អេស្ប៉ាញប្រកាសអាសន្នទូទាំងប្រទេសជាថ្មី ខណៈការឆ្លង COVID-19 កើនឡើងខ្លាំង

COVID-19

អន្តរជាតិ

អេស្ប៉ាញប្រកាសអាសន្នទូទាំងប្រទេសជាថ្មី ខណៈការឆ្លង COVID-19 កើនឡើងខ្លាំង

26, Oct 2020 , 3:23 pm

រូបភាព

ស្ត្រីពាក់ម៉ាស់ជិះកង់ក្នុងទីក្រុងម៉ាឌ្រីដ។ រូបភាព Xinhua

ដោយ៖កង ម៉េងហុង

ប្រទេសអឺរ៉ុប អេស្ប៉ាញ បានវិលទៅរកដំណាក់កាលអាសន្នទូទាំងប្រទេសជាច្រើននៅថ្ងៃទី ២៥ ខែតុលា។ នាយករដ្ឋមន្ត្រីអេស្ប៉ាញលោក Pedro Sanchez បានប្រកាសស្ថានភាពអាសន្នថ្មី ស្របពេលការឆ្លង COVID-19 នៅអេស្ប៉ាញបានកើនឡើងលើស១លានករណី។

នាយករដ្ឋមន្ត្រីអេស្បាញលោក Pedro Sanchez បានប្រកាសស្ថានភាពអាសន្នថ្មី ដើម្បីទប់ស្កាត់ការកើនឡើងនៃការឆ្លង Covid 19 ។ វិធានការណ៍នេះបានចូលជាធរមាននៅយប់ថ្ងៃទី២៥ ខែតុលា ដោយបានដាក់បំរាមលើការធ្វើរដំណើរពេលយប់ និង ហាមឃាត់ការធ្វើដំណើររវាងតំបន់ក្នុងករណីខ្លះ។

គ្រប់តំបន់ទាំងអស់នឹងត្រូវអនុវត្តន៍វិធានការណ៍ដែលបានដាក់ជាធរមានលើកលែងតែកោះទេសចរណ៍ Canary ។ ក្រោមវិធានការថ្មី បំរាមដែលនឹងត្រូវអនុត្តមាន ការដំណើរនៅពេលយប់ និងការកំណត់ចំនួនមនុស្សជួបជុំគ្នាត្រឹមតែ៦នាក់។ នេះបើតាមទីភ្នាក់ងារព័ត៌មាន Reuters ។

Catalonia ជាតំបន់ដំបូងគេដែលអនុត្តច្បាប់អាសន្នថ្មី ដោយទីនោះ គ្រឹះស្ថានសាធារណៈ នឹងត្រូវបិទនៅម៉ោង៩យប់។ ដើម្បីពង្រឹងការអនុវត្តវិធានការថ្មី ប៉ូលិសក៏បានល្បាតក្នុងទីក្រុងមុនពេលដល់ម៉ោងអនុវត្តបំរាមក្នុងការធ្វើដំណើរ។ ប្រជាជនក្នុងតំបន់បានស្វាគមន៍ចំពោះវិធានការថ្មីនេះ។ គ្រូបណ្ដុះបណ្ដាលវិជ្ជាជីវៈឈ្មោះ Paula និយាយថា វិធានការជាក់លាក់ ត្រូវតែមាន ព្រោះការឆ្លងកំពុងចេញពីគ្រប់គ្រងបាន។

អេស្ប៉ាញ បានបិទប្រទេសក្រោមចំណាត់ការដ៏តឹងរឹងបំផុតមួយនៅដំណាក់កាលដំបូងនៃជំងឺរាតត្បាត ហើយបន្ទាប់មកបានបន្ធូរបន្ថយការរឹតត្បិតនៅរដូវក្តៅ។ ប៉ុន្តែដូចបណ្តាប្រទេសអឺរ៉ុបដទៃទៀតដែរ អេស្ប៉ាញត្រូវបានវាយប្រហារដោយរលកទីពីរនៃការឆ្លង COVID-19 ក្នុងរយៈពេលប៉ុន្មានសប្តាហ៍ថ្មីៗនេះ ដែលបង្ខំឲ្យរដ្ឋាភិបាលប្រកាសអាសន្នជាថ្មី។

គិតមកដល់ពេលនេះ អេស្ប៉ាញមានចំនួនអ្នកឆ្លង COVID-19 ខ្ពស់បំផុតនៅតំបន់អឺរ៉ុបខាងលិច។ ករណីសរុបបានកើនឡើងដល់លើសមួយលានករណី ខណៈចំនួនអ្នកស្លាប់ជិត ៣៥,០០០ នាក់៕