កងឆ្មាំសមុទ្រកូរ៉េខាងត្បូង នៅថ្ងៃទី២៩ ខែកញ្ញា បានអះអាងថា មន្ត្រីនេសាទ ដែលត្រូវបាញ់សម្លាប់ ព្យាយាមរត់គេចទៅកូរ៉េខាងជើង បន្ទាប់ពីបានស៊ើបអង្កេត និងវិភាគទិន្នន័យមួយចំនួនរបស់បុរសរូបនេះ។
មកទល់ពេលនេះ សាកសពមន្ត្រីក្រសួងសមុទ្រ និងនេសាទកូរ៉េខាងត្បូង នៅតែមិនទាន់រកឃើញនៅឡើយទេ។ ប៉ុន្តែអាជ្ញាធរកូរ៉េខាងត្បូង បានសន្និដ្ឋានថា បុរសរូបនេះ មានបំណងរត់គេចទៅកូរ៉េខាងជើង។ បងប្រុសរបស់មន្ត្រីរូបនេះ បានច្រានចោលការវាយតម្លៃតាំងពីដើមមក។ កន្លងមកអាជ្ញាធរកូរ៉េខាងត្បូង ក៏ធ្លាប់ដាក់ការសង្ស័យលើការរត់គេចទៅកូរ៉េខាងជើងដែរ។
ក្នុងសន្និសីទសារព័ត៌មានមួយ លោក Yoon Seong-hyun ប្រធានក្រុមស៊ើបអង្កេត និងចារកិច្ចរបស់ឆ្មាំសមុទ្រកូរ៉េខាងត្បូង បានបញ្ជាក់ថា មន្ត្រីនេសាទគឺបានពាក់អាវហែលទឹក និងនៅលើសម្ភារអណ្តែតទឹក នៅពេលកូរ៉េខាងជើងបានឃើញ។ ទន្ទឹមគ្នានេះ លោក Yoon បានបន្ថែមថា៖ «កូរ៉េខាងជើងផងដែរ ក៏ដឹងពីព័ត៌មានលំអិតផ្ទាល់ខ្លួនរបស់មន្ត្រី ដូចជា ឈ្មោះ, អាយុ, ទីកន្លែងកំណើត និងកម្ពស់ជាដើម»។ នេះបើតាមការចុះផ្សាយរបស់ទីភ្នាក់ងារព័ត៌មាន Yonhap។
ការសន្និដ្ឋានរបស់កងឆ្មាំងសមុទ្រកូរ៉េខាងត្បូងនេះ ផ្អែកលើតម្រុយរបស់CCTV, ទិន្នន័យចារកិច្ចយោធាកូរ៉េខាងត្បូង, និងទិន្នន័យដែលមានពីមុន។
ក្នុងថ្ងៃដដែលនេះ មេដឹកនាំបក្សប្រឆាំងអំណាចប្រជាជន(PPP) លោក Joo Ho-young បានលើកឡើងថា ក្រសួងការពារជាតិ បានបញ្ជាក់រួចហើយតាមរយៈទិន្នន័យចារកិច្ចពិសេសថា កូរ៉េខាងជើង បានដុតសាកសពមន្ត្រីនេសាទកូរ៉េខាងត្បូង។
នៅថ្ងៃទី២៨ ខែកញ្ញា ប្រធានាធិបតីកូរ៉េខាងត្បូង លោក មូន ចេអ៊ីន ក៏បានចូលរួមរំលែកទុក្ខចំពោះក្រុមគ្រួសាររបស់មន្ត្រីរូបនេះដែរ ហើយថែមទាំងសុំទោសជាសាធារណៈទៀត ចំពោះការសម្លាប់នេះ និងចាត់ទុកហេតុការណ៍នេះ គឺជាសោកនាដកម្មមួយសម្រាប់កូរ៉េខាងត្បូង។
សូមបញ្ជាក់ថា មន្ត្រីកូរ៉េខាងត្បូងរូបនេះ បានបាត់ពីទូកយាមល្បាតនៅក្នុងដែនទឹកកូរ៉េខាងត្បូងនៅថ្ងៃទី២១ ខែកញ្ញា។ តាមការវាយតម្លៃ បុរសរូបនេះបានហែលទឹកដោយមានអាវការពារ និងវត្ថុអណ្តែតទឹកជាជំនួយ។ នៅថ្ងៃទី២៤ ខែកញ្ញា កូរ៉េខាងត្បូងបានរាយការណ៍ថា កូរ៉េខាងជើង បានបាញ់សម្លាប់មន្ត្រីរូបនេះ នៅពេលកំពុងហែលទឹក ហើយថែមទៀតបានដុតសាកសពថែមទៀត។
ជាការឆ្លើយតប លោក គីម ជុងអ៊ុន បានសរសេរសំបុទ្រសុំទោសលោកមូន ចេអ៊ីន និងប្រជាជនកូរ៉េខាងត្បូង។ ជាពិសេសកូរ៉េខាងជើងបានបញ្ជាក់ថា ខ្លួនបានបាញ់មែន ដោយផ្នែកទៅតាមក្រមប្រតិបត្តិរបស់ខ្លួន ប៉ុន្តែខ្លួនមិនបានដុតសាកសពនោះទេ។ បើតាមទីក្រុងព្យុងយ៉ាង អ្វីដែលខ្លួនបានដុត គឺជាសម្ភារដែលនៅជាប់ខ្លួនបុរសនោះតែប៉ុណ្ណោះ ដូចវត្ថុអណ្តែតជាដើម៕