ឥណ្ឌា នៅថ្ងៃទី៧ ខែកញ្ញានេះ បានក្លាយទៅជាប្រទេសដែលមានចំនួនអ្នកឆ្លង COVID-19 ច្រើនលំដាប់ទី២ តាមពីក្រោយអាមេរិក ហើយឈរពីលើប្រេស៊ីល។ ឥណ្ឌាមានចំនួនអ្នកឆ្លង៤,២លាននាក់ និងស្លាប់ចំនួនជាង៧ម៉ឺន១ពាន់នាក់។ ចំនួនអ្នកឆ្លងនេះកើនឡើង ក្រោយឥណ្ឌាចាប់ផ្តើមបើកប្រទេសឡើងវិញនៅខែមិថុនា។
យោងតាមការផ្សាយរបស់ទីភ្នាក់ងារព័ត៌មាន AFP ក្រសួងសុខាភិបាលឥណ្ឌា បានបង្ហាញថា ឥណ្ឌាមានចំនួនអ្នកឆ្លង COVID-19 ចំនួន៤,២លានករណីនៅត្រឹមថ្ងៃទី៧ ខែកញ្ញា ឈរលេខពីរក្រោមអាមេរិកដែលមាន៦,២៥លានករណី និងច្រើនជាងប្រេស៊ីលដែលមាន៤,១២លានករណី។
នៅថ្ងៃទី៥ ខែកញ្ញាចំនួនឆ្លងនៅឥណ្ឌាកើនឡើងដល់៤លាននាក់ ខណៈ១៣ថ្ងៃមុន ឥណ្ឌាមានករណីឆ្លង៣លានករណី។ នៅត្រឹមថ្ងៃទី៧ ខែសីហានេះ ឥណ្ឌាមានករណីឆ្លងដល់ទៅ៩ម៉ឺនករណីក្នុងមួយថ្ងៃ។
លោក Shadid Jameel អ្នកជំនាញផ្នែកវីរុសសាស្ត្រ និងជាប្រធានសម្ព័ន្ធ Wellcome Trust/DBT India បានលើកឡើងថា ក្នុងរយៈពេល២សប្តាហ៍ចុងក្រោយ ករណីឆ្លងជាមធ្យមកើនឡើងពី៦ម៉ឺន៥ពាន់ករណី ទៅ៨ម៉ឺន៣ពាន់ករណីក្នុងមួយថ្ងៃ ដែលជាការកើនឡើង២៧ភាគរយក្នុងរយៈពេល២សប្តាហ៍ ឬប្រមាណ២ភាគរយក្នុងមួយថ្ងៃ។
ការកើនឡើងចំនួនឆ្លងនេះបណ្តាលមកពីការបន្ធូរបន្ថយការរឹតត្បិត និងការបើកប្រទេស និងចរន្តសេដ្ឋកិច្ចឡើងវិញយ៉ាងសន្សឹមៗនៅដើមខែមិថុនា។ ក្នុងអំឡុងពេលបិទប្រទេសដែលជាវិធានការទប់ស្កាត់ជំងឺឆ្លង សេដ្ឋកិច្ចឥណ្ឌាបានដាំក្បាលប្រមាណ២៤ភាគរយ ចន្លោះពីខែមេសា ដល់ខែមិថុនា។ ក្នុងការបើកប្រទេសឡើងវិញនេះ ការប្រើរថភ្លើងក្រោមដីនៅរដ្ឋធានីញូវដែលី និងទីក្រុងហិរញ្ញវត្ថុម៉ុមបៃ បានដំណើរការឡើងវិញក្រោយបិទជាង៦ខែមក។
បន្ថែមពីនេះ អ្នកជំនាញសុខភាពអះអាងថា ជំងឺ COVID-19 ក៏ចាប់ផ្តើមឆ្លងចូលជនបទផងដែរ។ អំឡុងពេលបិទប្រទេស ឥណ្ឌាត្រូវបានចាត់ទុកថា ជាប្រទេសទប់ទល់នឹងជំងឺឆ្លងបានយ៉ាងប្រសើរ ដោយមានចំនួនអ្នកឆ្លងតិចធៀបនឹងចំនួនប្រជាជន។
ទោះជាមានករណីច្រើនបែបនេះក្តី អ្នកជំនាញអះអាងថា ចំនួនឆ្លងមានច្រើនជាងតួលេខសព្វថ្ងៃ ព្រោះពុំមានការធ្វើតេស្តគ្រប់គ្រាន់ ចំណែកឯការកត់ត្រាករណីស្លាប់ក៏មិនទាន់ត្រឹមត្រូវដែរ។ ចាប់តាំងពីផ្ទុះជំងឺ COVID-19 មក ឥណ្ឌាបានធ្វើតេស្តមនុស្ស១០លាននាក់ជាមធ្យមក្នុងមួយថ្ងៃ ហើយក៏មានគម្រោងពន្លឿនការធ្វើតេស្តនេះផងដែរ។ ដោយសារមានការឆ្លងច្រើន ក្រុមប្រឹក្សាស្រាវជ្រាវវេជ្ជសាស្ត្រឥណ្ឌាអនុញ្ញាតឲ្យប្រជាជនគ្រប់រូបធ្វើតេស្ត ដោយពុំចាំបាច់មានលិខិតពីគ្រូពេទ្យឡើយ។
បើតាមលោក Jameel ការបង្កើនការធ្វើតេស្តនឹងជួយរកឃើញអ្នកផ្ទុកជំងឺ COVID-19 មិនចេញរោគសញ្ញា ដែលជាប្រភពចម្លងមួយ។ លោកថា គេគួរបន្ថែមការធ្វើតេស្តតាមភូមិសង្កាត់នៅជនបទ ដោយហេតុថា ករណីឆ្លងថ្មីចំនួន២ភាគ៣ មានប្រភពមកពីទីនោះ។
ឥណ្ឌាដែលមានប្រជាជន ១,៣ពាន់លាននាក់ ក៏ត្រូវបានព្រមានផងដែរថា អាចនឹងមានចំនួនអ្នកឆ្លងCOVID-19 លើសអាមេរិកនៅពេលខាងមុខ៕