កីឡាអន្តរជាតិ
អន្តរជាតិ
Ronaldo ៖ ខ្ញុំមិនដែលចាត់ទុក Messi ជាគូប្រជែងឡើយ
× Cristiano Ronaldo និយាយថាខ្លួនមិនដែលចាត់ទុក Lionel Messi ជាគូប្រជែងឡើយ បន្ទាប់ពី Juventus បានយកឈ្នះ Barcelona ៣-០ ដើម្បីឡើងទៅឈរកំពូលតារាងពូល G ពានរង្វាន់ UEFA Champions League។
Ronaldo រកបាន២គ្រាប់ម្នាក់ឯងដោយការទាត់បាល់ពិន័យ១១ម៉ែត្រ និង Weston McKennie ១គ្រាប់ក្នុងជ័យជម្នះ ៣-០ របស់សេះបង្កង់លើក្រុមអ្នកមានបុណ្យនៅកីឡដ្ឋាន Camp Nou នៅរាត្រីថ្ងៃទី៨ ខែធ្នូ។ នេះក៏ជាការប្រឈមមុខគ្នាលើកដំបូងក្នុងរយៈពេល២ឆ្នាំ រវាងខ្សែប្រយុទ្ធឆ្នើមសញ្ជាតិព័រទុយហ្គាល់ ជាមួយ Messi ផងដែរ។
ចាប់តាំងពី Ronaldo ផ្លាស់ពី Real Madrid ទៅកាន់ក្លិបយក្សអ៊ីតាលីនៅឆ្នាំ ២០១៨ កំពូលកីឡាករទាំងពីរដែលធ្លាប់ប្រជែងគ្នានៅលើទីលានជិតមួយទសវត្សរ៍ ក៏ត្រូវអាក់ខានតតាំងគ្នារហូតមក។ តែដោយសារក្រុមរបស់ពួកគេស្ថិតក្នុងពូលជាមួយគ្នាក្នុងក្របខណ្ឌអឺរ៉ុប ទើបអ្នកទាំងពីរមានឱកាសជួបគ្នាសាជាថ្មី។
ក្រោយការប្រកួតនេះ Ronaldo បានប្រាប់កាសែត Movistar+ ថា រូបគេពិតជាមានទំនាក់ទំនងល្អជាមួយ Messi បើទោះត្រូវបានគេប្រៀបធៀប និងវាយតម្លៃយ៉ាងណាក៏ដោយ។ កីឡាកររូបនេះអះអាងថា៖ «ខ្ញុំបានចូលរួមពិធីប្រគល់ពានរង្វាន់រយៈពេលចន្លោះពី១២ ទៅ១៤ឆ្នាំជាមួយគាត់។ ខ្ញុំមិនដែលចាត់ទុកគាត់ជាគូប្រជែងទេ។ គាត់តែងតែព្យាយាមធ្វើអ្វីដែលល្អបំផុតសម្រាប់ក្រុមរបស់គាត់ និងខ្ញុំផងដែរ»។
ម្ចាស់ពាន Ballon D’or ៥សម័យកាលបន្ថែមថា៖ «យើងដឹងថានៅក្នុងកីឡាបាល់ទាត់សម្រាប់សារព័ត៌មាន ការបង្ហាញខ្លួនក្នុងការប្រកួតប្រជែងត្រូវបានគេកត់សម្គាល់ ប៉ុន្តែខ្ញុំតែងតែទទួលបានភាពសុខដុមរមនាជាមួយគាត់។ ខ្ញុំជាមួយគាត់គឺធម្មតា»។
Juventus និង Barcelona សុទ្ធតែបានកៅអីទៅកាន់វគ្គ១៦ក្រុមចុងក្រោយ បន្ទាប់រកបានពិន្ទុនាំមុខដាច់គេក្នុងពូល។ ក្រុមយក្សអ៊ីតាលីឈរកំពូលតារាងពូល G មាន១៥ពិន្ទុ ឯក្រុមយក្សអេស្ប៉ាញនៅលេខ២មាន១៥ពិន្ទុដូចគ្នាតែចាញ់គ្រាប់បាល់ក្នុងទឹកដី។ Dynamo Kyiv ទទួលបានកៅអី Europa League ក្រោយបញ្ចប់ក្នុងចំណាត់ថ្នាក់ទី៣៕
Tag:
Cristiano Ronaldo
Barcelona
Champions League
© រក្សាសិទ្ធិដោយ thmeythmey.com