យុវជនវ័យ១៥ឆ្នាំ ដែលសមត្ថកិច្ចចាប់ ដោយសារចូលទីស្នាក់ការអតីតបក្សប្រឆាំង ត្រូវបានដោះលែងវិញ

ជាតិ

សង្គមជាតិ

យុវជនវ័យ១៥ឆ្នាំ ដែលសមត្ថកិច្ចចាប់ ដោយសារចូលទីស្នាក់ការអតីតបក្សប្រឆាំង ត្រូវបានដោះលែងវិញ

06, Oct 2020 , 10:49 am

រូបភាព

យុវជន កាក់ សុវណ្ណច្ឆ័យ ត្រូវចាប់ខ្លួន នៅទីស្នាក់ការអតីតគណបក្សសង្គ្រោះជាតិ កាលពីថ្ងៃទី៤ ខែុលា ឆ្នាំ២០២០ (រូបពីទំព័រហ្វេសប៊ុក Eng Chhai Eang)

ដោយ: សារព័ត៌មានថ្មីៗ

លោក សាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញ អះអាងថា យុវជន កាក់ សុវណ្ណច្ឆ័យ វ័យ១៥ឆ្នាំ ត្រូវបានដោះលែងវិញហើយ នៅព្រឹកថ្ងៃទី៦ ខែតុលា ឆ្នាំ២០២០។ យុវជនរូបនេះ ត្រូវសមត្ថកិច្ចចាប់ កាលពីរសៀលថ្ងៃទី៤ ខែតុលា បន្ទាប់ពីរូបគេ ចូលទៅក្នុងទីស្នាក់កាលកណ្តាលនៃអតីតគណបក្សសង្គ្រោះជាតិ ស្ថិតក្នុងសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។

លោក សាន សុខសីហា ប្រាប់មូលហេតុថា ការចាប់យុវជន កាក់ សុវណ្ណច្ឆ័យ គឺដោយសារតែសមត្ថកិច្ច ឃើញរូបគេ ផ្លោះចូលទីស្នាក់ការអតីតគណបក្សសង្គ្រោះជាតិ ជាទីតាំងដែលតុលាការ បង្គាប់ឲ្យបិទ។ លោក ថ្លែងថា៖«យើង ខ្លាចបាត់របស់ បាត់សម្ភារ ទើបយើងឃាត់គាត់ យកមកសួរនាំ ដល់ពេលអត់មានអី យើង ក៏ដោះលែងវិញទៅ»។

យុវជន កាក់ សុវណ្ណច្ឆ័យ ជាកូនរបស់លោក កាក់ កុម្ភារ ដែលជាអតីតសមាជិកក្រុមប្រឹក្សារាជធានីភ្នំពេញខាងអតីតគណបក្សសង្គ្រោះជាតិ។ លោក កាក់ កុម្ភារ ស្ថិតក្នុងចំណោមមន្ត្រីនិងសកម្មជនដទៃទៀតនៃអតីតគណបក្សសង្គ្រោះជាតិ ដែលកំពុងជាប់ឃុំ ក្រោមបទរួមគំនិតក្បត់ជាតិ និងបទញុះញង់ឲ្យប្រព្រឹត្តបទល្មើសជាអាទិ៍បង្កឲ្យមានភាពវឹកវរដល់សន្តិសុខសង្គម។

លោក សំ សុគង់ មេធាវីរបស់លោក កាក់ កុម្ភារ មានប្រសាសន៍ថា ទីស្នាក់ការអតីតគណបក្សសង្គ្រោះជាតិ មិនបានបិទជិតទាំងស្រុងនោះទេ ដោយនៅមានប្រឡោះខ្លះ អាចចូលបាន។
លោក បន្តថា យុវជន កាក់ សុវណ្ណច្ឆ័យ បានដើរកាត់ទីស្នាក់ការ ហើយក៏ឃើញទង់ជាតិ និងទង់គណបក្ស នៅរប៉ាត់រប៉ាយ ហើយចូលតាមប្រឡោះរបង ទៅក្នុងទីស្នាក់ការ ដើម្បីប្រមូលទង់ទាំងនោះ។ លោកមេធាវី ថ្លែងមកកាន់សារព័ត៌មានថ្មីៗថា៖«គាត់ អត់យកអីទេ»។

កាលពីដើមឆ្នាំ២០១៨ តុលាការរាជធានីភ្នំពេញ បានរឹបអូសជាបណ្តោះអាសន្តនូវទីស្នាក់ការអតីតគណបក្សសង្គ្រោះជាតិ ដែលជាកម្មសិទ្ធិរបស់លោក សម រង្ស៊ី។ ការរឹបអូសនេះ គឺដោយសារតែលោក សម រង្ស៊ី អតីតប្រធានគណបក្សសង្គ្រោះជាតិ ដែលកំពុងរស់នៅក្នុងប្រទេសបារាំង មិនព្រមបង់ប្រាក់សងជំងឺចិត្តដល់សម្តេចនាយករដ្ឋមន្ត្រី ហ៊ុន សែន និងសម្តេច ហេង សំរិន ប្រធានរដ្ឋសភា។

ក្នុងដីកា តុលាការ បានប្រាប់លោក សម រង្ស៊ី ថា៖«ដើម្បីឲ្យមានការលុបចោលនូវការរឹបអូសនេះ លោក សម រង្ស៊ី ត្រូវផ្ញើប្រាក់តម្កល់នៅតុលាការរាជធានីភ្នំពេញ ចំនួន៤២៥0 លានរៀល ជាប្រាក់រម្តោះ»៕