់ទីភ្នាក់ងារព័ត៌មាន Reuters។
«ការចាក់វ៉ាក់សាំងទ្រង់ទ្រាយធំ ដោយគ្មានការធ្វើតេស្តត្រឹមត្រូវ មិនត្រូវតាមវិជ្ជាជីវៈឡើយ»។ នេះជាការលើកឡើងរបស់លោក Francois Balloux អ្នកជំនាញនៅវិទ្យាស្ថានស៊ីនេទិក នៃសាកលវិទ្យាល័យ College London។ លោកសង្កត់ធ្ងន់ថា បញ្ហាណាមួយដែលកើតឡើងជាមួយនឹងវ៉ាក់សាំង មិនត្រឹមតែបង្កើតជាផលអវិជ្ជមានលើសុខភាពប៉ុណ្ណោះទេ តែវានឹងធ្វើឲ្យប្រជាជនទាំងមូល អាចនឹងមានភាពស្ទាក់ស្ទើរទទួលយកវ៉ាក់សាំងផង។
ចំណែកឯលោក Peter Kremsner អ្នកជំនាញអាល្លឺម៉ង់ នៅសាកលវិទ្យាល័យមន្ទីរពេទ្យក្នុងទីក្រុង Tuebingen លើកឡើងថា ជាទូទៅគេត្រូវការចំនួនមនុស្សច្រើន ក្នុងការធ្វើតេស្ត មុនធ្វើការអនុញ្ញាតលើវ៉ាក់សាំង។ បើតាម Reuters លោក Kremsner យល់ថា វាជារឿងធ្វេសប្រហែស ប្រសិនបើមនុស្សជាច្រើនមិនទាន់បានធ្វើតេស្តជាមុន។
សម្រាប់លោក Keith Neal អ្នកជំនាញជំងឺឆ្លងនៅសាកលវិទ្យាល័យ Nottingham នៅអង់គ្លេស វាជារឿងមិនអាចទៅរួចឡើយ ក្នុងការដឹងពីប្រសិទ្ធភាពរបស់វ៉ាក់សាំងរុស្ស៊ី ដោយមិនចេញផ្សាយឯកសារវិទ្យាសាស្ត្រ សម្រាប់ធ្វើវិភាគនោះ។ អ្នកជំនាញខ្លះទៀត ពន្យល់ថា កង្វះខាតក្នុងការចេញផ្សាយទិន្ន័យរបស់វ៉ាក់សាំងរុស្ស៊ី រួមមានរបៀបផលិត និងសុវត្ថិភាព ការឆ្លើយតបរបស់ភាពស៊ាំ និងថាតើវាអាចបង្ការការឆ្លងជំងឺ COVID-19 គឺជាចម្ងល់របស់អ្នកវិទ្យាសាស្ត្រ អាជ្ញាធរសុខាភិបាល និងសាធារណជន។
ចំណែកឯ អង្គការសុខភាពពិភពលោក(WHO) តាមរយៈអ្នកនាំពាក្យបានឲ្យដឹងថា ខ្លួនកំពុងទំនាក់ទំនងយ៉ាងជិតស្និទ្ធ ជាមួយអាជ្ញាធរសុខាភិបាលរុស្ស៊ី។ លោកTarik Jasarevic អ្នកនាំពាក្យ WHO លើកឡើងថា៖«ការពិភាក្សាកំពុងធ្វើឡើង ពីលទ្ធភាពក្នុងការផ្តល់លក្ខណៈសម្បត្តិជាមុន (pre-qualification) ដល់វ៉ាក់សាំង។ ប៉ុន្តែម្តងទៀត ការផ្តល់លក្ខណៈសម្បត្តិជាមុនដល់វ៉ាក់សាំង ទាមទារការត្រួតពិនិត្យយ៉ាងតឹងតែង និងវាយតម្លៃនូវរាល់ទិន្ន័យ ស្តីពីសុវត្ថិភាព និងប្រសិទ្ធភាពរបស់វ៉ាក់សាំង »៕
© រក្សាសិទ្ធិដោយ thmeythmey.com
«គូលី»មានន័យច្បាស់លាស់ដូចម្តេច?
1 សប្តាហ៍
