កីឡាអន្តរជាតិ
អន្តរជាតិ
អេស្ប៉ាញ ផ្តល់មេរៀនឈឺចាប់ឲ្យអាល្លឺម៉ង់ ដើម្បីឡើងទៅវគ្គបន្ត Nations League
× ក្រុមជម្រើសជាតិអេស្ប៉ាញបានបំបាក់អាល្លឺម៉ង់ក្នុងលទ្ធផល ៦-០ ដើម្បីឈានទៅវគ្គបន្តពានរង្វាន់ Nations League។ អេស្ប៉ាញ ត្រូវចូលរួមជាមួយបារាំងសម្រាប់៤ក្រុមចុងក្រោយ ខណៈម្ចាស់ការពារជើងឯកព័រទុយហ្គាល់ធ្លាក់ត្រឹមវគ្គជម្រុះនេះ។
ជំនួបចុងក្រោយពូល A4 នៅរាត្រីថ្ងៃទី១៧ ខែវិច្ឆិកា ខ្សែបម្រើចំណូលថ្មីរបស់ Manchester City កីឡាករ Ferran Torres សម្រេចទីបាន៣គ្រាប់ម្នាក់ឯង និងជាលើកទី១ក្នុងអាជីពដែលធ្វើបាន hat-trick សម្រាប់ក្រុមជម្រើសជាតិអេស្ប៉ាញ។ ៦គ្រាប់របស់ក្រុមលោក Luis Enrique ធ្វើបានដោយ Alvaro Morata ខ្សែប្រយុទ្ធក្រុម Juventus នាទី១៧, Rodri របស់ Manchester City នៅនាទី ៣៨, Mekel Oyarzabal ខ្សែប្រយុទ្ធ Real Sociedad (៨៩) ខណៈ៣គ្រាប់របស់ Torres សម្រេចទីនៅនាទី៣៣, ៥៥ និង៧១។
នេះជាបរាជ័យដ៏អាម៉ាស់បំផុតរបស់ក្រុមឥន្ទ្រីដែកអាល្លឺម៉ង់ ក្រោមការដឹកនាំរបស់គ្រូបង្វឹកលោក Joachim Low ក្នុងរយៈពេល១៤ឆ្នាំមកនេះ។ ដោយឡែកជ័យជម្នះរបស់អេស្ប៉ាញក្នុងជំនួបចុងក្រោយនេះ បានធ្វើឲ្យពួកគេឡើងទៅឈរកំពូលតារាងពូល A4 វិញ ដោយរុញអាល្លឺម៉ង់ទៅលេខ២និងអស់ឱកាសទៅវគ្គបន្តពានរង្វាន់អឺរ៉ុបមួយនេះ។
អេស្ប៉ាញ និងបារាំងបានចាប់ដៃគ្នាឡើងទៅបន្ត Nations League ដោយត្រូវរង់ចាំ បែលហ្ស៊ិកឬដាណឺម៉ាកពីពូល A2 និងអ៊ីតាលី, ហូឡង់ ឬប៉ូឡូញ ពីពូល A1។ ម្ចាស់ជើងឯកចាស់ព័រទុយហ្គាល់បានធ្លាក់ត្រឹមវគ្គជម្រុះនេះ បើទោះពួកគេឈ្នះក្រូអាស៊ី ២-៣ នៅជំនួបចុងក្រោយពូល A3 ក៏ដោយ។ បារាំងឈរលេខ១ពូល A3 ក្រោយបន្តឈ្នះស៊ុយអែត ៤-២ ដោយមាន១៦ពិន្ទុ នាំមុខព័រទុយហ្គាល់ចំនួន៣ពិន្ទុ។
ជំនួបចុងក្រោយពូល A1 ប៊ូស្នីដែលអស់ឱកាសទៅហើយត្រូវប៉ះអ៊ីតាលី ខណៈប៉ូឡូញស្វាគមន៍ហូឡង់។ ឯពូល A2 បែលហ្ស៊ិកទទួលដាណឺម៉ាកដែលជាគូប្រជែងកៅអីគ្នា ស្របពេលអង់គ្លេសជួបអ៊ីស្លង់សម្រាប់ជំនួបបង្គ្រប់កិច្ច។ ជំនួបទាំងនេះ នឹងត្រូវធ្វើឡើងនៅរាត្រីថ្ងៃទី១៨ ខែវិច្ឆិកានេះ៕
© រក្សាសិទ្ធិដោយ thmeythmey.com