លោក Hashim Thaci បានលាលែងពីប្រធានាធិបតីកូសូវ៉ូនៅថ្ងៃទី៥ វិច្ឆិកា ដើម្បីឡើងតុលាការពិសេសនៅទីក្រុងឡាអេ បន្ទាប់ពីត្រូវបានការចោទប្រកាន់ពីឧក្រិដ្ឋកម្មសង្គ្រាមពីឆ្នាំ១៩៩៨ ដល់ឆ្នាំ១៩៩៩ ក្នុងសង្គ្រាមផ្តាច់ខ្លួនរបស់កូសូវ៉ូចេញពីស៊ែប៊ី។ លោកបានអះអាងពីភាពស្អាតស្អំ និងតាំងចិត្តតតាំងដោយមិនរត់គេចឡើយ។
លោក Hashim Thaci ដែលវីរបុរសសង្គ្រាមឯករាជ្យរបស់កូសូវ៉ូ និងជាប្រធានាធិបតីតាំងតែពីឆ្នាំ២០១៦មក បានសម្រេចចិត្តលាលែងពីតំណែង នៅចំពោះមុខការចោទរបស់អង្គជំនុំជម្រះពិសេសពិសេសកូសូវ៉ូ។ លោក Thaci អះអាងថា ការលាលែងពីតំណែងរបស់លោក ជារឿងចាំបាច់ក្នុងការការពារសុច្ចរិតភាពរបស់កូសូវ៉ូ។ នេះបើយោងតាមទីភ្នាក់ងារព័ត៌មាន Reuters។
ក្រោយលាលែងពីតំណែង លោកបានធ្វើដំណើទៅកាន់ព្រលានយន្តហោះយោធា និងហោះសំដៅទៅទីក្រុងឡាអេ ប្រទេសហូឡង់ ដែលក្រោយមកត្រូវបានដាក់ឲ្យស្ថិតនៅក្រោមការឃុំឃាំងដោយតុលាការពិសេសកូសូវ៉ូ។ តុលាការនេះ បានចោទលោកThaci និងអតីតថ្នាក់ដឹកនាំកងទ័ពរំដោះកូសូវ៉ូ (KLA) ៣រូបផ្សេងទៀតពាក់ព័ន្ធអំពើខុសច្បាប់ក្នុងជំរំឃុំឃាំងដូចជាការធ្វើទារុណកម្ម លក្ខខណ្ឌរស់នៅមិនសមស្រប និងការសម្លាប់ជនស៊ីវិលជាដើម។
រដ្ឋអាជ្ញាររបស់តុលាការខាងលើ បញ្ជាក់ថា លោក Thaci និងបក្សពួកក៏ទទួលខុសត្រូវផងដែរចំពោះការសម្លាប់ជនស៊ីវិលជាង១០០នាក់ នៅពេលលោកជាមេបញ្ជាការ KLA ដែលបានប្រយុទ្ធជាមួយនឹងទាហាន និងប៉ូលិសស៊ែប៊ីពីឆ្នាំ១៩៩៨ ដល់១៩៩៩។
តាំងតែពីដើមមក លោក Thaci តែងតែច្រានចោលថា លោកពុំបានប្រព្រឹត្តអំពើទាំងខុសច្បាប់ទាំងអស់នេះឡើយ។ កាលពីខែកក្កដាកន្លងទៅ លោកថែមទាំងបានទៅតុលាការដើម្បីពិភាក្សាជាមួយរដ្ឋអាជ្ញាលើការចោទប្រកាន់ប្រឆាំងនឹងលោកផងដែរ។ តុលាការសម្រេចចិត្តចោទប្រកាន់លោកជាផ្លូវការនៅថ្ងៃទី៥ ខែវិច្ឆិកាតែម្ដង។
ការប្រគល់ខ្លួនរបស់លោកឲ្យតុលាការទទួលបានប្រតិកម្មចម្រុះ។ សហភាពអឺរ៉ុបស្វាគមន៍ការសហការរបស់លោក Thaci និងតុលាការ ដោយរំពឹងថា លោកនឹងបង្ហាញខ្លួនក្នុងអង្គបុរេជំនុំជម្រះ នៅប៉ុន្មានថ្ងៃខាងមុខ។ ចំណែកឯសមាជិកសភាស៊ែប៊ី ទទួលបន្ទុកកិច្ចការកូសូវ៉ូវិញអះអាងថា ការចោទប្រកាន់នេះបង្ហាញថា ការពិតមានមែនចំពោះឧក្រិដ្ឋកម្មសង្គ្រាមដែលប្រព្រឹត្តដោយ KLA ហើយការផ្តន្ទាទោស ជារឿងមិនអាចជៀសបាន។ ចំណែកពលរដ្ឋកូសូវ៉ូម្នាក់បានលើកឡើងថា៖« វាជារឿងអយុត្តិធម៌ដ៏ធំមួយដែលត្រូវបានធ្វើឡើង ដោយសារតែអ្នករំដោះរបស់យើងត្រូវបានគេកាត់ទោស»។
តុលាការពិសេសកូសូវ៉ូ ត្រូវបានបង្កើតឡើងក្នុងឆ្នាំ២០១៥ ដោយទទួលបន្ទុកលើសំណុំរឿងសង្គ្រាមផ្តាច់ខ្លួនរបស់កូសូវ៉ូពីស៊ែប៊ី។ តុលាការនេះប្រើប្រាស់ច្បាប់កូសូវ៉ូ ប៉ុន្តែមានមន្ត្រីបម្រើការដូចជាចៅក្រម រដ្ឋអាជ្ញា និងក្រឡាបញ្ជីមកពីក្របខណ្ឌអន្តរជាតិ។
សង្គ្រាមផ្តាច់ខ្លួនរបស់កូសូវ៉ូផ្ទុះឡើងក្នុងខែកុម្ភៈ ឆ្នាំ១៩៩៨ និងបញ្ចប់នៅថ្ងៃទី១១ មិថុនា ឆ្នាំ១៩៩៩។ ការស្រាវជ្រាវប៉ាន់ស្មានថា មានមនុស្សស្លាប់ទាំងសងខាងចំនួន១ម៉ឺន៣ពាន់នាក់ និងរាប់ពាន់នាក់ទៀតបាត់ខ្លួន។ កូសូវ៉ូ បានប្រកាសឯករាជ្យនៅឆ្នាំ២០០៨ ដោយមានប្រទេសជាច្រើនទទួលស្គាល់ដូចជាអាមេរិក និងសហភាពអឺរ៉ុប តែរុស្ស៊ីបានបដិសេធ៕