គ្រឹះស្ថានឧត្តមសិក្សាទាំងអស់ត្រូវផ្អាកដំណើរការបណ្តោះអាសន្នដោយបន្តរៀនតាមអនឡាញវិញ

ជាតិ

សង្គមជាតិ

គ្រឹះស្ថានឧត្តមសិក្សាទាំងអស់ត្រូវផ្អាកដំណើរការបណ្តោះអាសន្នដោយបន្តរៀនតាមអនឡាញវិញ

10, Dec 2020 , 11:58 pm

រូបភាព

លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា

ដោយ:

ភ្នំពេញ៖ បន្ទាប់ពីសង្កេតឃើញថាព្រឹត្តិការណ៍សហគមន៍២៨វិច្ឆិកាមិនទាន់ស្រាកស្រាន្តនៅឡើយនោះក្រសួងអប់រំ យុវជន និងកីឡាបានប្រកាសឲ្យគ្រឹះស្ថានឧត្តមសិក្សាទាំងរដ្ឋ និងឯកជនទាំងអស់ផ្អាកដំណើរការជាបណ្តោះអាសន្នសិន ដោយបង្វែរការតាមអនឡាញវិញ។ នេះបើតាមសេចក្តីជូនដំណឹងរបស់ក្រសួងអប់រំនាថ្ងៃទី១០ ខែធ្នូ។

ដើម្បីចៀសវាងការឆ្លងជំងឺកូវីដ-១៩ចូលក្នុងគ្រឹះស្ថានសិក្សា និងរីករាលដល់សហគមន៍ ក្រសួងអប់រំ ក៏ប្រកាសឲ្យផ្អាករាល់សកម្មភាពជួបជុំ សិក្ខាសាលា និងកិច្ចប្រជុំដែលមានអ្នកចូលរួមលើសពី២០នាក់ រួមទាំងផ្អាករាល់ការហាត់ប្រាណ និងលេងកីឡាដែលមានលក្ខណៈប្រមូលផ្តុំ។

កាលពីថ្ងៃទី៣០ ខែវិច្ឆិកា ក្រសួងការងារបណ្តោះបណ្តាលវិជ្ជាជីវៈ បានប្រកាសផ្អាកដំណើរការសិក្សានៅគ្រឹះស្ថានអប់រំបណ្តោះបណ្តាលបច្ចេកទេស និងវិជ្ជាជីវៈរយៈពេល១៥ថ្ងៃ ដែលគិតចាប់ពីថ្ងៃទី១ ដល់ថ្ងៃទី១៥ ខែធ្នូ។

នាថ្ងៃដដែលសម្តេចនាយករដ្ឋមន្ត្រី ហ៊ុន សែន ក៏បានអំពាវនាវឲ្យពលរដ្ឋផ្អាកជួបជុំគ្នា រៀបចំកម្មវិធី អាពាហ៍ពិពាហ៍ និងកម្មវិធីផ្សេងៗផងដែរ។

នៅថ្ងៃនោះដែរ ក្រសួងវប្បធម៌ និងវិចិត្រសិល្បះក៏បានប្រកាសផ្អាកដំណើរការរោងភាពយន្ត រោងសម្តែងសិល្បៈ និងសារមន្ទីរទូទាំងប្រទេសផងដែរ។

គិតត្រឹមថ្ងៃទី១០ ខែធ្នូនេះ អ្នកឆ្លងក្នុងព្រឹត្តិការណ៍២៨វិច្ឆិកាមានចំនួន៣៩នាក់។ តួលេខសរុបនៅកម្ពុជាមានចំនួន៣៥៦នាក់ ដោយសះស្បើយ៣០៧នាក់។ អ្នកជំងឺ៣៦នាក់កំពុងព្យាបាលនៅពេទ្យខ្មែរសូវៀត និង១៣នាក់នៅមណ្ឌលសុខភាពចាក់អង្រែ៕