អន្តរជាតិ
រូបភាព Bangkok Post
×![]()
ដោយ៖កង ម៉េងហុង
នៅថ្ងៃទី១ ខែតុលា តួកគីបានឈានចូលដល់យុគសម័យថ្មីក្នុងការគ្រប់គ្រងបណ្ដាញសង្គមដូចជា Facebook និង Twitter ជាដើម ដែលត្រូវបានមើលឃើញថា មានការរឹតត្បិតខ្លាំង។ បណ្ដាញសង្គមទាំងនេះ អាចបាត់មុខពីតួកគីក្នុងករណីពួកគេមិនបានលុបការបង្ហោះដែលមានខ្លឹមសារចម្រូងចម្រាស។
បើតាមទីភ្នាក់ងារព័ត៌មាន AFP ច្បាប់ថ្មីគ្របដណ្ដប់លើបណ្ដាញសង្គម បានឆ្លងសភាដែលគ្រប់គ្រងដោយគណបក្ស AKP កំពុងកាន់អំណាចរបស់ប្រធានាធិបតី Recep Tayyip Erdogan យ៉ាងរហ័ស។ ការធ្វើច្បាប់នេះ កើតឡើងក្រោយរដ្ឋាភិបាលក្រុងអង់ការ៉ាចាត់វិធានការក្ដៅលើកាសែតប្រឆាំង និងបណ្តាប៉ុស្តិ៍ទូរទស្សន៍នានាដែលមិនស្របតាមរដ្ឋាភិបាល។
ក្នុងច្បាប់ថ្មីមួយនេះ បណ្ដាញសង្គមដែលជាវេទិកាមានអ្នកប្រើប្រាស់ប្រចាំថ្ងៃច្រើនជាងមួយលាននាក់ត្រូវតែបើកការិយាល័យនៅតួកគីដើម្បីអាចធ្វើការជាមួយអាជ្ញាធរក្នុងការលុបមាតិកាណាដែលបំពានក្នុងរយៈពេល ៤៨ ម៉ោង។ បើមិនលុបការបង្ហោះដែលបានបំពានច្បាប់នោះ ពួកគេប្រឈមនឹងការហាមឃាត់ការផ្សាយពាណិជ្ជកម្ម ការពិន័យជាប្រាក់រហូតដល់ទៅ ៥,១ លានដុល្លារ និង ការកាត់បន្ថយទំហំអ៊ីធឺណិតរហូតដល់ ៩០ ភាគរយដែលនេះធ្វើឲ្យប៉ះពាល់ការប្រើប្រាស់ទៀតផង។
លើសពីនោះ ក្រុមហ៊ុនបណ្ដាញសង្គម ត្រូវចាត់វិធានការចាំបាច់ដើម្បីរក្សាទិន្នន័យអ្នកប្រើក្នុងស្រុកផងដែរ។ បច្ចុប្បន្ន ការចូលប្រើគេហទំព័រ និងមាតិកាមួយចំនួន រងការរឹតត្បិតដោយផ្នែកខ្លះទៅហើយនៅក្នុងប្រទេសដែលមានប្រជាជន៨៣លាននាក់នេះ។
ទាក់ទិននឹងការដាក់ចេញច្បាប់ថ្មីនេះ គេក៏ឃើញមានបណ្តាស្ថាប័នជាច្រើនបានបង្ហាញការព្រួយបារម្ភផងដែររួមទាំង Facebook ផង។ មន្ត្រីទទួលបន្ទុកសិទ្ធិមនុស្សរបស់ Facebook លោក Iain Levine បានសរសេរលើ Twitter របស់ខ្លួន ច្បាប់ថ្មីបង្កើនការព្រួយបារម្ភជាច្រើនអំពីបញ្ហាសិទ្ធិមនុស្ស។ ចំណែកនាយកអង្គការឃ្លាំមើលសិទិ្ធមនុស្សសម្រាប់តួកគី Emma Sinclair-Webb លើកឡើងថា សព្វថ្ងៃ វាពិតជាមិនអាចទៅរួចទេដែលក្នុងប្រទេសមួយដូចតួកគីមានការគាបសង្កត់ប្រព័ន្ធផ្សព្វផ្សាយសង្គមយ៉ាងដូច្នេះ ខណៈបណ្តាញសង្គមជាផ្នែកមួយដ៏ធំនៃជីវិតរបស់មនុស្ស៕
© រក្សាសិទ្ធិដោយ thmeythmey.com
«គូលី»មានន័យច្បាស់លាស់ដូចម្តេច?
1 សប្តាហ៍
