សង្គមអន្តរជាតិ
អន្តរជាតិ
លោក អាន់វ៉ា ត្រូវប៉ូលិសកោះហៅរឿងបញ្ជីឈ្មោះសមាជិកសភាគាំទ្រលោកធ្វើនាយករដ្ឋមន្ត្រី មេដឹកនាំបក្សប្រឆាំង លោក អាន់វ៉ា អ៊ីប្រាហ៊ីម ថ្លែងអំឡុងសន្និសីទព័ត៌មានមួយ នៅថ្ងៃទី ១៣ ខែតុលា ឆ្នាំ២០២០ ។ រូបភាព៖ AFP
× ប៉ូលិសម៉ាឡេស៊ី នោថ្ងៃទី ១៥ ខែតុលា បានអះអាង ពួកគេបានកោះហៅមេដឹកនាំបក្សប្រឆាំង លោក អាន់វ៉ា អ៊ីប្រាហ៊ីម ដើម្បីឆ្លើយបំភ្លឺពាក់ព័ន្ធបញ្ជីឈ្មោះសមាជិកសភាដែលបញ្ជាក់ថាគាំ ទ្រលោកឡើងធ្វើជានាយករដ្ឋមន្ត្រី។ បញ្ជីឈ្មោះនេះ បានបែកធ្លាយលើបណ្ដាញសង្គមម៉ាឡេស៊ី ហើយត្រូវបានអ្នកលេងអ៊ីនធឺណិតចែកចាយយ៉ាងសុសសាយ។ ក្រោយលេចធ្លាយបញ្ជីឈ្មោះនេះ ប៉ូលិសអះអាងថាទទួលពាក្យបណ្ដឹងជាង១០០ហើយ។
ប្រធាននាយកដ្ឋានស៊ើបអង្កេតផ្នែកព្រហ្មទណ្ឌម៉ាឡេស៊ី លោក Huzir Mohamed បានបញ្ជាក់ក្នុងសេចក្តីថ្លែងការណ៍ថា លោក អាន់វ៉ា អ៊ីប្រាហ៊ីម ត្រូវបានកោះហៅឲ្យផ្ដល់ចម្លើយនៅប៉ុស្តិ៍ប៉ូលីស នាថ្ងៃទី ១៦ ខែតុលា ក្រោយមានពាក្យបណ្ដឹងជុំវិញបញ្ជីឈ្មោះសមាជិកសភាទាំង១២១នាក់បែកធ្លាយលើបណ្ដាញសង្គម ដែលបានអះអាងថា ពួកគេគាំទ្រលោកអាន់វ៉ាបង្កើតរដ្ឋាភិបាលថ្មី។
«មកទល់ពេលនេះ ប៉ូលិសទទួលបានពាក្យបណ្ដឹងសរុប១១៣ហើយ»។ លោក Huzir បញ្ជាក់បែបនេះ ដោយត្រូវបានដកស្រង់ចុះផ្សាយរបស់ទីភ្នាក់ងារព័ត៌មាន Reuters ។
ប៉ូលិសម៉ាឡេស៊ី ពុំបានលម្អិតលើបញ្ហាប្ដឹងផ្ដល់ទាំងនេះឡើយ ក៏ប៉ុន្តែលោក Huzir បានលើកឡើងថា ការស៊ើបអង្កេតនេះ ត្រូវបានធ្វើឡើងដោយអនុលោមតាមច្បាប់ព្រហ្មទណ្ឌ និងច្បាប់ប្រព័ន្ធផ្សព្វផ្សាយ។ ទោសទណ្ឌសម្រាប់បទល្មើសទាំងនេះ អាចប្រឈមជាប់គុករហូតដល់២ឆ្នាំ និងពិន័យជាប្រាក់។
លោក អាន់វ៉ា កាលពីថ្ងៃទី១៣ ខែតុលា បានចូលគាល់ស្ដេចម៉ាឡេស៊ី ក្នុងគោលដៅបង្ហាញទ្រង់ថាលោកពិតជាមានការគាំទ្រសំឡេងភាគច្រើនគ្រប់គ្រាន់ក្នុងសភា ដើម្បីឡើងកាន់ជំនួសលោកនាយករដ្ឋមន្ត្រីម៉ាឡេស៊ីបច្ចុប្បន្ន Muhyiddin Yassin និងបង្កើតរដ្ឋាភិបាលថ្មី។
នៅសន្និសីទព័ត៌មានមួយ ក្រោយជំនួបជាមួយមហាក្សត្ររួច មេដឹកនាំបក្សប្រឆាំង អាន់វ៉ា បាននិយាយថា លោកមានសំឡេងគាំទ្រពីសមាជិកសភាជាង១២០នាក់ឲ្យលោកឡើងកាន់តំណែងជាប្រមុខរដ្ឋាភិបាល ។ យ៉ាងណាមិញ ខាងរាជវាំងម៉ាឡេស៊ី ក្រោយមក បានអះអាងថា លោក អាន់វ៉ា បានផ្ដល់តែតួលេខសមាជិកសភាដែលបញ្ជាក់ថាគាំទ្រលោកប៉ុណ្ណោះ តែមិនបង្ហាញអត្តសញ្ញាណសមាជិកសភាទាំងនោះឡើយ៕
Tag:
ម៉ាឡេស៊ី
អាន់វ៉ា អ៊ីប្រាហ៊ីម
© រក្សាសិទ្ធិដោយ thmeythmey.com