លោក Peter Szijjarto រដ្ឋមន្ត្រីការបរទេសហុងគ្រី ដែលទើបតែបញ្ចប់ដំណើរទស្សនកិច្ចនៅកម្ពុជា ត្រូវបានរកឃើញថា មានជំងឺកូវីដ-១៩ ក្នុងអំឡុងដាក់ចត្តាឡីស័ក ពេលទៅដល់ប្រទេសថៃ។ បញ្ហានេះ បានធ្វើឲ្យជំនួបរវាងលោករដ្ឋមន្ត្រីការបរទេសហុងគ្រី និងនាយករដ្ឋមន្ត្រីថៃ លោកប្រយុទ្ធ ចាន់អូចា ត្រូវលុបចោល។
 

ក្នុងដំណើរទស្សនកិច្ចនៅកម្ពុជា រដ្ឋមន្ត្រីការបរទេសហុងគ្រី ក៏បានជួបពិភាក្សាទ្វេភាគីជាមួយសម្ដេចនាយករដ្ឋមន្ត្រី ហ៊ុន សែន និងថ្នាក់ដឹកនាំផ្សេងទៀតដែរ រួមមាន លោក ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ , លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ , លោក ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម និងលោក សួស យ៉ារ៉ា សមាជិកសភាកម្ពុជា។

ចំណែកលោក លឹម គានហោ រដ្ឋមន្ត្រីក្រសួងធនធានទឹក និងឧត្តុនិយម និងលោក ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិល ក៏បានជួបលោក Peter Szijjarto រដ្ឋមន្ត្រីការបរទេសហុងគ្រី នៅក្នុងពិធីចុះហត្ថលេខាកិច្ចព្រមព្រៀងរវាងភាគីទាំងពីរ នៅវិមានសន្តិភាព។
 

សូមបញ្ជាក់ថា សមាជិកគណៈប្រតិភូហុងគ្រីទាំងអស់ បានធ្វើតេស្តនិងមានវិញ្ញាបនបត្រសុខភាពបញ្ជាក់ថា គ្មានវីរុសកូវីដ-១៩ មុនពេលចេញដំណើរមកកម្ពុជា៕