ថៃ អាចនាំចេញអង្ករទៅអឺរ៉ុបជិត២៥០០០តោនដោយមិនចាំបាច់បង់ពន្ធក្នុងខែតុលា

អន្តរជាតិ

ថៃ អាចនាំចេញអង្ករទៅអឺរ៉ុបជិត២៥០០០តោនដោយមិនចាំបាច់បង់ពន្ធក្នុងខែតុលា

02, Oct 2020 , 8:29 am

រូបភាព

ដោយ៖កង ម៉េងហុង

ថៃ កំពុងទទួលបានឱកាសល្អមួយក្នុងការបង្កើនការនាំចេញអង្ករទៅកាន់ទីផ្សារអឺរ៉ុប ក្រោយប្លុកមួយនេះអនុញ្ញាតឲ្យថៃនាំចូលអង្ករចំនួន ២៤៨៨៣ តោនដោយមិនគិតពន្ធនាំចូលឡើយសម្រាប់ខែតុលា។

លោក Keerati Rushchano អគ្គនាយកនៃអគ្គនាយកដ្ឋានពាណិជ្ជកម្មក្រៅប្រទេសរបស់ថៃ បាននិយាយថា គណៈកម្មការអឺរ៉ុបនៅថ្ងៃទី ២២ ខែកញ្ញាបានប្រកាសថា ចំនួនកូតាអង្ករសេសសល់ដែលថៃនាំអង្ករទៅអឺរ៉ុបប្រចាំឆ្នាំ នឹងមិនគិតពន្ធឡើយសម្រាប់ខែតុលា។ ចំនួនកូតាសេសសល់សម្រាប់អង្ករស អង្ករផ្កាម្លិះថៃ អង្ករក្រអូប និងអង្ករ parboiled ១០០ ភាគរយ ដែលមិនបាច់បង់ពន្ធសម្រាប់ខែតុលាអាចមានរហូតដល់ ២៤៨៨៣ តោន។

«ដោយមិនគិតពន្ធនាំចូលវាគឺជាឱកាសដ៏ល្អសម្រាប់ក្រុមហ៊ុននាំចេញអង្ករថៃក្នុងការបង្កើនការនាំចេញរបស់ពួកគេទៅកាន់ទីផ្សារអឺរ៉ុប»។ លោក Keerati និយាយបែបនេះ ដែលត្រូវបានផ្សាយដោយកាសែតបាងកកប៉ុស្តិ៍។ សហភាពអឺរ៉ុបបានកំណត់កូតានាំចូលអង្ករប្រចាំឆ្នាំចំនួន ៦៣០០០០ តោននៅឆ្នាំនេះ ហើយជាធម្មតាសហភាពអឺរ៉ុប គិតពន្ធនាំចូលចំនួន១៤៥ ផោនក្នុងអង្ករមួយតោន។

ដើម្បីចំណេញពីការមិនយកពន្ធនេះ អ្នកនាំចេញអង្ករថៃ ត្រូវដាក់ពាក្យសុំអាជ្ញាប័ណ្ណនាំចូលក្នុងរយៈពេល ១០ ថ្ងៃដំបូងនៃខែតុលា។ ចំពោះបញ្ហានេះ លោក Keerati លើកឡើងថា ក្រុមហ៊ុននាំចេញអង្ករថៃដែលមានបំណងប្រើកូតាត្រូវតែដាក់ពាក្យសុំជាមុនវិញ្ញាបនបត្រសម្រាប់ការនាំចេញអង្ករទៅកាន់សហភាពអឺរ៉ុបតាមរយៈនាយកដ្ឋានរបស់។ លោកក៏បានបន្តទៀតថា អ្នកនាំចេញអាចដាក់ពាក្យស្នើសុំវិញ្ញាបនបត្រចាប់ពីថ្ងៃទី ២៩ ខែកញ្ញាដល់ថ្ងៃទី ១៤ ខែតុលាដោយមិនគិតថ្លៃពិសេសអ្វីឡើយ។

ប្រភពព័ត៌មានដដែលបន្តថា ក្នុងរយៈពេល ៨ ខែដើមឆ្នាំ ២០២០ ប្រទេសថៃបាននាំចេញអង្ករចំនួន ១៤៦៣៦២ តោនគិតជាទឹកប្រាក់ចំនួន ១៤០ លានដុល្លារអាមេរិកទៅកាន់សហគមន៍អឺរ៉ុប។ ក្នុងឆ្នាំ ២០១៩ ប្រទេសថៃបាននាំចេញអង្ករចំនួន ៤០៥២៦៣ តោនទៅកាន់សហភាពអឺរ៉ុបដែលមានតម្លៃ ៣១៥ លានដុល្លារពោលគឺកើនឡើងពី ៣៩៩៥១៩ តោនមានតម្លៃ ២៩៦ លានដុល្លារនៅឆ្នាំ ២០១៨ ។

ទាក់ទិននឹងការនាំចេញនេះដែរ លោក Charoen Laothammatas ប្រធានសមាគមអ្នកនាំចេញអង្ករថៃបានមានបញ្ជាក់ថា ការនាំចេញអង្កររបស់ថៃទៅកាន់សហភាពអឺរ៉ុបទំនងជានឹងធ្លាក់ចុះចាប់ពីឆ្នាំ ២០១៩ ដោយសារតែផលប៉ះពាល់នៃជំងឺ COVID-19 ដែលធ្វើឲ្យតម្រូវការអង្ករចុះខ្សោយនៅតាមភោជនីយដ្ឋាននិងសណ្ឋាគារ៕