COVID-19
សង្គមអន្តរជាតិ
អន្តរជាតិ
ក្រុមប្រទេសG-20 ព្រមលើកពេលសងបំណុល៦ខែទៀតសម្រាប់ប្រទេសក្រីក្រ ការចែកម្ហូបអាហារជូនពលរដ្ឋក្រីក្រនៅឥណ្ឌា អំឡុងវិបត្តិកូវីដ-១៩ កាលពីខែឧសភា ឆ្នាំ២០២០ ។ រូបភាព៖AFP
× ក្រុមប្រទេស G-20 ដែលតំណាងឲ្យសេដ្ឋកិច្ចធំបំផុតបស់ពិភពលោក បានយល់ព្រមពន្យារពេលការសងបំណុល ៦ ខែទៀត ដើម្បីគាំទ្របណ្ដាប្រទេសងាយរងគ្រោះបំផុតក្នុងកិច្ចប្រឹងប្រែងពួកគេប្រឆាំងជំងឺរាតត្បាតសកលកូវីដ-១៩ ។
ក្នុងសេចក្តីថ្លែងការណ៍រួម នៅថ្ងៃទី១៤ ខែតុលា ក្រោយជំនួបតាមអនឡាញ ក្រុមប្រទេស G-20 បញ្ជាក់ថា ការអនុគ្រោះលើការសងបំណុលជាសាច់ប្រាក់ ១៤ពាន់លានដុល្លារ ដែលកំណត់ត្រូវបង់នាចុងឆ្នាំ២០២០នេះ នឹងត្រូវពន្យារពេល៦ខែទៀត។
ការសម្រេចចិត្តនេះមានន័យថា ប្រទេសកំពុងអភិវឌ្ឍ នឹងមានពេលរហូតដល់ចុងខែមិថុនា ឆ្នាំ២០២១ ដើម្បីបង្វែរលុយដែលត្រូវបង់បំណុលនេះទៅផ្តោតសំខាន់លើការចំណាយលើការថែទាំសុខភាព និងកម្មវិធីជំនួយហិរញ្ញវត្ថុនានាជំនួសវិញ។
តាមការចុះផ្សាយរបស់ទីភ្នាក់ងារព័ត៌មាន Kyodo រដ្ឋមន្ត្រីហិរញ្ញវត្ថុនៃប្រទេស G-20 បានអះអាងទៀតថា ពួកគេនឹងជួបពិភាក្សាគ្នានាខែមេសាឆ្នាំក្រោយម្ដងទៀត ដើម្បីសម្រេចថា តើគួរចាំបាច់លើកពេលសងបំណុល៦ខែទៀតឬយ៉ាងណា។ ម្យ៉ាងវិញទៀត ក្រុមប្រទេសG-20 ក៏ទទូចឲ្យម្ចាស់កម្ចីឯកជនចូលរួមជាមួយគំនិតផ្ដួចផ្ដើមរបស់ខ្លួនក្នុងការផ្អាកការសងបំណុលបណ្ដោះអាសន្នរបស់អ្នកជំពាក់នេះនេះ។
កម្មវិធីអនុគ្រោះបំណុលនេះ បានចាប់ផ្ដើមក្នុងខែឧសភាកន្លងទៅដោយក្រុមប្រទេស G-20 និងក្រុមប្រទេសម្ចាស់បំណុល Paris Club ដែលមានគោលដៅអនុញ្ញាតឲ្យប្រទេសក្រីក្រចំណាយលុយបន្ថែមលើការប្រយុទ្ធប្រឆាំងវិបត្តិសុខភាពសាធារណៈជាជាងសងបំណុល។
ក្រុមប្រទេស G-20 ដែលត្រូវបង្កើតឡើងក្នុងឆ្នាំ១៩៩៩ មានសមាជិកដូចជា អាហ្សង់ទីន អូស្ត្រាលី ប្រេស៊ីល ចក្រភពអង់គ្លេស កាណាដា ចិន បារាំង អាល្លឺម៉ង់ ឥណ្ឌា ឥណ្ឌូណេស៊ី អ៊ីតាលី ជប៉ុន ម៉ិកស៊ិក រុស្ស៊ី អារ៉ាប៊ីសាអូឌីត អាហ្វ្រិកខាងត្បូង កូរ៉េខាងត្បូង តួកគី សហរដ្ឋអាមេរិក និងសហភាពអឺរ៉ុប៕
Tag:
G-20
បំណុល
កូវីដ-១៩
© រក្សាសិទ្ធិដោយ thmeythmey.com