ជាតិ
សង្គមជាតិ
×![]()
ដោយ: ឡាយ សុភាវតី
ភ្នំពេញ៖ កងកម្លាំងស្នងការនគរបាលខេត្តព្រះសីហនុ បានចុះឆែកឆេរទីតាំងភោជនីដ្ឋានមួយឈ្មោះ ស៊ីនខាយសៀនមិន ហើយឃាត់ខ្លួនជនជាតិចិនជាង៤០០នាក់ ដោយសង្ស័យថា ពួកគេ ពាក់ព័ន្ធនឹងគ្រឿងញៀន កាលពីយប់ថ្ងៃទី២៩ខែកញ្ញា ឆ្នាំ២០២០។ 
លោក ជួន ណារិន្ទ ស្នងការខេត្តព្រះសីហនុ ប្រាប់សារព័ត៌មានថ្មីៗ តាមទូរស័ព្ទនៅថ្ងៃទី២ ខែតុលានេះថា ការឃាត់ជនជាតិចិនជាង៤០០នេះ គឺជាប់ពាក់ព័ន្ធនឹងគ្រឿងញៀន ដោយសាររកឃើញគ្រឿងញៀនមួយចំនួនធំ រួមទាំងអាវុធមួយចំនួនទៀតផង។ យ៉ាងណា លោក ពុំបានលម្អិតព័ត៌មានឡើយថា ក្នុងចំណោមជនជាតិចិតទាំងនោះ មានប៉ុន្មាននាក់ ដែលប្រើប្រាស់គ្រឿងញៀន ហើយមានប៉ុន្មាននាក់ ដែលជួញដូរគ្រឿងញៀន។
លោកស្នងការ បន្តថា ក្រោមការសម្របសម្រួលពីតំណាងអយ្យការ សមត្ថកិច្ចបានចុះឆែកឆេរភោជនីយដ្ឋានស៊ីនខាយសៀនមិន ដែលមានម្ចាស់ជាជនជាតិចិន ក្នុងសង្កាត់៤ ក្រុងខេត្តព្រះសីហនុ។ លោក បន្ថែមថា ពេលនោះ សមត្ថកិច្ចបានឃាត់ខ្លួនជនជាតិចិនជាង៤០០នាក់ ហើយមកដល់ពេលនេះក្រុមជំនាញកំពុងរៀបចំសំណុំរឿងដើម្បីដោះស្រាយតាមនីតិវិធីច្បាប់។
«...ឃាត់ជនជាតិចិនទាំងហ្នឹង គឺបទល្មើសគ្រឿងញៀន ហើយក្រុមការងារកំពុងដោះស្រាយ»។ នេះបើជាប្រសាសន៍របស់លោកស្នងការខេត្តព្រះសីហនុ ដោយមិនបានបញ្ជាក់ឡើយថា វត្ថុតាងគ្រឿងញៀននិងអាវុធ ដែលរកឃើញ មានចំនួនប៉ុន្មាននោះទេ។
លឹម ប៊ុនហេង អ្នកនាំពាក្យអយ្យការអមសាលាដំបូងខេត្តព្រះសីហនុ មិនទាន់អាចធ្វើអត្ថាធិបប្បាយអ្វីឡើយ ដោយលោក ប្រាប់ថា សំណុំរឿងរបស់ជនជាតិនោះ មិនទាន់ត្រូវបានបញ្ជូនទៅតុលាការ៕
Tag:
សង្គម
គ្រឿងញៀន
ព្រះសីហនុ
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 4 ថ្ងៃ
