ស្ថាប័នវេជ្ជសាស្ត្រ ព្រមានជាថ្មីថា នឹងពិន័យលើការដំឡើងថ្លៃម៉ាស់ អាកុល ជែល និង ឧបករណ៍វាស់កម្តៅ

COVID-19

ជាតិ

ស្ថាប័នវេជ្ជសាស្ត្រ ព្រមានជាថ្មីថា នឹងពិន័យលើការដំឡើងថ្លៃម៉ាស់ អាកុល ជែល និង ឧបករណ៍វាស់កម្តៅ

13, Nov 2020 , 5:39 pm

រូបភាព

ដោយ: សារព័ត៌មានថ្មីៗ

គណៈឱសថការីកម្ពុជា ព្រមានជាថ្មីថា នឹងដាក់ទណ្ឌកម្មវិន័យ ចំពោះគ្រឹះស្ថានផលិតឱសថ គ្រឹះស្ថានអាហរណ៍-នីហរណ៍ឱសថ និង ឱសថស្ថាន ជាដើម ដែលបានដំឡើងថ្លៃម៉ាស់ អាកុល ជែលលាងដៃ ឧបករណ៍វាស់កម្តៅ និង សម្ភារសម្លាប់មេរោគផ្សេងៗ។ ការព្រមាននេះ ធ្វើឡើងតាមរយៈលិខិតរបស់គណៈឱសថការីកម្ពុជា ផ្ញើជូនទៅបណ្តាឱសថស្ថាន និងគ្រឹះស្ថាននាំចេញនាំចូលឱសថ។

គណៈឱសថការីកម្ពុជា ព្រមានទៅឱសថការីជាថ្មីនេះ គឺស្របពេលដែលប្រមុខរដ្ឋាភិបាល ក៏ដូចជាក្រសួងសុខាភិបាល អំពាវនាវឲ្យប្រជាពលរដ្ឋ ចាប់ផ្តើមប្រុងប្រយ័ត្នខ្ពស់ឡើងវិញចំពោះជំងឺកូវីដ-១៩ ដោយត្រូវនាំគ្នាពាក់ម៉ាស់ដូចកាលពីមុន និងឧស្សាហ៍លាងដៃជាមួយអាកុល ជែល ឬសាប៊ូ។ កម្ពុជា ចាត់វិធានការការពារខ្ពស់ម្តងទៀតចំពោះជំងឺកូវីដ-១៩ គឺបន្ទាប់ពីមានព្រឹត្តិការណ៍៣វិច្ឆិកា។

តាមរយៈលិខិតចុះនៅថ្ងៃទី១៣ ខែវិច្ឆិកា ឆ្នាំ២០២០ គណៈឱសថការីកម្ពុជា បញ្ជាក់ដូច្នេះថា៖«ឱសថការី ត្រូវទទួលខុសត្រូវចំពោះមុខច្បាប់នូវរាល់សកម្មភាពទាំងឡាយណា ដែលស្ថិតក្រោមការគ្រប់គ្រងរបស់ខ្លួន ទោះបីជាសកម្មភាពនោះ ប្រព្រឹត្តដោយសហការីរបស់ខ្លួនក៏ដោយ និងត្រូវធ្វើយ៉ាងណាឲ្យបុគ្គលិកក្រោមឱវាទគោរពគោលការណ៍ច្បាប់ លិខិតបទដ្ឋានគតិយុត្តិជាធរមាន»។

គណៈឱសថការីកម្ពុជា អំពាវនាវដល់គ្រប់ឱសថស្ថាន គ្រឹះស្ថានផលិតឱសថ និង គ្រប់គ្រឹះស្ថាននាំចេញនាំចូលឱសថ កុំឲ្យដំឡើងថ្លៃម៉ាស់ អាកុល ជែលជាងដៃ ឧបករណ៍វាស់កម្តៅ និង សម្ភារសម្លាប់មេរោគផ្សេងៗ។ ជាមួយគ្នានេះ គណៈឱសថការនី រម្លឹកដល់ទីតាំងរកស៊ីផ្នែកឱសថ ឲ្យគោរពក្រមសីលធម៌ និងប្រកាន់ខ្ជាប់ករណីកិច្ចនៃការការពារសុខភាពសាធារណៈ ដើម្បីរួមចំណែកកាត់បន្ថយការឆ្លងជំងឺកូវីដ-១៩ និងដើម្បីចូលរួមជាមួយរដ្ឋាភិបាល ក្នុងការបញ្ចប់ព្រឹត្តិការណ៍៣វិច្ឆិកា។

ក្រសួងសុខាភិបាល រកឃើញមនុស្ស៤នាក់ ដែលពាក់ព័ន្ធនឹងព្រឹត្តិការណ៍៣វិច្ឆិកា បានផ្ទុកជំងឺកូវីដ-១៩។ ក្នុងចំណោមអ្នកទាំង៤នោះ មាន៣នាក់ជាជនជាតិខ្មែរ គឺ អង្គរក្ស តំណាងរាស្ត្រ និង មន្ត្រីជាន់ខ្ពស់ក្រសួងកសិកម្ម ហើយម្នាក់ទៀត ជាឯកអគ្គរដ្ឋទូតហុងគ្រីប្រចាំកម្ពុជា។

ចាប់តាំព្រឹត្តិការណ៍៣វចិ្ឆកា កើតឡើង ក្រសួងបានធ្វើតេស្តមនុស្សលើសពី២ពាន់នាក់ហើយ ដោយលទ្ធផលអវិជ្ជមានពីកូវីដ-១៩ តែពួកគេ ត្រូវបន្តធ្វើចត្តាឡីស័ក។ ក្រសួង នៅតែស្វែងអ្នកផ្សេងទៀត ដែលសង្ស័យថា ពាក់ព័ន្ធនឹងព្រឹត្តិការណ៍៣វិច្ឆិកា។

ក្រោយមានព្រឹត្តិការណ៍៣វិច្ឆិកា រដ្ឋាភិបាល បានបញ្ចេញម៉ាស់ក្រណាត់ប្រមាណ២លានម៉ាស់ ឲ្យមន្ត្រីដើរចែកប្រជាជនតាមសហគមន៍ក្រីក្រ ក្នុងរាជធានីភ្នំពេញ។

កន្លងមក រដ្ឋាភិបាល ក្រសួងសុខាភិបាល និង គណៈឱសថការីកម្ពុជា ធ្លាប់ណែនាំម្តងរួចមកហើយ ឲ្យគ្រប់ទីតាំងប្រកបរបរផ្នែកឱសថ កុំឲ្យដំឡើងថ្លៃម៉ាស អាកុល ជែល ឧបករណ៍វាស់កម្តៅ និង សម្ភារពេទ្យផ្សេងៗ។ ហើយកាលនោះ គណៈឱសថការី ក្រសួងសុខាភិបាល រហូតដល់រដ្ឋាភិបាល ក៏ព្រមានចាត់វិធានការផ្លូវច្បាប់ដូចជាពេលនេះដែរ បើរកឃើញថា មានការដំឡើងថ្លៃលើរបស់ទាំងអស់នោះ៕