សង្គមអន្តរជាតិ
អន្តរជាតិ
នាយករដ្ឋមន្រ្តីថៃ លោក ប្រាយុទ្ធ ចាន់អូចា។ រូបភាព៖ AFP
×![]()
ដោយ: ធៀន ភារិន្ទ
នាយករដ្ឋមន្ត្រីថៃ លោក ប្រាយុទ្ធ ចាន់អូចា នៅថ្ងៃទី៥ ខែវិច្ឆិកា បានលើកឡើងថា លោកនឹងរីករាយ ប្រសិនបើមានមនុស្ស ដែលមានសមត្ថភាព និងលក្ខណៈសម្បត្តិល្អជំនួសតំណែងរបស់លោក នៅពេលអនាគត។ ការលើកឡើងរបស់នាយករដ្ឋមន្ត្រីថៃបែបនេះ ធ្វើឡើងស្របពេល ប្រជាជនថៃជាច្រើនពាន់នាក់ ទាមទារឲ្យលោកចុះចេញពីតំណែងមួយនេះ។ 
តាមរយៈសុន្ទរកថានៅមហាវិទ្យាល័យការពារជាតិថៃក្នុងក្រុងបាងកក ប្រមុខរដ្ឋាភិបាលថៃ លោក ប្រាយុទ្ធ ចាន់អូចា បានលើកឡើងថា ប្រសិនបើក្នុងពេលខាងមុខ មានមនុស្សមានសមត្ថភាព និងកាន់កិច្ចការច្បាស់លាស់ជាងខ្លួន អ្នកទាំងនោះគឺ សក្តិសមណាស់ក្នុងការកាន់តំណែងជំនួសលោក។
«គាត់ ឬនាង នឹងបន្តកិច្ចការនាយករដ្ឋមន្ត្រី និងទទួលបន្ទុកដឹកនាំប្រទេស»។ លោកប្រយុទ្ធ បានលើកឡើងបែបនេះ ដោយបន្ថែមថា ការប្រើប្រាស់អំណាច មិនមែនជារឿងគួរឲ្យសប្បាយទេ ហើយបញ្ហាទាំងនោះ វាបានកើតឡើងរួចហើយ ក្នុងពេលលោក ធ្វើជាមេបញ្ជាការកងទ័ព។ ក្នុងន័យនេះ លោក ប្រាយុទ្ធ បានត្អូញត្អែរថា លោកធុញទ្រាន់ណាស់ក្នុងការប្រើប្រាស់អំណាច។
ថ្លែងនៅមុខនិស្សិតយោធាជាច្រើននាក់ អតីតមេបញ្ជាការកងទ័ពជើងគោកថៃរូបនេះ បានរំឭកថា កន្លងមក លោកបានប្រើប្រាស់អំណាចយ៉ាងខ្លាំង ដើម្បីការពារមនុស្សល្អ ហើយដាក់ទណ្ឌកម្មលើមនុស្សអាក្រក់ ដែលនេះវាពិបាកគ្រប់គ្រាន់ហើយសម្រាប់លោក។
តាមការចុះផ្សាយរបស់កាសែតបាងកកប៉ុស្តិ៍ លោក ប្រាយុទ្ធ បានលើកឡើងពីការធ្វើរដ្ឋប្រហារកាលពីឆ្នាំ២០១៤ ដែរ ថា លោកមិនបានរំពឹងទុកឡើយជុំវិញការឡើងកាន់តំណែងជានាយករដ្ឋមន្ត្រី ហើយវាជារឿងគួរឲ្យភ្ញាក់ផ្អើលណាស់ ដែលលោកអាចបន្តកាន់តំណែងបានដល់៦ឆ្នាំ។ ជាមួយគ្នានេះ លោកប្រាយុទ្ធ បានបន្តថា មនុស្សជាច្រើន បានចោទលោកថា ប្រព្រឹត្តខុសច្បាប់ ប៉ុន្តែផ្ទុយទៅវិញ លោកមិនដែលប្រព្រឹត្តអ្វីខុសច្បាប់ឡើយ។
ការលើកឡើងរបស់ប្រមុខរដ្ឋាភិបាលថៃខាងលើនេះ ធ្វើឡើងស្របពេលប្រជាជនជាច្រើនពាន់នាក់ បានទាមទារឲ្យលោកប្រយុទ្ធចុះចេញពីតំណែង តាមរយៈបាតុកម្មរបស់ខ្លួន បូករួមទាំងការធ្វើវិសោធនកម្មរដ្ឋធម្មនុញ្ញ និងកំណែទម្រង់ស្ថាប័នព្រះមហាក្សត្រផងដែរ។
ប្រសិនគ្មានការប្រែប្រួលទេ ក្រុមបាតុករថៃ នឹងជួបគ្នាជាថ្មីក្នុងទ្រង់ទ្រាយធំ នៅថ្ងៃទី៨ ខែវិច្ឆិកា នៅទីលានប្រជាធិបតេយ្យ និងដើរសំដៅទៅកន្លែងមួយ ដែលក្រុមបាតុករមិនបានបញ្ចេញឈ្មោះ។ ក្រុមបាតុករថៃឈ្មោះ រណសិរ្យរួបរួមបាតុកម្មធម្មសាស្ត្រ (UFTD) បានប្រកាសការធ្វើបាតុកម្មនេះ នៅលើបណ្តាញសង្គម Facebook របស់ខ្លួន ដោយចាប់ផ្តើមពីម៉ោង ៤ល្ងាចទៅ។
សូមបញ្ជាក់ថា កន្លងទៅសភាថៃ ស្នើឲ្យបង្កើតគណៈកម្មាធិការសម្រុះសម្រួលមួយ ដែលមានគ្រប់ភាគីចូលរួម ប៉ុន្តែសំណើនេះ ត្រូវបានក្រុមបាតុករថៃ ប្រកាសធ្វើពហិកាក្នុងការចូលរួម។ ពេលនេះ ប្រធានសភារដ្ឋសភាថៃ លោក Chuan Leekpai កំពុងសិក្សា និងប្រមូលគំនិតពីអតីតនាយករដ្ឋមន្ត្រីថៃមួយចំនួន ជុំវិញការបង្កើតគណៈកម្មាធិការ៕
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
7 ថ្ងៃ
