អាមេនី ហៅទូតប្រចាំអ៊ីស្រាអែលចូលប្រទេសវិញ ដើម្បីតវ៉ាការលក់អាវុធឲ្យអាស៊ែបៃហ្សង់

សង្គមអន្តរជាតិ

អន្តរជាតិ

អាមេនី ហៅទូតប្រចាំអ៊ីស្រាអែលចូលប្រទេសវិញ ដើម្បីតវ៉ាការលក់អាវុធឲ្យអាស៊ែបៃហ្សង់

02, Oct 2020 , 4:01 pm

រូបភាព

ទាហានអាមេនី។ រូបភាព៖AFP

ដោយ:

រដ្ឋាភិបាលអាមេនី នៅថ្ងៃទី១ ខែតុលា បានកោះហៅឯកអគ្គរដ្ឋទូតរបស់ខ្លួននៅអ៊ីស្រាអែលឲ្យត្រឡប់ចូលប្រទេសវិញ ជាការតវ៉ាទៅនឹងការលក់អាវុធដោយអ៊ីស្រាអែលទៅឲ្យអាស៊ែបៃហ្សង់ដែលជាសត្រូវរបស់ខ្លួនកំពុងប្រយុទ្ធគ្នាជិតមួយសប្តាហ៍មកហើយនោះ។

ការប្រយុទ្ធគ្នារវាងអាមេនី និងអាស៊ែបៃហ្សង់ដែលផ្ទុះឡើងជាថ្មី កាលពីថ្ងៃទី២៨ ខែកញ្ញា បានរាលដាលជំពាក់ជំពិនដល់អ៊ីស្រាអែល បន្ទាប់ពីអាស៊ែបៃហ្សង់ទទួលស្គាល់ថាខ្លួនបានប្រើប្រាស់អាវុធដែលផលិតដោយអ៊ីស្រាអែល ក្នុងការប្រយុទ្ធគ្នាក្នុងតំបន់Nagorno-Karabakh។

ជាការតវ៉ាចំពោះការនាំចេញអាវុធរបស់អ៊ីស្រាអែលទៅអាស៊ែបៃហ្សង់ ក្រសួងការបរទេសអាមេនីបានកោះហៅឯកអគ្គរដ្ឋទូតរបស់ខ្លួនចូលប្រទេសវិញជាការតវ៉ា។ លោកស្រី Anna Naghdalyan អ្នកនាំពាក្យក្រសួងការបរទេសអាមេនីអះអាងថា៖«របៀបធ្វើការរបស់អ៊ីស្រាអែល មិនអាចទទួលយកបាន ហើយក្រសួង(ការបរទេស)ចាំបាច់ត្រូវតែហៅឯកអគ្គរដ្ឋទូតត្រឡប់មកវិញ»។

ចំណែកក្រសួងការបរទេសអ៊ីស្រាអែលវិញ បង្ហាញការសោកស្តាយចំពោះការហៅទូតអាមេនីត្រឡប់ទៅវិញ។ក្នុងសេចក្តីថ្លែងការណ៍របស់ខ្លួន អ៊ីស្រាអែលអះអាងថា ទំនាក់ទំនងជាមួយអាមេនីមានសារៈសំខាន់ ហើយស្ថានទូតអាមេនីនៅអ៊ីស្រាអែលដើរតួយ៉ាងសំខាន់ក្នុងការធ្វើឲ្យប្រសើរឡើងទំនាក់ទំនង សម្រាប់ផលប្រយោជន៍នៃប្រជាជនទាំងពីរ។

ជុំវិញព័ត៌មានលម្អិតពីអាវុធដែលអ៊ីស្រាអែលលក់ទៅអាស៊ែបៃហ្សង់ ទាំងក្រសួងការពារជាតិអាមេនី និងអ៊ីស្រាអែលបដិសេធមិនបញ្ចេញយោបល់។ ប៉ុន្តែយោងតាម SIPRI ដែលជាស្ថាប័នស្រាវជ្រាវ ខាងសន្តិសុខពិភពលោក អះអាងថាពីឆ្នាំ២០០៦ ដល់២០១៩ អ៊ីស្រាអែលបានលក់អាវុធឲ្យអាស៊ែបៃហ្សង់ដែលមានតម្លៃ៨២៥លានដុល្លារ។ អាវុធដែលលក់ចេញនោះមានដ្រូន ដ្រូនវាយប្រហារ មីស៊ីលកម្ទេចរថក្រោះ និងមីស៊ីលបាញ់ពីដីទៅអាកាស។

ចំពោះរឿងដ្រូនវិញ លោក Hikmat Hajiyev ទីប្រឹក្សាប្រធានាធិបតីអាស៊ែបៃហ្សង់ ប្រាប់សារព័ត៌មានWalla របស់អ៊ីស្រាអែលថា អាស៊ែបៃហ្សង់ប្រើប្រាស់ដ្រូនដែលផលិតដោយអ៊ីស្រាអែលមួយចំនួនក្នុងជម្លោះនៅតំបន់ Nagorno-Karabakh។ លោកថា ដ្រូនផលិតដោយអ៊ីស្រាអែលមានប្រសិទ្ធភាពក្នុងការឈ្លបយកការណ៍ និងការបាញ់ប្រហារ។

ចំណែកអាមេនីវិញ លោកនាយករដ្ឋមន្ត្រី Nikol Pashinyan បាននិយាយថា កងទ័ពប្រទេសលោក បានបាញ់ទម្លាក់ដ្រូន៤គ្រឿងដែលហោះចូលក្នុងដែនអាកាសអាមេនី។ ដ្រូនទាំងនោះត្រូវបានកងទ័ពអាមេនីអះអាងថា ហោះចូលក្នុងខេត្តចំនួនពីរដែលនៅជិតរដ្ឋធានីយ៉េរ៉េវ៉ា។

យោងតាមទីភ្នាក់ងារព័ត៌មានAFP គិតត្រឹមថ្ងៃទី៣០ ខែកញ្ញា ភាគីទាំងសងខាងទទួលស្គាល់ថា មានជនស៊ីវិលស្លាប់ច្រើនជាង១០០នាក់។ អាមេនីអះអាងថា អាស៊ែបៃហ្សង់មានទាហានស្លាប់ចំនួន១៣០នាក់ និងរបួសចំនួន២០០នាក់ ចំណែកខ្លួនមានទាហានស្លាប់១០៤នាក់ និងជនស៊ីវិល២៣នាក់។ អាស៊ែបៃហ្សង់វិញ អះអាងថាបានសម្លាប់ទាហានផ្តាច់ខ្លួនតំបន់ Nagorno-Karabakh ចំនួន២ពាន់៣រយនាក់៕