អន្តរជាតិ
អគ្គមេបញ្ជាការយោធា៖ មីយ៉ាន់ម៉ាចង់បានការបោះឆ្នោតសេរី និងយុត្តិធម៌ អគ្គមេបញ្ជាការយោធាមីយ៉ាន់ម៉ា លោក Min Aung Hlaing។ រូបភាព៖ Reuters
× អគ្គមេបញ្ជាការកងទ័ពមីយ៉ាន់ម៉ា លោកឧត្តមសេនីយ៍ មីន អ៊ុងឡាំង នៅថ្ងៃទី៣ ខែវិច្ឆិកា បានចោទគណៈកម្មការរៀបចំការបោះឆ្នោតសហព័ន្ធ (UEC) ថា បានប្រព្រឹត្តកំហុសមួយចំនួន ដែលមិនអាចទទួលយកបាននៅក្នុងនីតិវិធីមុនការបោះឆ្នោត។ បើតាមអគ្គមេបញ្ជាការយោធារូបនេះ មីយ៉ាន់ម៉ា ត្រូវការការបោះឆ្នោតដោយសេរី និងយុត្តិធម៌។
តាមរយៈកិច្ចសម្ពាសដ៏កម្រជាមួយសារព័ត៌មានក្នុងស្រុក Popular News Journal អគ្គមេបញ្ជាការយោធាមីយ៉ាន់ម៉ា លោក មីន អ៊ុងឡាំង បានចោទគណៈកម្មការរៀបចំការបោះឆ្នោតសហព័ន្ធថា បានបំពានច្បាប់ និងនីតិវិធីមួយចំនួន មុនការបោះឆ្នោត។ លោកបានលើកយកការត្អូញត្អែររបស់គណបក្សប្រឆាំងមួយចំនួនលើមានភាពមិនប្រក្រតីជុំវិញបញ្ជីអ្នកចុះឈ្មោះបោះឆ្នោត និងមានឈ្មោះប្រជាជនមួយចំនួន មិនត្រូវបានដាក់ក្នុងបញ្ជីឈ្មោះ។
«យើងបានប្រាប់គណៈកម្មការបោះឆ្នោតថា មីយ៉ាន់ម៉ាចង់បានការបោះឆ្នោតដោយសេរី និងយុត្តិធម៌»។ ឧត្តមសេនីយ៍កំពូលមីយ៉ាន់ម៉ា លើកឡើងបែបនេះ ដោយបន្ថែមថា ការប្រព្រឹត្តកំហុសធម្មតា វាមិនមានបញ្ហាអ្វីទេ ប៉ុន្តែកំហុសមួយចំនួន គឺមិនអាចទទួលយកបាន ដែលបញ្ហានេះ ទាមទារឲ្យមានការផ្លាស់ប្តូរ។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។
អ្នកនាំពាក្យគណៈកម្មការបោះឆ្នោតមីយ៉ាន់ម៉ា មិនទាន់បានឆ្លើយតបនឹងការលើកឡើងរបស់ប្រមុខយោធាមីយ៉ាន់ម៉ាឡើយ។
កាលពីការបោះឆ្នោតឆ្នាំ២០១៥ ប្រមុខយោធាមីយ៉ាន់ម៉ារូបនេះ ក៏ធ្លាប់បានលើកឡើងពីការបោះឆ្នោតដោយសេរី និងយុត្តិធម៌ដែរ បើទោះបីជាយោធាគ្រប់គ្រងកៅអី២៥ភាគរយនៅក្នុងសភា និងក្រសួងសំខាន់ៗ ក៏ដោយ។
សូមបញ្ជាក់ថា គណៈកម្មការការរៀបចំការបោះឆ្នោតមីយ៉ាន់ម៉ា ស្ថិតក្រោមការគ្រប់គ្រងរបស់រដ្ឋាភិបាល លោកស្រី អ៊ុងសាន ស៊ូជី រដ្ឋមន្ត្រីការបរទេស និងទីប្រឹក្សារដ្ឋមីយ៉ាន់ម៉ា ដែលបានឈ្នះការបោះឆ្នោតថ្នាក់ជាតិ នៅក្នុងឆ្នាំ២០១៥កន្លងទៅ។ សម្រាប់ការបោះឆ្នោតឆ្នាំ២០២០នេះ បក្សលោកស្រីស៊ូជី ត្រូវបានរំពឹងថា នឹងឈ្នះការបោះឆ្នោតជាថ្មី ដែលគ្រោងនឹងរៀបចំឡើងនៅថ្ងៃទី៨ ខែវិច្ឆិកាខាងមុខ៕
© រក្សាសិទ្ធិដោយ thmeythmey.com