COVID-19
ជាតិ
មន្ត្រីការបរទេសហុងគ្រីថា រដ្ឋមន្ត្រីខ្លួនអត់ពាក់ម៉ាសក្នុងកម្មវិធីខ្លះ ដោយសារភាគីម្ចាស់ផ្ទះស្នើសុំ
×![]()
ដោយ: សារព័ត៌មានថ្មីៗ
ករណីដែលលោក Peter Szijjarto មិនបានពាក់ម៉ាសនៅក្នុងកម្មវិធីមួយចំនួននៅកម្ពុជា ត្រូវបានលោក Tamás Menczer រដ្ឋលេខាធិការក្រសួងការបរទេសហុងគ្រី បកស្រាយថា មានការស្នើសុំ ដោយថា ភាគីកម្ពុជា ក៏មិនបានពាក់ម៉ាសនោះដែរ។ លោក Menczer បានពន្យល់បែបនេះ តាមទំព័រហ្វេសប៊ុករបស់ខ្លួន ហើយត្រូវបានបកប្រែជាភាសាអង់គ្លេសដោយសារព័ត៌មាន Hungary Today។
តាមរយៈហ្វេសប៊ុករបស់ខ្លួន លោក Tamas Menczer បានអះអាងបន្ថែមថា រដ្ឋមន្ត្រីរបស់ខ្លួន មានលទ្ធផលតេស្តអវិជ្ជមាននៅមុនពេលចេញដំណើរមកកាន់អាស៊ី។ «ចាប់ពីពេលដែលចាប់ធ្វើដំណើរ ក្រោយលទ្ធផលតេស្តអវិជ្ជមាន គ្មាននរណាម្នាក់អាចនិយាយបានថា លោក Peter Szijjarto ចម្លងមនុស្សនៅកម្ពុជា ឬនៅថៃនោះឡើយ។ យើងមិនដឹងថា អ្នកណាចម្លងអ្នកណានោះទេ»។
រដ្ឋលេខាធិការការប្រទេសហុងគ្រី បានអះអាងថា លោក Szijjarto គោរពយ៉ាងម៉ឺងម៉ាត់តាមវិធានការសុខាភិបាលនៃប្រទេសម្ចាស់ផ្ទះនៅរាល់ដំណើរទស្សនកិច្ចរបស់លោក។ «គាត់មិនបានពាក់ម៉ាសនៅកម្មវិធីមួយចំនួននៅកម្ពុជា ព្រោះមានការស្នើសុំពីភាគីម្ចាស់ផ្ទះ ដោយយោងថា ភាគីកម្ពុជាក៏មិនបានពាក់នោះដែរ»។ នេះជាការរៀបរាប់របស់លោក Menczer។
លោក Menczer បានបង្ហាញប្រតិកម្មរបស់ខ្លួន ក្រោយរងការរិះគន់មួយចំនួនដែលថា លោក Szijjarto បានចម្លងកូវីដ-១៩ នាដំណើរទស្សនកិច្ចនៅកម្ពុជា និងថៃ។ នៅថៃ អ្នកការទូតហុងគ្រីម្នាក់ មានតេស្តវិជ្ជមាន រីឯនៅកម្ពុជា មានចំនួន៤នាក់ ដែលក្នុងនោះ មានមន្ត្រីខ្មែរ២នាក់ អង្គរក្សា១នាក់ និងលោកឯកអគ្គរដ្ឋទូតហុងគ្រីប្រចាំកម្ពុជា និងវៀតណាម។
សម្តេចនាយករដ្ឋមន្ត្រី ហ៊ុន សែន ស្ថិតក្នុងចំណោមនុស្សជាង១០០០នាក់ដែលធ្វើចត្តាឡីស័កក្រោយដំណើរទស្សនកិច្ចរបស់រដ្ឋមន្ត្រីការបរទេសហុងគ្រីរូបនេះ ប៉ុន្តែទោះបីជាយ៉ាងណាក៏ដោយ ទាំងប្រមុខរដ្ឋាភិបាល ទាំងលោក ប្រាក់ សុខុន រដ្ឋមន្ត្រីក្រសួងបរទេស និងសហប្រតិបត្តិការអន្តរជាតិ មិនបានទម្លាក់កំហុសលើភាគីហុងគ្រីនោះដែរ។
ដើម្បីបញ្ជៀសបញ្ហាការទូត សម្តេច ហ៊ុន សែន បានសម្រេចហៅជំនួបជាមួយរដ្ឋមន្ត្រីការបរទេសហុងគ្រី ថា ជា «ព្រឹត្តិការណ៍៣វិច្ឆិកា»។
លោក Szijjarto តេស្តឃើញវិជ្ជមានកូវីដ-១៩ នៅពេលទៅដល់ថៃ ពោលគឺមួយថ្ងៃក្រោយចេញពីកម្ពុជា ប៉ុន្តែទោះបីជាយ៉ាងណាក៏ដោយ ប្រតិភូអមដំណើរលោក១៧នាក់ទៀត សុទ្ធតែអវិជ្ជមាន៕
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
7 ថ្ងៃ
