COVID-19
អន្តរជាតិ
×![]()
វ៉ាក់សាំង COVID-19 របស់រុស្ស៊ីឈ្មោះ Sputnik V នឹងត្រូវដាក់ឲ្យធ្វើតេស្តលើមនុស្សចំនួន៤ម៉ឺននាក់ ចាប់ផ្តើមពីសប្តាហ៍ក្រោយទៅ។ វ៉ាក់សាំង Sputnik V គឺជាវ៉ាក់សាំងCOVID-19 ដំបូងគេបង្អស់ដែលត្រូវបានផលិតឡើង ប៉ុន្តែប្រសិទ្ធភាព និងសុវត្ថិភាពរបស់វ៉ាក់សាំងនេះ ត្រូវបានចោទជាសំណួរ ដោយសារពុំមានព័ត៌មានពីការធ្វើតេស្តគ្រប់គ្រាន់។ 
«ការធ្វើតេស្តលើសមត្ថភាពក្នុងការឆ្លើយតបរបស់ភាពស៊ាំ និងសុវត្ថិភាពរបស់វ៉ាក់សាំងSputnik V និងចាប់ផ្តើមនៅសប្តាហ៍ក្រោយ ដោយរួមបញ្ចូលមនុស្ស៤ម៉ឺននាក់»។ នេះជាការលើកឡើងក្នុងសេចក្តីថ្លែងការណ៍នៅថ្ងៃទី២០ សីហា របស់មូលនិធិវិនិយោគផ្ទាល់រុស្ស៊ី ដែលផ្តល់ប្រាក់ដល់គម្រោងវ៉ាក់សាំងនេះ។ សេចក្តីថ្លែងការណ៍នេះ បញ្ជាក់ថា ការធ្វើតេស្តនេះមានលក្ខណៈដូចការធ្វើតេស្តដំណាក់កាលទី៣ របស់វ៉ាក់សាំងដទៃទៀតដែរ។
បើតាមទីភ្នាក់ងារព័ត៌មាន AFP លោក Kirill Dmitriyev ប្រធានមូលនិធិវិនិយោគផ្ទាល់រុស្ស៊ី និយាយក្នុងសន្នីសិទសារព័ត៌មានថា ការចាក់វ៉ាក់សាំងទៅលើក្រុមមនុស្សដែលប្រឈមនឹង COVID-19 រួមមានគ្រូពេទ្យ នឹងត្រូវចាប់ផ្តើមនៅសប្តាហ៍ក្រោយ ហើយធ្វើឡើងដោយការស្ម័គ្រចិត្ត។
មកទល់ពេលនេះ មានប្រទេសច្រើនជាង២០បានធ្វើសំណើសុំទិញវ៉ាក់សាំង COVID-19 រាប់ពាន់លានដូស ខណៈរុស្ស៊ីក៏មានកិច្ចព្រមព្រៀងជាមួយប្រទេសមួយចំនួនក្នុងការផលិតវ៉ាក់សាំង។ នៅរុស្ស៊ីវិញ លោក Dmitriyev បានបន្ថែមថា ការចាក់វ៉ាក់សាំងទ្រង់ទ្រាយធំត្រូវរំពឹងនឹងចាប់ផ្តើមក្នុងខែតុលា ចំណែកឯការនាំចេញទៅក្រៅប្រទេសអាចនឹងធ្វើឡើងនៅខែវិច្ឆិកា ឬខែធ្នូ។
ជុំវិញមន្ទិលសង្ស័យទៅលើប្រសិទ្ធិភាពវ៉ាក់សាំងពីបណ្តាប្រទេសដទៃ និងអង្គការសុខភាពពិភពលោក(WHO) លោក Dmitriyev បានលើកថា៖« យើងឃើញមានការប្រែប្រួលយ៉ាងច្រើនចំពោះពាក្យសម្តីរបស់ WHO ។ ជាការពិត ដំបូងឡើយពួកគេមិនទាន់មានព័ត៌មានគ្រប់គ្រាន់ តែពេលនេះព័ត៌មានផ្លូវការត្រូវបានបញ្ជូនទៅ ហើយWHO នឹងវាយតម្លៃវ៉ាក់សាំង»។
គិតត្រឹមថ្ងៃទី២១ សីហានេះ រុស្ស៊ីមានចំនួនអ្នកឆ្លងCOVID-19 ៩៤២,១០៦ ករណី និងមានអ្នកស្លាប់ចំនួន១៦,០៩៩ នាក់។ រុស្ស៊ីជាប្រទេសដែលមានអ្នកឆ្លងច្រើនលំដាប់ទី៤ បន្ទាប់ពីអាមេរិក ប្រេស៊ីល និងឥណ្ឌា៕
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 1 ថ្ងៃ
