CPP និង LDP ដាក់ភ្នាក់ងារសង្កេតមើលការពិនិត្យបញ្ជីឈ្មោះ និងការចុះឈ្មោះបោះឆ្នោត ច្រើនជាងគេ

ជាតិ

នយោបាយជាតិ

CPP និង LDP ដាក់ភ្នាក់ងារសង្កេតមើលការពិនិត្យបញ្ជីឈ្មោះ និងការចុះឈ្មោះបោះឆ្នោត ច្រើនជាងគេ

06, Oct 2020 , 4:52 pm

រូបភាព

ដោយ: សារព័ត៌មានថ្មីៗ

គណៈកម្មាធិការជាតិរៀបចំការបោះឆ្នោត (គ.ជ.ប) បានចេញសេចក្តីប្រកាសព័ត៌មានស្តីពីភ្នាក់ងារគណបក្សនយោបាយដែលបានដាក់ពាក្យស្នើសុំសង្កេតមើលការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០២០។ គិតត្រឹមថ្ងៃទី៥ ខែតុលា ភ្នាក់ងារគណបក្សមានជាង៨៥០០នាក់ ក្នុងនោះពេញសិទ្ធិជិត២៩០០នាក់ និងបម្រុងជាង៥៦០០នាក់ ដោយគណបក្សប្រជាជនកម្ពុជា (CPP) និងគណបក្សសម្ព័ន្ធដើម្បីប្រជាធិបតេយ្យ (LDP) មានចំនួនច្រើនជាងគេ។

តាមគ.ជ.ប គណបក្សចំនួន៥ហើយដែលបានដាក់ភ្នាក់ងារសង្កេតមើលការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០២០។ គណបក្សប្រជាជនកម្ពុជា មានបេក្ខជនពេញសិទ្ធិជាង១៦០០នាក់ និងបម្រុងជាង២១០០នាក់ ខណៈគណបក្សសម្ព័ន្ធដើម្បីប្រជាធិបតេយ្យ មានបេក្ខជនពេញសិទ្ធិជាង១០០០នាក់ និងបម្រុងជិត៣៤០០នាក់។

គណបក្សបីផ្សេងទៀតដែលដាក់ភ្នាក់ងារសង្កេតការផងដែរនោះ មាន គណបក្សខ្មែររួបរួមជាតិ (ពេញសិទ្ធិ១៧២នាក់ បម្រុង១០៤នាក់), គណបក្សហ្វ៊ុនស៊ិនប៉ិច (ពេញសិទ្ធិ៨នាក់ បម្រុង៩នាក់) និងគណបក្សយុវជនកម្ពុជា (ពេញសិទ្ធិ១នាក់)។

គ.ជ.ប បានលើកឡើងពីក្រមសីលធម៌សម្រាប់គណបក្សនយោបាយ បេក្ខជន និងភ្នាក់ងារគណបក្ស ពោលគឺប្រការដែលត្រូវហាមឃាត់ ដូចជា ការរារាំងពលរដ្ឋមិនឲ្យទៅចុះឈ្មោះបោះឆ្នោត ការណែនាំ ឬស្តីបន្ទោសមន្ត្រីចុះឈ្មោះបោះឆ្នោត ការជ្រៀតជ្រែក ការអុកឡុក បង្កការរំខាន ការនិយាយដោយផ្ទាល់មាត់ ឬប្រយោល ឬជាលាយលក្ខណ៍អក្សរក្នុងន័យប្រមាថមាក់ងាយផ្សេងៗ។

សេចក្តីប្រកាសព័ត៌មានស្តីពីលទ្ធផលបណ្តោះអាសន្នថ្ងៃទី៥ នៃការចុះបញ្ជីឈ្មោះ និងការចុះឈ្មោះបោះឆ្នោតឆ្នាំ២០២០ បង្ហាញថា ពលរដ្ឋដែលបានចុះឈ្មោះថ្មីមានជាង១៨០០០នាក់ អ្នកដែលនឹងត្រូវលុបឈ្មោះចេញពីបញ្ជី មានជាង២២ ០០០នាក់ អ្នកដែលកែតម្រូវទិន្នន័យ មានជាង១៨ ០០០នាក់ និងអ្នកផ្ទេរលំនៅមានជាង១៩ ០០០នាក់។

ការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០២០ ប្រព្រឹត្តទៅពីថ្ងៃទី១ ដល់ថ្ងៃទី១៩ ខែតុលា។ ពលរដ្ឋដែលទើបគ្រប់អាយុ១៨ឆ្នាំ (កើតមុន ឬកើតត្រឹមថ្ងៃទី១ ខែមករា ឆ្នាំ២០០៣) អាចទៅចុះឈ្មោះបោះឆ្នោតបានហើយ៕