COVID-19
អន្តរជាតិ
ប្រមុខ UN ស្នើប្រទេសនានាបញ្ចេញលុយពីកញ្ចប់ថវិកាជាតិដើម្បីជួយមូលនិធិវ៉ាក់សាំង Covid 19 អគ្គលេខាធិការអង្គការសហប្រជាជាតិ អាន់តូនីញ៉ូ ហ្គូតេរ៉េស ថ្លែងក្នុងកិច្ចប្រជុំមហាសន្និបាតលើកទី៧៥ ។ រូបភាព Xinhua
×
ដោយ៖កង ម៉េងហុង
អគ្គលេខាធិការអង្គការសហប្រជាជាតិ (UN) លោក អាន់តូនីញ៉ូ ហ្គូតេរ៉េស បាននិយាយនៅថ្ងៃពុធទី ៣០ ខែកញ្ញា ថា វាដល់ពេលហើយដែលប្រទេសនានាត្រូវចាប់ផ្តើមប្រើប្រាស់ថវិកាពីកញ្ចប់ស្តារប្រទេសរបស់ខ្លួនដើម្បីគាំទ្រផែនការវ៉ាក់សាំងសកលរបស់អង្គការសុខភាពពិភពលោក។
បើតាមទីភ្នាក់ព័ត៌មាន Reuters កម្មវិធី ACT-Accelerator និងគម្រោង COVAX របស់អង្គការសុខភាពពិភពលោកក្នុងការចែកចាយវ៉ាក់សាំងឲ្យប្រទេសក្រីក្រ ទទួលបានថវិកាត្រឹម៣ពាន់លានដុល្លារអាមេរិកប៉ុណ្ណោះ។ ចំនួននេះមិនគ្រប់គ្រាន់សម្រាប់បំពេញតម្រូវការឡើយ ដោយត្រូវការថវិកាចំនួន ៣៥ពាន់លានដុល្លារអាមេរិកបន្ថែមទៀត។
ដើម្បីបំពេញកង្វះខាតនេះ អគ្គលេខាធិការ UN លោក អាន់តូនីញ៉ូ ហ្គូតេរ៉េស បានស្នើឲ្យប្រទេសទាំងអស់បញ្ចេញថវិការបស់ខ្លួនឲ្យបានច្រើន។ ថ្លែងក្នុងកម្មវិធីមួយនៅថ្ងៃទី៣០ ខែកញ្ញា លោក ហ្គូតេរ៉េស អះអាងថា កម្មវិធីផ្គត់ផ្គង់វ៉ាក់សាំង ត្រូវបានលុយចំនួន១៥ពាន់លានដុល្លារជាបន្ទាប់ដើម្បីធានាថា ឱកាសនៃការទទួលបានវ៉ាក់សាំងដំបូង និងមានប្រសិទ្ធភាព នៅតែបើកចំហរ។
«សូមបញ្ជាក់ឲ្យច្បាស់ថា យើងមិនអាចទៅដល់ទីនោះ ដោយគ្រាន់តែម្ចាស់ជំនួយបញ្ចេញលុយពីកញ្ចប់ជំនួយអភិវឌ្ឍមួយមុខឡើយ។ យើងត្រូវគិតឲ្យបានទូលាយ។ វាដល់ពេលហើយដែលប្រទេសនានាដកលុយចេញពីកម្មវិធីស្ដារឡើងវិញរបស់ខ្លួន។» លោក ហ្គូតេរ៉េស បញ្ជាក់បែបនេះ ជាមួយនឹងការសម្គាល់ទៀតថា ប្រទេសអភិវឌ្ឍ ចាយប្រាក់រាប់ពាន់លានដុល្លារលើការស្តារសេដ្ឋកិច្ច និងសង្គមដែលរងគ្រោះដោយ Covid 19 ហើយដូចនេះពួកគេអាចចេញមួយភាគតូចនៃផែនការនោះដើម្បីបញ្ឈប់ការរីករាលដាលនៃជំងឺនេះនៅទីកន្លែងឯទៀត។
ប្រមុខ UN បន្តថា កម្មវិធី ACT-Accelerator បានផ្តល់មធ្យោបាយតែមួយគត់ និងមានសុវត្ថិភាពដើម្បីបើកដំណើរការសេដ្ឋកិច្ចសកលឲ្យបានឆាប់តាមដែលអាចធ្វើទៅបាន។ លើសពីនេះទៅទៀត លោកក៏ហាក់មានសង្ឃឹមតិចតួចលើការប្រឹងប្រែងរកវ៉ាក់សាំងនៅក្នុងប្រទេសមួយចំនួនតូច ព្រោះវានឹងមិនអាចមានលទ្ធភាពក្នុងការបើកសេដ្ឋកិច្ចពិភពលោក និងស្តារជីវភាពរស់នៅឡើងវិញទេ។
រដ្ឋមន្ត្រីក្រសួងការបរទេសអង់គ្លេសលោក Dominic Raab ក៏បានគាំទ្រចំពោះការលើកឡើងរបស់លោក ហ្គូតេរ៉េស។ ក្នុងកិច្ចប្រជុំខាលើ ប្រមុខការទូតអង់គ្លេសរូបនេះ បានជំរុញឲ្យប្រទេសដទៃទៀតចូលរួមក្នុងការប្រឹងប្រែងជាសកលដើម្បីប្រយុទ្ធប្រឆាំងនឹងជំងឺ COVID-19 ហើយកម្មវិធី ACT-Accelerator ជាក្តីសង្ឃឹមដ៏ល្អបំផុតដែលធ្វើអោយការរីករាលដាលនៃជំងឺនេះស្ថិតក្នុងស្ថានភាពដែលអាចគ្រប់គ្រងបាន។
សូមបញ្ជាក់ថា គោលបំណងនៃកម្មវិធី ACT-Accelerator គឺការចែកចាយវ៉ាក់សាំងការពារជំងឺ Covid 19 ចំនួន២ពាន់លានដូសនៅដំណាច់ឆ្នាំក្រោយ ហើយផ្តល់ការព្យាបាលមនុស្សចំនួន ២៤៥ លាននាក់និងការធ្វើតេស្ត ៥០០លានដង៕
Tag:
UN
អាន់តូនីញ៉ូ ហ្គូតេរ៉េស
COVID-19
© រក្សាសិទ្ធិដោយ thmeythmey.com