អន្តរជាតិ
កុមារអាយុ១១ឆ្នាំ ដើរចម្ងាយ២៧៣៥គីឡូម៉ែត្រពីអ៊ីតាលី ដើម្បីទៅជួបយាយខ្លួននៅអង់គ្លេស
×![]()
ដោយ: ធីតា
Romeo Cox យុវជនអង់គ្លេស១១ឆ្នាំ បានដើរពីក្រុង Palermo ប្រទេសអ៊ីតាលី ក្នុងចម្ងាយផ្លូវ២៧៣៥គីឡូម៉ែត្រ ដើម្បីទៅជួបជីដូនរបស់ខ្លួនដែលរង់នៅទីក្រុងឡុងដ៍ ប្រទេសអង់គ្លេស។ យោងតាមការផ្សាយរបស់ The Sun ឪពុកយុវជនវ័យក្មេងរូបនោះ ក៏បានដើរអមដំណើរជាមួយកូនខ្លួនផងដែរ។
ដោយសារតែការរាលដាលកូវីដ-១៩ ការធ្វើដំណើរឆ្លងប្រទេសមានលក្ខណៈស្មុគ្រស្មាញយ៉ាងខ្លាំង ជាពិសេសដំណើរតាមយន្តហោះ។ ជាងមួយឆ្នាំកន្លងមកនេះ Romeo បានផ្លាស់ទៅរស់នៅជាមួយឪពុកម្តាយនៅក្រុង Palermo ប្រទេសអ៊ីតាលី ប៉ុន្តេគេមានក្តីនឹករលឹកចំពោះជីដូនខ្លួនយ៉ាងខ្លាំង ដោយស្ត្រីវ័យ៧៧ឆ្នាំរូបនោះ រស់នៅតែម្នាក់ឯងនៅក្រុងឡុងដ៍ ប្រទេសអង់គ្លេស។
លោក Phil Cox ដែលមានអាជីពជាអ្នកសារព័ត៌មាន បានអះអាងប្រាប់កូនថា លោកនឹងកក់សំបុត្រយន្តហោះសម្រាប់ Romeo ប៉ុន្តែយុវជនវ័យ១១ឆ្នាំបែរជាផ្តួចផ្តើមគំនិតបែបកីឡាទៅវិញ។ គេបានស្នើឪពុកធ្វើដំណើរដោយថ្មើរជើងជាមួយខ្លួនចាប់ពីថ្ងៃទី២០ ខែមិថុនា លើចម្ងាយផ្លូវ២៧៣៥គីឡូម៉ែត្រ និងចំណាយពេល៩៣ថ្ងៃ។
ក្នុងដំណើរតាមផ្លូវ Romeo និងឪពុក បានជួបឧបសគ្គជាច្រើន ដូចជា នាំគ្នាគេងក្បែរសំបុកឃ្មុំ និងត្រូវបានឆ្កែដេញខាំនៅទីក្រុងរ៉ូម ជាដើម។ នៅថ្ងៃទី២១ ខែកញ្ញា ពួកគាត់បានទៅដល់គោលដៅ Trafalgar Square នៅទីក្រុងឡុងដ៍ ហើយត្រូវបានអាជ្ញាធរអង់គ្លេសតម្រូវឲ្យស្ថិតក្រោមវិធានចត្តាឡីស័ក មុននឹងអាចជួបជាមួយលោកយាយ Rosemary។
ជាមួយគ្នានេះផងដែរ ឪពុក និងកូន ទាំងពីរនាក់ ក៏ប្រមូលបានថវិកាសប្បុរសធម៌ជាច្រើនផងដែរ ដោយពួកគាត់បែងចែកចំណែកខ្លះយកទៅបរិច្ចាគដល់ជនភៀសខ្លួន ដល់សមាគមសារព័ត៌មានឯករាជ្យជាដើម។
យោងតាម The Sun លោក Phil Cox ដែលជាឪពុករបស់ Romeo គឺជាអ្នកកាសែតដ៏ល្បីម្នាក់ផងដេរ ដោយកាលពីខែធ្នូ ឆ្នាំ២០១៦ គាត់ធ្លាប់ទៅធ្វើបទយកការណ៍នៅតំបន់ Darfour ប្រទេសស៊ូដង់ ហើយត្រូវបានចាប់ជំរិត និងរងទារុណកម្មនៅក្នុងគុក Kobar មុននឹងត្រូវបានដោះលែងនៅខែកុម្ភៈ ឆ្នាំ២០១៧៕
© រក្សាសិទ្ធិដោយ thmeythmey.com
«គូលី»មានន័យច្បាស់លាស់ដូចម្តេច?
1 សប្តាហ៍
