កាលពីពេលថ្មីៗកន្លងមកនេះ Disney បានបញ្ចេញ Trailer លើកដំបូងតាមរយៈឆាណែល Youtube របស់ខ្លួន។ ក្នុងការផលិតរឿងគំនូរជីវចលនេះ Disney បានចុះសិក្សាស្វែងយល់ពីវប្បធម៌នៅតំបន់អាស៊ីអាគ្នេយ៍ ដែលក្នុងនោះមានកម្ពុជា ឡាវ ថៃ វៀតណាម សិង្ហបុរី ឥណ្ឌូណេស៊ី និងហ្វីលីពីន។
 

 

រឿង Raya and the Last Dragon ស្ថិតក្រោមការដឹកនាំដោយផលិតករអាមេរិក Don Hall ដែលឈ្នះពានអូស្ការសម្រាប់ Big Hero 6 រួមជាមួយផលិតករអាមេរិក-ម៉ិកស៊ិក Carlos López Estrada លោក Osnat Shurer និងលោក Peter Del Vecho។ លោក Qui Nguyen សញ្ជាតិវៀតណាម-អាមេរិក និងលោកស្រី Adele Lim សញ្ជាតិម៉ាឡេស៊ី-អាមេរិក ជាសហអ្នកនិពន្ធ។

 

Raya ជាតួអង្គសំខាន់ក្នុងរឿង និងជាព្រះនាងនៃនគរ Kumandra ដែលជាដែនដីសិប្បនិម្មិតមួយក្នុងសាច់រឿង។ តួអង្គនេះ ត្រូវបានបញ្ចូលសំឡេងដោយតារាភាពយន្តអាមេរិកដើមកំណើតវៀតណាម Kelly Marie Tran រីឯតួអង្គនាគចុងក្រោយដែលមានឈ្មោះថា Sisu ត្រូវបានបញ្ចូលសំឡេងដោយតារាចម្រៀងរ៉េបអាមេរិក Awkwafina។

 

យោងតាមឃ្លីបវីដេអូ និងរូបភាពមួយចំនួន រឿង Raya and the last Dragon មានឈុតឆាក និងការតុបតែងដូចវប្បធម៌ខ្មែរ និងបណ្តាប្រទេសមួយចំនួនក្នុងតំបន់អាស៊ីអាគ្នេយ៍។  

 

ដំបូងឡើយ Disney គ្រោងចាក់បញ្ចាំងរឿងនេះនៅអាមេរិកនាថ្ងៃទី២៥ ខែវិច្ឆិកា ឆ្នាំ២០២០ ប៉ុន្តែដោយសារការរាលដាលកូវីដ-១៩ ក្រុមហ៊ុនបានសម្រេចពន្យាពេលរហូតដល់ថ្ងៃទី១២ ខែមិនា ឆ្នាំ២០២១ វិញ៕