COVID-19
អន្តរជាតិ
UN បញ្ចេញលុយ១០០លានដុល្លារ ដើម្បីបញ្ចៀសគ្រោះអត់ឃ្លាននៅប្រទេសចំនួន៧ បុគ្គលិកWFPចែកចាយស្បៀងនៅយ៉េមែន។ រូបភាព៖ AFP
× ការិយាល័យសម្របសម្រួលកិច្ចការមនុស្សធម៌(OCHA) របស់អង្គការសហប្រជាជាតិ(UN) បានបញ្ចេញទឹកប្រាក់ចំនួន១០០លានដុល្លារដើម្បីបញ្ចៀសគ្រោះអត់ឃ្លានក្នុងប្រទេសចំនួន៧ ដែលកំពុងញាំញីដោយសង្គ្រាម វិបត្តិសេដ្ឋកិច្ច បម្រែបម្រួលអាកាសធាតុ និងជំងឺឆ្លងCOVID-19។
ទឹកប្រាក់ចំនួន១០០លានដុល្លារ នឹងត្រូវចំណាយលើប្រទេសយេម៉ែនចំនួន៣០លានដុល្លារ អាហ្វហ្កានីស្ថាន១៥លានដុល្លារ នីហ្សេរីយ៉ា១៥លានដុល្លារ ស៊ូដង់ខាងត្បូង៧លានដុល្លារ សាធារណរដ្ឋប្រជាធិបតេយ្យកុងហ្គោ៧លានដុល្លារ បួគីណាហ្វាសូ៦លានដុល្លារ និង២០លានដុល្លារទៀតសម្រាប់ស្ថានការណ៍ដែលកំពុងដុនដាបនៅអេត្យូពីដោយសារសង្គ្រាមនឹងគ្រោះរាំងស្ងួត។
សេចក្តីថ្លែងការណ៍របស់OCHA លើកឡើងថា ការបញ្ចេញប្រាក់ពីមូលនិធិអាសន្នរបស់អង្គការសហប្រជាជាតិ(CERF) ជាវិធីដ៏រហ័ស និងមានប្រសិទ្ធភាពក្នុងការបង្ការគ្រោះអត់ឃា្លននៅប្រទេសទាំង៧ខាងលើ។ CERF ជាមូលនិធិរបស់ UN ដែលមានទឹកប្រាក់ជិត៥០០លានដុល្លារ ហើយដែលអនុញ្ញាតឲ្យបញ្ចេញសាច់ប្រាក់ជាបន្ទាន់ដើម្បីដោះស្រាយវិបត្តិមនុស្សធម៌ និងគ្រោះអាសន្នផ្សេងៗ ដោយពុំចាំបាច់ទន្ទឹងរង់ចាំប្រាក់ឧបត្ថម្ភពីរដ្ឋសមាជិកឡើយ។
ក្នុងចំណោមប្រទេសចំនួន៧ទាំងលើ ប្រទេសចំនួន៦ជួបគ្រោះរាំងស្ងួត និងជម្លោះប្រដាប់អាវុធ។ ជាក់ស្តែងប្រជាជនយេម៉ែនចំនួនជិត២៤លាននាក់ប្រឈមនឹងគ្រោះរាំងស្ងួតដោយសារសង្គ្រាមស៊ីវិល។ រីឯស៊ូដង់ខាងត្បូងត្រូវបាន UN ប្រកាសពីគ្រោះអាសន្នអត់ឃ្លានពីឆ្នាំ២០១៧ ដោយមនុស្សជាង៧លាននាក់ស្ថិតក្នុងអត់ឃ្លាន។ ស្ថានភាពនៅប្រទេសអាហ្វ្រិកនេះកាន់តែធ្ងន់ធ្ងរទៅទៀតដោយសារការឡើងថ្លៃម្ហូបអាហារអំឡុងពេលCOVID-19។
លោក Mark Lowcock ប្រធាន OCHA អះអាងថា គ្រោះអត់ឃ្លានបណ្តាលឲ្យមនុស្សស្លាប់យ៉ាងឈឺផ្សា និងគួរឲ្យអាម៉ាស់បំផុត ជាពិសេសក្នុងពិភពលោកដែលមានអាហារគ្រប់គ្រាន់សម្រាប់មនុស្សគ្រប់គ្នា។ លោកបន្តថា គ្រោះអត់ឃ្លានបណ្តាលឲ្យមានជម្លោះ និងសង្គ្រាមដែលជាហេតុនាំឲ្យមានការបម្លាស់ទីមនុស្សទ្រង់ទ្រាយធំ។
បើតាមប្រធាន OCHA រូបនេះ គ្រោះអត់ឃ្លានអាចកើតឡើងបាន ដោយសារតែមនុស្សគ្រប់គ្នាអនុញ្ញាតឲ្យវាកើតមាន។ នាពេលបច្ចុប្បន្ននេះ មនុស្សជាង២៥០លាននាក់កំពុងប្រឈម ឬរស់នៅជាមួយភាពអត់ឃ្លាន។
ដូចគ្នានេះដែរ លោក David Beasley ប្រធានកម្មវិធីស្បៀងអាហារពិភពលោក(WFP) របស់ UN អះអាងថា មនុស្សជាតិគួរណាស់តែផ្តោតកិច្ចខិតខំប្រឹងប្រែងទៅលើគ្រោះអត់ឃ្លាន កង្វះអាហារ អស្ថិរភាព និងបញ្ហាចំណាកស្រុក។ ក្នុងឆ្នាំ២០២០ WFP ចំណាយប្រាក់ជាង១០ពាន់លានដុល្លារដើម្បីចិញ្ចឹមមនុស្សជាង១០០លាននាក់ក្នុងប្រទេសចំនួន៥៥៕
© រក្សាសិទ្ធិដោយ thmeythmey.com