ជាតិ
កីឡាជាតិ
MMA៖ តក់ សោភ័ណ្ឌ ត្រៀមប៉ះកីឡាករម្ចាស់ផ្ទះម៉ាឡេស៊ីម៉ោង ៦ យប់នេះ អ្នកប្រដាល់យុទ្ធសិល្ប៍ចម្រុះ តក់ សោភ័ណ្ឌ របស់កម្ពុជា ត្រៀមខ្លួនឡើងសង្វៀនប៉ះកីឡាករ Saiful Merican របស់ម្ចាស់ផ្ទះម៉ាឡេស៊ី ក្នុងប្រភេទទម្ងន់ ៥៦,៦ គីឡូក្រាម នៅសង្វៀន Putra Stadium ក្នុងការប្រកួត MMA របស់ One FC កណ្ដាលទីក្រុងកូឡាឡាំពួរ វេលាម៉ោង ៦ យប់ថ្ងៃទី ១៥ វិច្ឆិកានេះ ស្របពេលទូរទស្សន៍ MY TV នឹងធ្វើការផ្សាយបន្តផ្ទាល់។
ចំពោះ តក់ សោភ័ណ្ឌ នេះជាលើកដំបូងហើយដែលចេញទៅឡើងសង្វៀននៅក្រៅប្រទេសក្នុងនាមជាកីឡាករ MMA។ បើនិយាយពីប្រវត្តិប្រដាល់កាលនៅជាកីឡាករក្បាច់ខ្មែរបុរាណ ត្រឹមវ័យត្រឹម ២១ ឆ្នាំ តក់ សោភ័ណ្ឌ ធ្លាប់ឡើងសង្វៀនប្រកួតឈ្នះ ៥០ដង ចាញ់១៤ដង និងស្មើ១ដង។ ២ ប្រកួតក្នុង ការប្រកួតក្បាច់ប្រដាល់ចម្រុះរបស់គេ ឈ្នះទាំង ២ លើក ពោលគឺឈ្នះ Dave Newbrook របស់អង់គ្លេសកាលខែឧសភា និង ឈ្នះកីឡាករ សុខ ចិន្ដា កាលខែកញ្ញាកន្លងទៅ នៅសង្វៀន ស៊ីធីអិន។
ចំណែកឯកីឡាករជាតិម៉ាឡេស៊ី Saiful Merican វិញធ្លាប់ហ្វឹកហាត់ប្រដាល់ថៃ (Mauy Thai) តាំងពីអាយុ១២ឆ្នាំ មកម៉្លេះ ដោយកំណត់ត្រាឡើងសង្វៀនបាន ១២៥ លើកមុនប្ដូមកប្រកួត MMA។ យោងតាមគេហទំព័រ hefightnation.com កីឡាករម៉ាឡេស៊ី វ័យ ២៤ ឆ្នាំរូបនេះធ្លាប់ឡើងប្រកួត MMA ចំនួន ២ លើករួចមកហើយ ដោយប្រកួតដំបូងចាញ់មិត្តរួមជាតិ Gianni Subba ត្រឹមទឹកទី២ និង ប្រកួតចុងក្រោយឈ្នះកីឡាករ Aditya Deshpande ដោយពិន្ទុ។
កីឡាករ តក់ សោភ័ណ្ឌ ជាអ្នកប្រយុទ្ធ MMA ឆ្លងដែនទី៣ របស់កម្ពុជាហើយ ដែលទៅឡើងសង្វៀនក្នុងព្រឹត្តិការណ៍ One Fighting Championship នៅឯក្រៅប្រទេស បន្ទាប់ពី កីឡាករ ឡុង សុភី ជាកីឡាករដំបូងតែចាញ់ កីឡាករឥណ្ឌូណេស៊ី ត្រឹមទឹកទី២ និង កីឡាករ ឃឹម ឌីម៉ា ប្រកួតជាមួយកីឡាករហ្វីលីពីន តែលទ្ធផលត្រូវចាត់ទុកជាមោឃៈ។
មានតែរង់ចាំមើលនៅយប់នេះទេថា តើ តក់ សោភ័ណ្ឌ ដើរតាមផ្លូវ រាមច្បងទាំង ២ ឬ ជ្រើសផ្លូវឈ្នះសម្រាប់ខ្លួនឯង?
រូបថត ONE Fighting Championship © រក្សាសិទ្ធិដោយ thmeythmey.com